Yab u lé’ak kin tsemets

JANT’INI’ U EYAK

In wa’tsin ti Paddington, jun i tsakam kwenchaláb axi kwentalidh ti Londres (Inglaterra). In k’wajílak k’al u mamá ani ox u epchal axi más ok’ox k’al naná’. U papá yab ets’ey u k’wajílak k’al wawá’, kom u lej uts’álak.

Tam ti in tsipílejak, u mamá tin exóbchij kin oláts tam akal. Naná’ u kwa’alak jun i Biblia axi expidh in kwa’alak an Salmos ani u ajatnálak jant’ini’ naná’ u tsálpanchalak. Jun a k’icháj u ajiy jant’oj axi tin lej t’e’pindha’, in ulalak: «Jun a k’icháj yabáts ne’ets ku tajk’an». Tam akal, yab u éjtowalak tin wayal. U tsálpayalak jant’oj ne’ets ka wat’ey k’al u ejatal. U tsálpayalak: «Yab alk’idh tu k’wajat tejé’. Kwa’alak ka wa’tsin k’e’at jant’oj. Yab u lé’ak kin tsemets».

U lé’ak ku exla’ jant’oj ne’ets ka wat’ey, jaxtám in k’alej k’al an dhiman. U exa’ ku t’ilmay an tsemélomchik ani in k’alelak ban cementerios k’al u juntal exóbal. Jayej, i met’alak i películas axi lej k’ak’adh. U jik’elak, pero jayej i kulbetnálak.

U kwa’alak 10 i támub ani u t’ajálakits yan jant’oj kidháb. In tujey u juts’uwal i tabaco ani talbél yabáts u éjtowalak ku jila’. Talbél jayej u tujchij ku juts’uw i marihuana. U kwa’alak 11 i támub tam tu tujchij tin uts’ál. Yab u élchalak in kujúw, pero u kulbetnálak kin wilej. U lej k’ijidhnálak an son ani tin bixom, jaxtám in k’alelak al yan i ajib. Tam ka akléts, in tsinat kalelak ani in wichelak tam dhajuw yík’wax. Tam ka tájk’anits, u ats’álak in lej tsékenek. Jaxtám yabáts in k’alelak ti escuela, ani tam in k’alelak taná’ jayej in uts’álak.

Tam ti wé’its ku talabédha’ an escuela, más yabáts iu tsápnanchij tin exóbal. Tam ti u mamá in t’aja’ ti kwéntaj patal jawa’ u t’ajálak, lej t’e’pin ani tsakuy k’al naná’. U tok’tsíxin ani u jila’ u k’imá’. In k’alej tin k’wajíl k’al a Tony, u novio. Jajá’ pelak jun i kwitól axi u lej kwe’, in nújuwalak i drogas ani lej pójkaxak. Tam tu kwa’alak 16 i támub, u ko’oy u k’a’al tsakámil.

JANT’INI’ TIN TÓLMIY AN BIBLIA ABAL KU JALK’UY U EJATAL

U jiláxin k’al a Toniy ani u ne’dha’ an t’ele’ abal ku k’alej tu k’wajíl al jun i albergue. Taná’ u tolmiyábak i mimlábchik axi in kwa’alak i t’ele’. Taná’ tu exla’ an ólchixchik k’al a Jehová. Tsab i epchal mimláb u k’alelakchik kin tsa’biy i mamaláb axi jayej k’wajatak in beletnál kwetém in tsakámil. Jun a k’icháj, in utey k’al jajá’chik abal ku tejwamédhanchij abal yab chubax jawa’ in olnálchik. Pero jajá’chik yab tsakuy, tin tók’chinchij k’al an Biblia patal an konowixtaláb axi u t’ajchichik. Tin ko’onchijchik yan i k’aya’taláb. Jaxtám u bats’uw ti kin exóbchij k’al an Biblia.

U exóbna’ jant’oj axi tin lej tólmiy ku jalk’uy jawa’ u tsálpayalak. Ma tu tsákamtal u lej ts’ejnálak kin tsemets, pero jun a k’icháj u exóbna’ jawa’ in uluw a Jesús tin kwéntaj an tsemélomchik (Juan 5:​28, 29). Jayej u exóbna’ abal a Dios u t’e’pinal k’al naná’ (1 Pedro 5:7). Jawa’ in ulal Jeremías 29:11 ulits ma tu ichích. In ulal antse’: «Naná’ u alwa’ exlál an tsalap axi k’wajat u tsálpayal abal tatá’chik, in ulal a Jehová, jun i tsalap axi koyat ani yab abal i yajchiktaláb, abal tu pídha’chik jun i ejataláb más alwa’ ani jun i aychixtaláb». In tujey ku bela’ abal chubax ne’ets ku k’wajiy al jun i alabél Tsabál (Salmo 37:29).

