A Job kʼwajiy putudh

¿In éjtowal in tʼojnálil a Dios ka kʼwajiy putudh tam in watʼál i kʼibataláb, bélits abal tejwaʼ abal yab neʼets ka tolmiyat kʼal jawaʼ kʼwajat in tʼajál? Jun i inik axi in bij Job koʼoy kin tametnaʼ patal axéʼ. Ki tsuʼuw jantʼoj koʼoy kin tʼajaʼ.

A Job pelak in yanél a Abrahán, axi u kʼwajilak ban bichow axi xóʼ u exlab jantʼiniʼ Arabia. Al an kʼij tam ti an israelitas u kʼwajílak ti Egipto. Jun a kʼicháj, a Jehová in kwaʼalak jun i tamkuntaláb kʼal an ángeles ani tanáʼ jayej kʼwajatak a Satanás kʼal patal an ángeles, a Jehová kawin tin kwéntaj in putudh a Job, antsanáʼ in tejwamédhaʼ abal in lej belálak kʼal a Job.

A Satanás kawin tin kwéntaj a Job, abal in kʼakʼnálak a Dios kom lej labliyábak ani u beletnábak. Ani in uluw: «Max kin kʼibaʼ patal, neʼets kin jilaʼ kin tʼojonchij a Jehová». A Jehová in jilaʼ abal an tenekláb kin tixkʼanchij patal jawaʼ in kwaʼalak a Job, jayej patal in tsakámil ani jajáʼ ijkan ti yaʼúl. Kom a Job yab in exlálak jitaʼ in tʼajálak ka watʼey nixéʼ xi kʼibataláb, yab in éjtowalak kin exbay jaleʼ ti a Dios in jilalák ka watʼey patal nixéʼ. Bélits antsanáʼ yab jaykʼiʼ in jilaʼ kin kʼakʼnaʼ a Jehová.

Talbél, tsaʼbiyat a Job kʼal ox in jaʼúb kʼal axi ti alwaʼ telan. Ban libro in kʼál a Job, i elál patal jawaʼ uchan. In uchaʼchik abal kʼwajat ti odhnab kʼal a Dios kom jajáʼ in kwaʼalak yan i walábtaláb. Nixéʼ pel jun i janamtaláb. Ani ma in bajuwchik kin uluw abal a Dios yab in tʼajál ti kwéntaj in tʼojnálil ani abal yab in belál kʼal jajáʼchik. Pero a Job yab in belaʼ nixéʼ xi kaw ani in uluw abal neʼets ka kʼwajiy putudh kʼal a Dios, ma tam ka tsemets.

A Job ukʼpin, kom kʼadhpich tʼeʼpin abal yab ka lej odhnáj tin baʼ. A Elihú axi lej kwitólej in kʼwiyaʼ a Job, kom expidh u tʼeʼpinalak abal kin kʼaniy in kwetem báʼ ani yab in bij a Jehová. Ani jayej in kʼwiyaʼ axi in ulalakchik abal pel in jaʼúb a Job.

Ani a Job jayej kʼwiyan kʼal a Jehová. Ani in tʼajchij kin tsuʼuw patal in tʼajbilábil, in exobchij abal an inik lej tsipil max kin jumbiy kʼal patal jawaʼ in tsʼejkámal a Dios. A Job in tejwamédhaʼ i tsaʼataláb ani in batsʼuw an kʼwiyaxtaláb. Kom a Jehová «lej kʼanidhom ani yajnanchix» in jeldhaʼ ani in pidhaʼ más kʼal jawaʼ in kwaʼalak ani in wichbanchij laju in tsakámil (Santiago 5:11). In kuxudhtal a Job in tejwamédhaʼ jun i alwaʼ tokʼtsixtaláb kʼal jawaʼ in uluw a Satanás. Ani in tejwamédhaʼ abal an atiklábchik in éjtowal ka kʼwajiy putudh kʼal a Dios bélits max kin watʼaʼ i kʼibataláb.

​—(Kaldhach ti libro kʼal a Job.)