I EJATAL TU AYKOL KʼAL A CRISTO

Ka takuy alwaʼ kʼal jantʼoj ti kʼijidhbél

¿Jaleʼ ti kwaʼal ki takuy alwaʼ kʼal jantʼoj tu kʼijidhbél? Kom an película axi i takuyal ki metʼaʼ, an son axi i atsʼál, jawaʼ i tsuʼtal ti Internet, an libro axi i ajiyal, o an videojuego axi ubátʼnál neʼets ka otsits ti tsalápil. Patal jawaʼ ki takuy abal ku kʼijidhbej neʼets ka tejwaméj ti ejatal. Chubax, xowéʼ ta kʼicháj, yán kʼal jawaʼ waʼats abal ku kʼijidhbej in kwaʼal yán jantʼoj kidháb axi a Jehová in pojkál (Sl 11:5; Gál 5:19-21). Jaxtám, an Biblia tu tʼajchal an kanixtaláb abal ki lej tsalpay jantʼiniʼ i ejtowal ki puwénchij a Jehová (Flp 4:8).

TALBÉL TA TSUʼÚMAL AN VIDEO ¿JANTʼOJ IN TOMNÁL KI EYENDHAʼ ABAL KU KʼIJIDHBEJ?, KA TÓKʼTSIY AXÉʼ XI KONOWIXTALÁBCHIK:

¿Jaleʼ ti yán jantʼoj axi waʼats xowéʼ abal ku kʼijidhbej, pél jantʼiniʼ an juegos axi in tʼajálak an gladiadores axi ti Roma?
¿Jantʼiniʼ in ejtowal an epchalchik axi ti tamkuntaláb kin tólmiy axi tsakamej abal kin takuy alwaʼ jantʼiniʼ ka kʼijidhbej?
¿Jantʼiniʼ tu tólmiyal Romanos 12:9 ki takuy alwaʼ kʼal jantʼoj neʼets ku kʼijidhbej?
¿Jantʼoj waʼats juʼtáj it kʼwajíl abal ki kʼijidhbej jantʼiniʼ in kulbetnál a Jehová?

¿A KULBETNÁL KI KʼIJIDHBEJ KʼAL JANTʼOJ AXI KA TʼAJAʼ O KʼAL JANTʼOJ AXI KA METʼAʼ?

Xowéʼ ta kʼicháj, yán jantʼoj axi waʼats abal ku kʼijidhbej expidh pél abal ki metʼaʼ. Ejtíl, an películas, an libros ani an programas axi u kalel ban televisión in tejwamédhal jawaʼ in tʼajál kʼeʼat i atiklábchik, wawáʼ yabáts u yatsnal, expidh i metʼál ani u kʼijidhbél. Yab jantʼoj in kwaʼal max i léʼ ku kʼijidhbej kʼal jantʼoj axi ki metʼaʼ, pero yán in tsalpayal abal más alwaʼ ku yatsin, ki tʼajaʼ jantʼoj abal ku kʼijidhbej. Talchik in kulbetnál ti tʼénel, kʼeʼatchik u múkul ani antsanáʼ u kʼijidhbélits. Waʼats jitaʼchik in kulbetnál ti ubátʼ, ti adhil o ti belal. A ejtowal ki kʼijidhbej jantʼiniʼ ka léʼnaʼ, pero etsʼey ka tʼajaʼ ti kwéntaj abal jawaʼ ka takuy ka tʼajaʼ «kwaʼal kin puwénchij in bij a Dios» (1Co 10:31).