Kʼwajatak u lej odhnál u ejatal

JANTʼINIʼ U EYAK:

In waʼtsin al jun i tsakam kwenchal ti Los Ángeles (California, Estados Unidos), axéʼ xi kwenchal u lej exlabak kom an atiklábchik in kulbetnalak ti pejéx ani u nujuwabak i drogas. Pelak akak ti eb, ani nanáʼ pel an tsabchíl.

Tam tin tsakamej, u mamáʼ tu nʼedhalak al jun i iglesia evangélica. Pero tam tin kwitolejak, yabak u tʼajál ti kwéntaj jawaʼ in exobchinalak tanáʼ. Tam kin bajuw an kʼicháj domingo, in ajatak al an coro ti nixéʼ xi iglesia, pero tin naktal an semana in kʼalelak tin kʼijidhbél al i ajib, u eyendhalak i drogas ani u xeʼtsindhalakchik i uxum.

Max kin weʼ takchikiyat, dhubat in tsakulak. Jantʼokits ku elaʼ jats u eyendhalak abal tin pejéx. Yab tin lej tólmiy jawaʼ u exóbnaʼ ti iglesia. U tsalpayalak abal a Dios in leʼak kin pejexin, jaxtám u tʼajalak. Tam ti u kwaʼalak 18 i támub, ban támub sesenta, u kulbetnalak jawaʼ in tsalpayalak jun i mukʼeʼ axi u exláb ti Panteras Negras. Axéʼ xi mukʼeʼ u exlábak kom in pidhalak i tolmixtaláb an atiklábchik. In junkun kʼal jun i mukʼeʼ i exóbalchik axi jayej in kʼaniyalak an atiklábchik. Yaníl u kʼalej ki tomolnaʼ an eyalchik, jaxtám ti escuela yab i koʼoyalak i clases.

Pero nanáʼ u leʼak más. Jaxtám, in kʼalelak ti cine abal ku tsuʼuw i películas juʼtáj ti u tejwamelak jantʼiniʼ an atiklábchik axi dhakniʼ in lej odhnál an atiklábchik axi tʼunuʼ. Nixéʼ in tʼajaʼ abal ku más tsakuy. Jaxtám, u kʼalej ki aliy i kwitólchik axi dhakniʼ abal ki kwadhaʼ. Jayej u kʼalej tin kʼimáʼ i atiklábchik axi dhakniʼ abal ki odhnaʼ.

Al axéʼ xi kʼij, u epchal ani nanáʼ i tʼajamalits yan i pojkaxtaláb. Jun u epchal xeʼetsak kʼal jun i mukʼeʼ i atiklábchik axi lej pojkax ani nanáʼ jayej u junkuwchik, neʼetsak ti más kidhabmél u ejatal.

JANTʼINIʼ TIN TÓLMIY AN BIBLIA ABAL KU JALKʼUY U EJATAL:

Jun u jaʼúb, in tátajchik pelak i ólchixchik kʼal a Jehová, ani tin kaniy ti tamkuntaláb. An kʼaʼál kʼicháj tam tin kʼalej u tsuʼuw abal axéʼchik xi atikláb lej junits. Patalchik in kwaʼalak jun i Biblia ani in eyendhalak. Ani ma axi kwitolej in binalak i tsakam tʼilomtalábchik. U lej jikʼpaʼ tam ti u exlaʼ abal a Dios in bij Jehová, ani abal jajáʼchik in lej eyendhalak(Salmo 83:18). Belits abal waʼatsak i atiklábchik axi kʼeʼat in wal, kʼeʼat in kawintal, pero kʼwajatakchik junkudh.

Tam ti kʼaʼál, yabak u leʼ ku batsʼuw jun i exobintaláb kʼal an Biblia, pero u kulbetnalak kin kʼalej ti tamkuntaláb. Jun i akal, biyat in kʼwajatak ti tamkuntaláb, u exlaʼ abal an atiklábchik axi u junkuwalak in tsemdhaʼchik jun i kwitól abal kin tixkʼanchij in kotón, ani tam ti chudhey exomak in olnál jawaʼ in tʼajaʼ. Belits abal neʼdhájchik kʼal an eyal, yabchik u tʼeʼpinalak. Junchik kʼal jajáʼ jilan ti wikʼaxteʼ abal etsʼey. ¡U atsʼaʼ lej alwaʼ kom yab in kʼalej kʼal jajáʼchik! Tam u leʼnaʼ ku jalkʼuy u ejatal ani u tujchij ku exóbnaʼ an Biblia.

