¿K’al jita’ ti ts’ejkáj a Dios?

Jun i tataláb in uchál in tsakámil axi in kwa’al buk i támub axé’: «In t’ajál yan i támub a Dios in ts’ejka’ an Tsabál ani patal jawa’ wa’ats tejé’. Jayej in ts’ejka’ an k’ak’ál, a íts’ ani yan i ót». An tsakam u jílk’onal ti tsalpax ani talbél in ulal: «Papá... ¿ani k’al jita’ ti ts’ejkáj a Dios?».

An tataláb u tók’tsinal: «yab k’al jita’ ti tsejkáj, Jajá’ ets’ey k’wajinek.» An tsakam in belál jawa’ uxnal k’al in papá. Pero tam ka más puwey, u jílk’onal ti tsalpax k’al jawa’ uchan k’al in papá. Yab in éjtowal kin bela’ abal a Dios k’wajiinek ets’ey. Yab in ejtowal kin exbay, max patal in ko’oy in tujtal, ma an k’aylál. An konowixtaláb axi in kwa’al yabayej u tok’tsincháb. Jajá’ in lé’ kin exla’ k’al jita’ ti ts’ejkáj a Dios.

An Biblia jayetsej in ulal, jawa’ an kwitól uchan k’al in papá. A Moisés in ucha’ a Jehová axé’ xi káw: «Tam ti yabayej wa’atsak i ts’enlom, tam ti yabayej wa’atsak an Tsabál ani yabayej ­wa’atsak jant’oj, Tatá’ ets’ey it k’wajinek Dios ani abal ets’ey ne’ets kit k’wajiy» (Salmo 90:​1, 2). An kawlómej Isaías jayej in uluw axé’: «¿Yab a exlálak abal a Jehová játs an Dios axi ets’ey k’wajinek, ani in ts’ejkámal patal jawa’ wa’ats ban Tsabál?» (Isaías 40:​28, Reina-Valera, 1960). Ani a Judas, in dhucha’ abal a Dios pel i abatnom xowé’ ani «abal ets’ey» (Judas 25).

Axé’ xi versículos in tejwamedhál abal a Dios játs an «lej Ts’alej abal ets’ey», antsaná’ jant’ini’ tin uluw an abatwálej Pablo (1 Timoteo 1:17). Max ki tsalpay k’al axé’, a Dios ets’ey k’wajinek. A Dios yab in kwa’al in tujtal ani yab jayk’i’ ne’ets ka taley (Revelación 1:8). Antsaná’ játs jant’ini’ tu exláb a Jehová.

¿Jalé’ ti k’ibat i ats’ál ki exbay axé’? Kom wawá’ u k’wajíl lej wé’ i támub, jaxtám yab i éxbayal jant’ini’ a Jehová in ajiyal an k’ij. Jun i t’iplab, kom ets’ey k’wajinek, abal Jajá’ mil i támub pel júnkats a k’icháj (2 Pedro 3:8). Ki tsalpay k’al axé’ xi t’iplab. Jun i ts’ili’ expidh u k’wajíl 50 a k’icháj ani wawá’ u k’wajíl 70 u 80 i támub. ¿Walám kin exbay jay i támub pel nixé’? ¡Imbáj! Wawá’ i ejatal, pel ejtíl nixé’ an ts’ili’ max ki jumbiy k’al a Jehová (Isaías 40:22; 55:8, 9). Jaxtám yab i éjtowal ki exbay abal a Jehová u k’wajíl abal ets’ey.

Walám k’ibat i ats’ál ki bela’ abal a Dios ets’ey k’wajinek, pero játs antsaná’. Max a Jehová ts’ejkámejak k’al jita’, tam in lé’ kin uluw abal wa’tsin k’e’at i ts’ejkom. Pero an Biblia in ulal abal a Jehová játs an ts’ejkom k’al patal jawa’ wa’ats ban Tsabál (Revelación 4:11). Jayej i exlál abal an k’aylál in ko’oy in tujtal (Génesis 1:​1, 2). Pero, ¿jant’ini’ ti tujey? Ko’oy ka wa’tsin k’al jita’ ti ka ts’ejkáj. Axé’ xi ts’ejkom ko’oy ka k’wajiy tam ti yabayej k’wajatak a Jesús nibal an ángeles (Job 38:​4, 7; Colosenses 1:15). Tam, i éxbayits abal a Jehová k’wajatak kwetém, ok’xidh kin ts’ejka’ patal jawa’ wa’ats. Jaxtám a Jehová yab ts’ejkáj k’al jita’.

An ejataláb ani patal jawa’ wa’ats ban k’aylál, in tejwamedhál abal wa’ats jun i Dios axi ets’ey k’wajinek. An k’aylál ts’ejkáj ani k’wajat ti beletnáb k’al jita’ axi yab jayk’i’ u talél. Expidh Jajá’ in éjtowal kin t’aja’ abal ka wa’tsin i ejataláb. (Job 33:4).