An ólchixchik k’al a Jehová tin lej k’anidhálak. Tam tin k’a’ál k’alej ti tamkuntaláb, an epchalchik tin bats’uw lej alwa’. U lej kulbetnálak kin k’wajiy k’al jajá’chik. Tejwa’ abal u lej kulbélchik (Juan 13:​34, 35). Tam ti in k’alelak ban iglesia yab u ats’álak antsaná’. An epchalchik yab tin pojka’ k’al jant’ini’ tin k’wajatak. In jolk’álakchik i k’ij abal ka k’wajiy k’al naná’, tin k’anidhálak ani tin exóbchalak jant’ini’ ku eyendha’ jawa’ k’wajatak u exobnál. U ats’álak jant’ini’ max pel u yanél.

Tam más u exobnálak an Biblia, u t’ajálak ti kwéntaj abal kwa’alak ku jalkuy jawa’ u t’ajálak, abal ku kulbédha’ a Dios ani ku t’aja’ jawa’ Jajá’ tu konchal. U ats’a’ lej k’ibat ku jila’ tin juts’ul. Jayej u t’aja’ ti kwéntaj abal tam u ats’álak talchik i son, in t’ajalak abal ku lé’na’ junílek’ij tin juts’ul. Jaxtám in tujey u ats’al k’e’at i son, yabáts in k’alej al i ajib kom u exlálak abal taná’ an atiklábchik u júts’ulak ani wa’atsak i vino. In tujey ku junkuw i atiklábchik axi ti kin tólmiy ku jila’ i k’idháb t’ajbiláb (Proverbios 13:20).

Al axé’ xi k’ij, a Tony k’wajatak in exobnál an Biblia k’al an ólchixchik k’al a Jehová. Tam tin t’aja’ ti kwéntaj abal patal jawa’ k’wajatak in exóbnál k’wajatak ban Biblia, in bela’ abal játs an chubaxtaláb. Tujey in jilál kin t’aja’ i kidháb t’ajbiláb, kin junkuw i atiklábchik axi pójkax, jayej in jila’ ti júts’ul ani ti kwé’. I t’aja’ ti kwéntaj abal in tomnálak ku tómkin abal ki exóbchij i tsakámil jawa’ alwa’. Ti 1982, u tómkin.

U aliyalak ban revistas La Atalaya ani ¡Despertad!a i t’ilab in k’ál i epchalchik axi in jilámal kin t’aja’ i kidháb t’ajbiláb ejtíl axi naná’ u t’ajálak. Axé’ xi t’iplab tin lej kanatbédha’ ani tin pidha’ i tsapláb abal ku áynanchij ku jalk’uy u ejatal. U lej konchalak a Jehová abal ti kin ko’onchij i k’aya’taláb. A Tony ani naná’ u pujan jant’ini’ u ólchix k’al a Jehová ti 1982.

AN ALWATALÁB AXI U BATS’UWAMAL

In k’wajat ejat kom u exla’ a Jehová. A Jehová tu lej tolmiyámal a Tony ani naná’ tam i wat’ámal i k’ibataláb. I exobnámal ki bela’ k’al a Jehová tam i wat’ámal i k’ibataláb ani i t’ajámal ti kwéntaj abal tu lej beletnál (Salmo 55:22).

U lej kulbél kom i ejtowámal ki tólmiy tsablom i tsakámil ka utey k’al a Jehová. Jayej in lej kulbél kom u mómobchik k’wajat in exlál a Jehová.

Yabáts in lej t’e’pinal abal ku exla’ jant’oj ne’ets ka wat’ey axi ta’tal a k’icháj, ani yabáts u ts’ejnál kin tsemets. A Tony ani naná’ u lej kulbél kom xowé’ i tsa’biyal an tamkuntalábchik abal ki kanatbédha’ an epchalchik. Jayej u ólnom k’al jajá’chik abal ki exóbchij an atikláb kin bela’ k’al a Jesús ani kin éjtowchik ka k’wajiy abal ets’ey ban ít Tsabál.