Ki tsápnanchij ki kanchij patal in alwáʼ an exobintaláb

Tam ku tʼojojon abal tu exóbal walám ki konowiy ti baʼ: «¿Jantʼoj jats axi u aychal ku exóbnaʼ?». Walám i wéʼ exlálits jantʼoj neʼets ki exóbnaʼ tam u kʼwajat tu ajum, pero lej exbadh ki jilaʼ abal a Jehová tu ku exóbchij jantʼoj ít. ¿Jantʼiniʼ ti éjtowal ki tʼajaʼ?

Ka konchij a Jehová i tsalpadhtaláb. Ka tsápnanchij etsʼey ka exóbnaʼ jantʼoj ít (Prov. 3:​5, 6). Ka konchij a Jehová ti tólmiy ka exlaʼ jantʼoj jats axi in léʼ ti exóbchij (Sant. 1:5).

Ka jilaʼ abal an Biblia ti tólmiy ka jalkʼuy a ejatal. «In káwintal a Dios tu lej ejatlinchal ani tu tsáplinchal i ichích» (Heb. 4:12). Tam ki ajiy an Biblia, neʼets ki exóbnaʼ jantʼoj ít axi neʼets tu ku lej tólmiy ti ejatal, pero axéʼ neʼets ki bajuw max ki jilaʼ abal a Jehová tu ku exóbchij.

Ki kʼákʼnanchij a Jehová kom Jajáʼ tu exóbchal lej alwaʼ. Patal an exobchixtaláb axi a Jehová tu pidhál pel ejtíl «jun i kʼapnél axi lej kujuw» (Is. 25:6). Lej alwaʼ ki exóbnaʼ patal an exobintaláb belits max yab patal i lej kʼijidhnál. Max ka tʼajaʼ antsanáʼ neʼets ti lej tólmiy ani neʼets ka kʼijidhnaʼ ti exóbal.