Patal i bátsʼuwal i alwataláb kʼal an Escuela de Galaad

Támub ti támub, an epchalchik axi u tʼojnal jantʼiniʼ i siervos especiales de tiempo completo, u kʼalel ban Escuela Bíblica de Galaad de la Watchtower, axéʼ u tʼajnal ban Centro Educativo de la Watchtower axi kʼwajat ti Patterson (Nueva York).a Axéʼ xi Escuela in tólmiyal an epchalchik abal kin putuw más alwaʼ kʼal an tʼojláb axi bijchinének. Jawaʼ tanáʼ in exobnál, in eyendhál abal kin tólmiy an epchalchik axi ti tamkuntaláb o al an sucursal juʼtáj ti ka aban.

Kʼal axéʼ xi Escuela u kaniyáb i epchalchik axi tin puwél an tsabál. Jun i tʼiplab, al an clase 147 axi tʼajan ti 2019, waʼatsak 56 i epchal axi talak al 29 i pakdhaʼ bichow. An epchalchik axi u kʼalel al axéʼ xi escuela, pelakits i betelitas, i misioneros, i precursores especiales ani i ókʼnomchik axi ban circuito.

Kʼal yan i kʼij ókʼxidh, u tujélits ka tʼojojyat axéʼ xi escuela. Jun i tʼiplab, an Departamento de Viajes axi kʼwajat ban Central Mundial in tsʼaʼyal an boletos abal an epchalchik axi neʼets ka kʼalej. Abal an clase 147, tsʼaʼiychat i boletos abal an epchalchik axi talak owél. Junchik i boleto in jalbíl 1.075 i dólares. An epchalchik axi ban islas Salomón in yéjenchij tseʼ i boletos abal ka kʼalej ti Patterson, ani ox abal ka wichiy tin kʼimáʼ. In owél pel watʼadh 35.400 kilómetros. Axéʼ xi boletos kalej ti 2.300 i dólares. An epchalchik axi ban Departamento de Viajes, in kwaʼal jun i programa kʼal axi tu ólchinal juʼtáj in éjtowal kin elaʼ i boletos axi yab lej jálbidh. Axéʼ xi programa in áynanchal kin aliy al i semanas o i meses, an boletos axi yab lej jálbidh. An Departamento de Viajes jayej in eyendhál an puntos axi u pidhnal tam in tsʼaʼyalchik an boletos.

Talchik i epchal axi neʼets ka kʼalej ban clase, in yéjenchal an visa abal ka jilan ka otsits ti Estados Unidos. An epchalchik axi ban Departamento de Asuntos Legales, in tólmiyal an epchalchik abal kin kaldhaʼ an visa. Abal ka tsʼejkanchat axéʼ xi úw jun i atikláb, kwaʼal ka jálbiyat 510 i dólares.

¿Jantʼoj tam alwataláb i bátsʼuwal, tam an epchalchik ka kʼalej ban Escuela de Galaad? A Hendra Gunawan pel jun i ókʼnom axi u tólmix al jun i tamkuntaláb axi kʼwajat ban Sureste Asiático, tanáʼ ulits jun i tomkinél axi kʼalej ban Escuela de Galaad. Jajáʼ in ulal: «Ti biyál, tejéʼ ban tamkuntaláb yab waʼatsak i precursores regulares. Pero tam ti ulits axéʼ xi tomkinél, in lej kanatbédhaʼ an epchalchik, ma in léʼnaʼ kin tʼajaʼchik ti precursores. Ma jun i epchal kʼalej ban Escuela abal an Ólchixchik».

A Sergio Panjaitan u tólmix al an sucursal Sureste Asiático, tanáʼ jayej u tólmix talchik i epchal axi kʼalej ban Escuela de Galaad. Jajáʼ in ulal: «An exóbchixtaláb axi in bátsʼuwalchik ban Escuela de Galaad yab expidh u tólmiyab jajáʼ, jayej, tu lej tólmiyal wawaʼ. ¡In exóbnaʼchik yan jantʼoj! Pero bélits antsanáʼ, jajáʼchik yab in tsálpayal abal más witʼadh. Ani tu ólchal jawaʼ in exóbnaʼchik. ¡Axéʼ tu lej kanatbedhál ani jayej in kanatbedhál axi kʼeʼat!»

¿Juʼtáj tu kalel an tumín abal ka tʼajan patal axéʼ? U eyendháb an donaciones axi u bináb tin puwél an tsabál. Axéʼ u bináb ti donate.jw.org. I lej kʼakʼnál an donaciones axi a binálchik kʼal a kulbétal. Antsanáʼ u ejtowáb ka tʼajan axéʼ xi Escuela, juʼtáj u kaniyáb i epchalchik axi tin puwél an tsabál.