I EJATAL TU AYKOL KʼAL A CRISTO
I éjtowal ki tejwamédhaʼ i kʼanidhomtaláb ban púlik tamkuntaláb regional
¿Jaleʼ ti lej kulbetnál an púlik tamkuntaláb regional? Kom antsanáʼ jantʼiniʼ an israelitas ti biyál, wawáʼ i éjtowal ku tamkun kʼal yan i epchal ani walám ma kʼal miles abal ki puwénchij a Jehová. Al an púlik tamkuntalábchik i bátsʼuwal yan i exobchixtaláb, ani jayej i éjtowal ku kʼwajiy kʼal i jaʼúbchik ani i yanél. I lej kʼakʼnál axéʼ xi púlik tamkuntaláb, jaxtám i tsápnanchal ku kʼalej óxlom a kʼicháj.
Tam ku kʼalej kʼal jun i púlik tamkuntaláb, yab expidh ki tsalpay kʼal jawaʼ i éjtowal ki batsʼuw, jayej ki tsalpay jantʼiniʼ i éjtowal ki tejwamédhaʼ i kʼanidhomtaláb (Gál 6:10; Heb 10:24, 25). Jayej i tejwamedhál abal u tʼeʼpinal kʼal an epchalchik tam ki takuy expidh an laktem axi neʼets ki eyendhaʼ ani tam i japchal an wíʼleb jun i epchal axi neʼets ka watʼey (Flp 2:3, 4). Ban púlik tamkuntalábchik jayej i éjtowal ki exlaʼ más i epchalchik ani ki jaʼúbnaʼ. ¿I éjtowal ki tsápnanchij ki tʼilmay jitaʼ axi yab i exlál? Awil ki tʼajaʼ tam dhajuw, tam ku kʼaputs o tam wakal (2Co 6:13). Axéʼchik xi epchal i éjtowal ki jaʼubnaʼ abal etsʼey. Tam an atiklábchik kin tʼajaʼ ti kwéntaj abal wawáʼ chubax u kʼanidháx, walám ma kin léʼnaʼchik kin tʼojonchij a Jehová (Jn 13:35).
TALBÉL TA TSUʼUMAL AN VIDEO AN ASAMBLEAS INTERNACIONALES «ETSʼEY U KʼANIDHOM», KA TÓKʼTSIY AXÉʼ XI KONOWIXTALÁBCHIK:
¿Jantʼiniʼ tejwamédhanchat i kʼanidhomtaláb an epchalchik axi kʼalej kʼal an asambleas internacionales ti 2019?
¿Jaleʼ ti an atiklábchik in lej jikʼpál an junkudhtaláb ani an kʼanidhomtaláb axi waʼats tin bichówil a Jehová?
¿Jantʼoj tam tsálapchik tin kwéntaj an kʼanidhomtaláb in olnaʼ an epchalchik axi tólmix kʼal an Kwenél i Ókʼnom?
¿Jantʼiniʼ a éjtowal ka tejwamédhaʼ i kʼanidhomtaláb tam i kʼalel kʼal an púlik tamkuntalábchik?
¿Jantʼiniʼ ti tejwaméj i kʼanidhomtaláb ti Alemania ani ti Corea del Sur?
¿Jantʼoj in tomnál ki áynanchij ki tʼajaʼ?