U támkunal ban Zoom

Al yan i bichow, an éyalchik yab in jilámal abal ka támkun an epchalchik abal yab ka dha’unchik k’al an yaw’láts. An ólchixchik u lej belkax k’al an éyal pero yab i le’ ki jila’ tu támkunal. Jaxtám an tamkuntalábchik in eyendhál i aplicaciones jant’ini’ an zoom abal ki t’aja’ an tamkuntaláb.

Abal yab ki jila’ tu támkunal an kwenél i ók’nom in tsu’uw alwa’ abal ki éyendha’ jun i we’ an tumín axi u bináb abal kin ts’a’iy i paquetes de zoom abal kin éyendha’ an tamkuntalábchik. Axé’ in lej tólmiy an tamkuntalábchik axi yab in éjtowalak kin jalbiy an paquetes de zoom axi in jalbíl 400 pesos ta its’. Axé’chik xi tamkuntaláb in eyendhálak i zoom axi yab in jalbiyalak pero yab in éjtowalak ka otsits yan i atiklábchik, kom yabak lej alwa’. Patal an tamkuntalábchik axi in éyendhal an zoom axi in jálbiy an organización, xowé’ in éjtowal ka otsits yan i atikláb ani in éjtowal abal yab kin bats’uw jita’ yab in exlál. Xowé’ wat’adh 65 mil i tamkuntaláb ani al wat’adh 170 i bichow in eyendhálchik axé’ xi cuenta.

An tamkuntaláb Kairagi axi ban bichow Manado (ban kwénchal Célebes Septentrional, Indonesia) in támkuy an cuenta k’al an Zoom k’al axi in jálbiyal an organización. An epchal Hadi Santoso in ulal: «An epchalchik axi yab in lej ujnam kin éyendha’ an Zoom, xowé’ in éjtowalchik kin alwa’ éyendha’ pel kom u palel junkats i kalel ti tamkuntaláb».

A Léster Jijon, jun i ók’nom axi ti tamkuntaláb Guayacanes Oeste axi ti Guayakil Ecuador, in uluw: «Kom an epchalchik yab in kwa’al yan i tumín yab ne’etsakchik kin éjtow kin jálbiy abal kin ko’oy an Zoom. Ju’táj ne’tsak ka k’wajiy ti tamkuntaláb patalchik an epchal ban Zoom. Xowé’ k’ak’namal k’al jawa’ in t’ajámal an Organización in éjtow ka paley yan i epchalchik ti tamkuntaláb ban Zoom. Xowé’ i éjtowal ki kaniy más i atiklábchik ka paley ban tamkuntaláb».

A Johnson Mwanza, jun i epchal axi ti tamkuntaláb Norte Ngwerere axi ban bichow Luzaka ti Zambia in dhucha’: «Yaníl yan i epchalchik tu uchamal: ‹An zoom axi in jálbiyal an organización yab expidh in t’ajál abal ki ats’a’ más utat an epchalchik, jayej i ejtowal ki ats’a’ abal tu lej let’endhál ani tu k’anidhál a Jehová›».

An tumín abal ka jálbiyat an Zoom, kaldhámej ban donaciones axi in binamal an epchalchik, jaxtám lej exbadh ki bina’ an tumín abal ka eyendháj ju’táj ti más wa’ats i yejenchixtaláb. Yan k’al axé’ xi tumín u k’wajbáj ban página donate.jw.org. K’ak’namal yan k’al an ts’ejwalixtaláb k’al an tumín axi a binálchik axi u eynal ju’táj más u yejencháb tin puwél an tsabál (2 Corintios 8:14).