Ka belka’ a tátajchik játs ejtíl max ets’ey a jálbiyal a tok’. Max ka bélka’chik ets’ey, jajáchik ne’ets ti bélchij jawa’ ka uluw ani ne’ets ti jílchij ka t’aja’ jawa’ a tsálpayal.
ABAL AN TSÁKAMCHIK
10. Ka putuw k’al a uchbíl
¿JANT’INI’?
Jun i atikláb axi in pútuwal k’al in uchbíl in tsápnanchal ka xe’tsin tekedh, kin putuw k’al in káwintal ani yab u janamkaw. An atikláb axi antsaná’ in éy u k’ak’náb k’al in tátajchik ani in ja’úb ani k’al axi tu t’ojondháb.
¿JALE’ TI LEJ EXBADH?
Abal a tátajchik ti jílchij ka t’aja’ jawa’ a tsálpayal, kwa’al ka tejwamédha’ abal ets’ey a pútuwal k’al a uchbíl.
«Max a le’ abal a tátajchik kin t’aja’ ti kwéntaj abal a éjtowalits ka putuw k’al a uchbíl, kwa’al ka tejwamédha’ ets’ey ani yab expidh tam it k’wajat k’al jajá’chik» (Sarahi).
JAWA’ IN ULAL AN BIBLIA: «Ka áynanchij ka tejwamédha’ abal k’wajat a jálk’uyal jant’ini’ a ey» (2 Corintios 13:5).
¿JANT’OJ A ÉJTOWAL KA T’AJA’?
An tsálapchik axi k’wajat tejé’ alál ne’ets ti tólmiy ka tejwamédhanchij a tátajchik abal k’wajat a pútuwal k’al a uchbíl.
Ka uluw an chubaxtaláb. Max it janamkaw, yabáts ne’ets kit belchin jawa’ ka uluw. Pero max ets’ey ka uluw an chubaxtaláb bélits max it uk’pinének, axi k’e’at ne’ets kin bela’ jawa’ ka uluw.
«Jawa’ ne’ets kin t’aja’ abal axi k’e’atchik ti k’ak’na’, játs max ka uluw an chubaxtaláb bélits max awil kit jólbiyat» (Caiman).
JAWA’ IN ULAL AN BIBLIA: «I lej leyej ki t’ajayej expidh jawa’ alwa’» (Hebreos 13:18).
Ka putuw k’al jawa’ it kónchinal. Al jun i encuesta axi t’ajan ti Estados Unidos, t’ajan ti kwéntaj abal jawa’ más u kónchinal jun i atikláb axi k’wajat in áliyal jun i t’ojláb, játs kin putuw k’al in uchbíl. Max xowé’ ka putuw k’al jawa’ i kónchinal, tam kit puwey ne’ets ti lej tólmiy.
«U tátajchik in t’ajál ti kwéntaj tam u t’ajál k’al u kulbetal jawa’ in kónchinal. Tam kin tsu’uwchik abal u pútuwal k’al u uchbíl, más tin jilál ku t’aja’ jawa’ naná’ u tsálpayal» (Sarah).
JAWA’ IN ULAL AN BIBLIA: «U lej belál abal ne’ets ti kin t’ajchij an alwataláb jawa’ naná’ tu konchij» (Filemón 21).
Ka ko’oy i k’aya’taláb. Patal i éjtowal ki t’aja’ ti kwéntaj tam jun i atikláb k’wajat ti páyel, pero jawa’ t’ojláb ki tsu’uw játs max in jalk’uyámal jant’ini’ in ey.
«Max a lé’ abal a tátajchik ani k’e’at i atikláb ti belchij jawa’ a ulal, kwa’al ka tejwamédha’ yaníl abal a pútuwalits k’al a uchbíl» (Brandon).
JAWA’ IN ULAL AN BIBLIA: «Ka tejwamédhachik i k’aya’taláb» (Colosenses 3:12).