Kom nanáʼ u pokʼodh tsuʼtalak an atiklábchik, u lej jikʼpaʼ an junkudhtaláb axi waʼatsak kʼal an ólchixchik kʼal a Jehová. Jun i tʼiplab, jun i tomkinél koʼoychik ka kʼalej al pil i bichow ani in jilaʼ abal in tsakámilchik ka beletnanchat kʼal i atiklábchik axi tʼunuʼ. Jayej, jun i yaneláb axi pel dhakniʼ in neʼdhaʼchik tin kʼimáʼ jun i kwitól axi pel tʼunuʼ. Axéʼ tin tólmiy ku tsuʼuw abal an ólchixchik kʼal a Jehová in belkál jawaʼ in ulal ti Juan 13:35: «Max chubax kit kʼanidhaxin, tam patal an atiklábchik neʼets kin tsoʼobnaʼ abal tatáʼchik pel tu lej exobalil.

Kʼal an exobintaláb kʼal an Biblia, u tsuʼuw abal kwaʼalak ku jalkʼuy u ey. Koʼoy ku exóbnaʼ ku tʼajaʼ tin lej kʼayaʼ ani ku jilaʼ an tsakultaláb. (Romanos 12:2). U jalkʼuy u ejatal kʼayúm kʼayúm, ani ti enero ti 1974 in pujan, u bajuw ku tʼajaʼ tin ólchix kʼal a Jehová.

Ani talbél tin pujadh, koʼoy ku tsapnanchij ku aynaʼ ku jalkʼuy u ey. Jun i tʼiplab, jun a kʼicháj tam ti u xeʼetsak tu ólnom al jun i kwenchal. U tʼajaʼ ti kwéntaj abal jun i inik, exomak tin kweʼchal an radio axi u kwaʼalak ban carro. In kʼalej ku bajuw, tam ti neʼetsakits ku yekʼwaʼ, in petʼnaʼ an radio ani in aynanchij ti adhil. Tam ti u ólchij an epchalchik jawaʼ u tʼajaʼ abal yab tin kweʼchin an radio, jun i epchal axi biyálits ti ólchix tin uchaʼ: «¿Jantʼoj a tʼajchamalak an inik max a ejtowamalak ka yekʼwaʼ?». Axéʼ xi konowixtaláb tin tólmiy ku tsuʼuw abal bel u atsʼalak i tsakultaláb tu ichích.

Ti octubre ti 1974, u tʼajaʼ más i kʼij ban olnomtaláb. U tʼajalak cien i horas ta ítsʼ abal ku exóbchij an atiklábchik kʼal an Biblia. Talbél in kaniyat tin tólmix ban central in kʼál an ólchixchik kʼal a Jehová axi kʼwajat ti Brooklyn (Nueva York). Ti 1978 koʼoy kin wichiy ti Los Ángeles abal ku beletnaʼ u mamá. Tsab i támub talbél, in tomkin kʼal a ­Aarhonda. Jajáʼ tin lej tólmiy ku beletnaʼ u mamáʼ ma tam tin bajuw ka tsemets. Talbél u kaniyat ban Escuela Bíblica de Galaad de la Watchtower. Tam ti taʼpanits, u aban jantʼiniʼ i misioneros ti Panamá, ani xowéʼ bel i aynanchal tejéʼ.

Ma tin pujnenek, bel u atsʼál kʼibat yab kin tsakuy. Tam u atsʼál antsanáʼ, in nixkʼinal tanáʼ abal yab kin pejexin o u tsapnanchal ku tsʼejkaʼ an kʼibataláb. Yan i atiklábchik ani ma u kʼimádhil in jikʼpál jantʼiniʼ u jalkʼuyamal u ejatal. Nanáʼ jayej u lej jikʼpál jawaʼ u bajuwamal. Pero patal axéʼ xi jalkʼuntaláb axi u tʼajámal yab u bajuwamal tu kwetemtal. U lej belál abal pel in tsap an Biblia axi in kwaʼal abal kin jalkʼunchij in ey an atiklábchik (Hebreos 4:12).

AN ALWATALÁB AXI U BATSʼUWAMAL:

An Biblia tin tolmiyámal ku koʼoy más i kʼayaʼtaláb ani ku atsʼaʼ lej kulbél. Xowéʼ yabáts u odhnál an atiklábchik, expidh u tólmiyal abal kin exlaʼ a Dios. Ma u bajuw ku pidhaʼ i exobintaláb kʼal an Biblia jun u juntal exóbal axi u kʼwiyalak. Ani talbél ti pujadh, u kʼalej tu kʼwajíl junax, ani xowéʼ bel u neʼdháx alwaʼ. Ma xowéʼ, u kʼimádhil ani nanáʼ i tolmiyámal watʼadh ochenta i atiklábchik abal kin tʼajaʼ ti ólchix kʼal a Jehová.

U lej kʼakʼnanchal a Jehová kom tin tolmiyamal ku exlaʼ an chubaxtaláb ani kin kʼwajiy kulbél ani ku koʼoy i jaʼúbchik axi chubax tin kʼanidhál.