A Dios tu kaniyal ki tʼajaʼ ti jaʼúb

A Dios in léʼ kin tʼajaʼ ti jaʼúb. ¿A exlálak tatáʼ abal a ejtowal ka tʼajaʼ ta jaʼúb a Dios? Ti biyál kʼwajiy jún i inik in bij Abrahán axi bijiyat tin jaʼúb a Dios (Santiago 2:23). An Biblia in ólnál tin kwéntaj kʼeʼat i atiklábchik axi in tʼajaʼ tin jaʼúb a Dios ani in batsʼuw yán i lablixtaláb. Xóʼ ta kʼicháj waʼats yán i atiklábchik tin puwél an Tsabál axi in bajúmal kin tʼajaʼ tin jaʼúb a Dios. ¡Tatáʼ aniyej a ejtowal ka tʼajaʼ!

A Dios pél an más alwaʼ jaʼúb axi a ejtowal ka koʼoy. A Dios etsʼey in lábliyal axi putudh (Salmo 18:25). Más alwaʼ ka tʼajaʼ ta jaʼúb a Dios kej ka koʼoy yán i tumín. Tam u tsémel jún i atikláb axi in kwaʼal yán i tumín, kʼeʼat in kʼálnál jawaʼ kin jilaʼ. Pero axi kin tʼajaʼ tin jaʼúb a Dios in kwaʼal jún i kʼaláb axi kʼal ni jitaʼ in ejtowal ka tixkʼanchat (Mateo 6:19).

Yab patal neʼets ka kulbéj max tatáʼ ka exobnaʼ an Biblia. Walám ma a yanél o jaʼúb ka tsákuy o ti kʼwiyaʼ (Mateo 10:36, 37). Max jitaʼ ti telaʼ o ti jikʼédhaʼ, ka konówiy ta kwetémtal: «¿Jitaʼ u léʼ ku kulbedhaʼ, an inikchik o a Dios?». Ka tsalpay kʼal axéʼ: max jitaʼ ti uchaʼ ka jilaʼ tit kʼapul, ¿walám ka tʼajaʼ ti kwéntaj? Imbáj, ¿yab aníts? Kom wawáʼ i yéjenchal ku kʼapúts abal ku kʼwajiy ejat. Pero a Dios in ejtowal kin tʼajaʼ ku kʼwajiy abal etsʼey. Jaxtám, ka aynanchij tit exóbal, yab ka tʼajaʼ ti kwéntaj jawaʼ in ulal axi más, antsanáʼ neʼets ka bajuw ka tʼajaʼ ta jaʼúb a Dios (Juan 17:3).