TÓLMIYATCHIK K’AL AN BIBLIA ABAL KIN JALK’UY IN ÉJATAL

U lej jik’pa’ abal an Biblia in olnál patal lej tajax ani tekedh

Axe’ jats jawa’ in wat’a’ Ernest Loedi

JAYK’I’ TI WA’TSIN: 1948
BICHOW: HUNGRÍA
K’E’AT JANT’OJ TIN KWÉNTAJ AN EPCHAL: IN LE’AK KIN EXLA’ JALE’ TI WA’ATS YAN I YAJCHIKTALÁB

JANT’INI’ U EYAK.

In wa’tsin ti Székesfehérvar, jun i bichow ti Hungría axi lej biyálits ani in wat’amal yan jant’oj. Lej yajchik u ats’ál ku t’ila’ jawa’ wat’ey ban Segunda Guerra Mundial.

U mamchik jats axi tin yedha’. U lej t’ilálchik ani más u ach, Elisabeth. Jaja’ tin exóbchij ku bela’ a Dios. Ma tam tu kwa’alak ox i támub tin exóbchij ku t’aja’ an padrenuestro. Ma tam tu ko’oy treinta i támub u bajuw ku exbay nixe’ xi oláb.

U mamchik tu béletna’ tam tu tsákamej kom u tátajchik u t’ojnalak abal kin tamkuy i tumín ani kin ts’a’iy jun i atáj axi más alwa’. Pero tsabíl ta its’ u tamkunalak abal ku k’apúts junax. K’ijidh ku t’ila’ tam ti t’ajalak antsaná’.

Ti 1958 u tátajchik in putuw jawa’ in tsalpayamalak kin t’aja’. In bajuwchik kin ts’a’iy jun i atáj. Xowé’ ne’etsakits ku ejtow kin k’wajiy k’al jajá’chik. In lej kulbelak, pero nixe’ xi kulbetaláb yab lej owey. Akak i íts’ talbél, tsemets u papá kom in kwa’alak i cáncer.

U lej yajchikna’. U t’ilál abal u uchalak a Dios: «Tu lej konchij abal yab ka tsemets u papá. U lej yejenchal k’al nana’. ¿Jale’ ti yab tin ats’a’?». Lej yajchikak u ats’ál, u le’ak ku exla’ ju’táj ti k’wajatak u papá. U konowiyalak tu ba’: «¿Walám k’alej ti éb o ju’táj ti k’wajatak? In tsakulak ku tsu’uw an tsakamchik axi belej in kwa’alak in tátajchik.

Wilk’idh in k’alelak ku tsu’uw ju’táj ti jólidhak u papá, u t’udhuwalak u k’walál ani u uchalak a Dios: «U le’ ku exla’ ju’táj ti k’wajat u tátaj. Jayej u konchalak abal u le’ak ku exbay jale’ tu k’wajat teje’».

Tam ti u kwa’alak 13 i támub, u takuy ku exóbna’ an kawintaláb alemán kom u tsalpay abal al axé’ xi kawintaláb walám ne’etsak ku ela’ an tok’tsixtaláb k’al an konowixtaláb axi u kwa’alak. Ban támub 1967 in k’alej tin exóbal al an bichow Jena, axé’ k’wajatak ban biyál Alemania oriental. U ajiy patal an libros in k’ál an filósofos alemanes, pero más axi u kaw tin kwéntaj jale’ tu k’wajat al axe’ xi xe’tsintaláb. Bélakits abal u ela’ junchik i tok’tsixtaláb, yab wa’tsin ni jun axi tin lej tólmiy. Jaxtám u áynanchij ku konchij in tólmixtal a Dios.

TÓLMIYAT K’AL AN BIBLIA ABAL KIN JALK’UY IN ÉJATAL.

Tólmiyat k’al an Biblia abal kin jalk’uy in éjatal. Ti 1970 in wichiy ti Hungría ani taná’ u exla’ axi xo’ pel u tomkíl, a Rose. Al axe’ xi bichow yab wa’atsak i walkadhtaláb, jaxtám we’ i k’ij talbél tu tómkin u k’alej ti Austria. An tsalap pelak ku k’alej ti Australia ti Sydney, tana’ u k’wajílak jun u itsan.

Yab lej owat u ejtow ku ela’ i t’ojláb ti Austria. Jun i k’icháj, jun u at t’ojnal tin ucha’ abal ti Biblia u éjtowal ku ela’ patal an tok’tsixtaláb ani tin pidha’ tsab i libro axi u kaw tin kwéntaj axé’. Yab in owey, u talabedha’ ku ajiy, pero kom u le’ak ku exla’ más, jaxtám u dhuchunchij jita’ in ts’ejkálchik axé’ xi libro, an ólchixchik k’al a Jehová ani u konchij ti kin abchij más i libros.

Tam ti putuw i támub tu tómkidh tu tsa’biy jun i ólchix k’ál a Jehová. Tin chanchij an publicaciones ani tin konoy max u le’ak ku exobna’ an Biblia. U tok’tsiy abal aníts. Tekedh u le’ak tin exóbal, jáxtam u exobnalak an Biblia tsabíl ti semana, ¡ani u ówelak tse’ i hora!

In lej kulbelak k’al jawa’ an ólchixchik k’al a Jehova’ tin exóbchalak k’al an Biblia. Tam ti in ólchin in bij a Dios ti Hungaro u lej jik’pa’. 27 i támub in k’alej ti misa ani yab jayk’i’ u ats’amalak axe’ xi bijláb, Jehová. U lej jik’pa’ jant’ini’ an Biblia in binál i tok’tsixtaláb lej tajax. Jun jant’oj axi u exóbna’ pel abal an tsemélom yab in ats’ál ni jant’oj. Ejtíl max k’wajatchik wayámadh (Eclesiastés 9:5, 10; Juan 11:11-15). Jayej u exóbna’ abal ne’ets ka wa’tsin jun i alabél tsabál ju’táj «yabáts ne’ets ka wa’tsin i tsemláj» (Revelación [Apocalipsis] 21:3, 4). Xowé’ u lej belál abal al axé’ xi tsabál ne’ets ka edháj an tsemélomchik ani abal ne’ets ku tsab tsu’uw u papá (Hechos 24:15).

A Rose tin lej tólmiy. Dhubatk’ij i t’aja’ i jalk’uxtaláb ti éjatal ani al tsab a íts’ i talabedha’ ki exóbna’ an libro. Ets’ey u k’alelak ti tamkuntaláb k’al an ólchixchik k’ál a Jehová. I lej kulbetnálak kom u lej k’anidhomchik jant’ini’ tu bats’uwal ani abal lej júnkudhchik (Juan 13:34, 35).

Ti 1976 u uchan abal i éjtowalakits ku k’alej ti Australia. Tokot u ulits i aliy an ólchixchik k’al a Jehová ani tu bats’uw lej alwa’. Ti 1978 i t’aja’ tu ólchix k’al a Jehová.

AN ALWA’TALÁB AXI U BATS’UWAMAL.

Xowé’ u exlalits an tok’tsixtaláb k’al an konowixtaláb axi u kwa’alak ma ti lej biyálits. Jayej u ela’ an tataláb axi lej k’anidhom, Jehová (Santiago 4:8). Ani u kwa’al an aychixtaláb ku tsu’uw u papá ti alubél tsabál (Juan 5:28, 29).

Ti 1989 i takuy ku wichiy ti Hungría abal ki ólchij an chubaxtaláb axi i exobnámal k’al an Biblia i yanél ani k’e’at i atiklábchik. I tolmiyámal yan i atiklábchik kin exóbna’ axé’ xi chubaxtaláb. Wat’adh setenta in t’ajámalchik ti ólchix ani jayej u mamá.

Al 17 i támub u ólonchij a Dios abal ti kin ólchij an tok’tsixtaláb, ani wat’enekits 39 i támub tin tok’tsinchij. Xowé’ bel u ólonchal ani u pidhál i k’ak’namal kom tin tok’tsinchamal an konowixtaláb axi u kwa’alak ma tam tin kwitólej.