AJUMTALÁB 2

¿Jitaʼ játs a Dios?

1. ¿Jaleʼ ti kwaʼal ki kʼakʼnaʼ a Dios?

Kwaʼal ki kʼakʼnaʼ a Dios kom jajáʼ tu pidhámal i ejatal ani in tsʼejkámal patal jawaʼ waʼats. A Dios yab in koʼoy in tujtal ani yab in kwaʼal in taltal (Salmo 90:2). Jajáʼ tu ólchal an alwaʼ káw axi kʼwajat ti Biblia (1 Timoteo 1:11). Ka ajiy Revelación (Apocalipsis) 4:11.

2. ¿Jantʼiniʼ játs a Dios?

A Dios pél jún i espíritu. Jaxtám ni jún i atikláb in ejtowamal kin tsuʼuw (Juan 1:18; 4:24). Bélakits antsanáʼ, i ejtowal ki exlaʼ jantʼiniʼ játs a Dios max ki tʼajaʼ ti kwéntaj jawaʼ in tsʼejkámal. Ejtíl, an waliláb ani an wits axi waʼats in tejwamedhál abal jajáʼ tu kʼanidhál ani lej tsalpadh. In puwél an Tsabál ani an éb, in tejwamedhál abal jajáʼ in kwaʼal yán i tsápláb. Ka ajiy Romanos 1:20.

Jayej i ejtowal ki exlaʼ más a Dios max ki ajiy an Biblia. Axéʼ tu ólchal jantʼoj in kulbetnál ani jantʼoj imbáj. Tu ólchal jantʼoj in atsʼál a Dios tam an atiklábchik in tʼajál jawaʼ alwaʼ o tam u jekʼom. Ka ajiy Salmo 103:7-10.

3. ¿In kwaʼal in bij a Dios?

In bij a Dios pél Jehová, al kʼeʼat i kawintaláb, pil jayej tu uluwáb

Aníts, a Dios in kwaʼal in bij. A Jesús in uluw: «Tátaj axi kʼwajat ti éb, ka tʼokedhaʼ a bij» (Mateo 6:9, NM). A Dios u bijiyáb ti Púlik Payʼlóm, Tátaj o Ajátik, pero nixéʼ yab pél i bijláb. In lej bij a Dios pél Jehová ani antsanáʼ tu bijiyáb ti tének, pero waʼats axi in bijiyál Yavé. Al kʼeʼat i kawintaláb, pil jayej tu uluwáb. Ka ajiy Salmo 83:18 (82:19 al tálchik i Biblia).

Al yán i Biblia tixkʼámej in bij a Dios ani jaluwámej kʼal an káw: Púlik Payʼlóm o Ajátik. Pero tam ti kʼaʼálkʼij dhuchan an Biblia, an bijláb Jehová talak dhuchadh jún i siete mil veces. A Jesús etsʼey in eyendhaʼ nixéʼ xi bijláb tam tin exóbchij an atiklábchik tin kwéntaj a Dios. Ka ajiy Juan 17:26.

4. ¿Chubax tu kʼanidhál a Jehová?

Jún i tataláb ani nanaláb in beletnál in tsakámil axi kʼwajat yaˈul — Ejtíl axéʼ xi tataláb exom in tʼajál patal jawaʼ kin ejtow abal ka lejkin in tsakámil, a Dios jayej exom ti tʼojnal abal ku kʼwajiy kulbél axi taʼtál a kʼicháj

Max a Jehováʼ chubax tu kʼanidhál ¿jaleʼ tin jilál ki yajchiknaʼ? Waʼats axi in tsálpayal abal a Dios in tʼajál ki yajchiknaʼ abal kin tsuʼuw max chubax i kʼanidhál, pero nixéʼ yab chubax. Ka ajiy Santiago 1:13.

A Jehová tu jilámal ki tákuy ti kwetémtal jantʼoj i léʼ ki tʼajaʼ kʼal i ejatal. Antsanáʼ tu tejwamédhanchal abal tu kʼanidhál. Alwaʼak max patal ki eyendhaʼ i ejatal abal ki kʼakʼnaʼ a Dios ¿yab aníts? (Josué 24:15). Pero yán in takuyal kin tʼajaʼ jawaʼ yab alwaʼ ani in odhnál axi más, jaxtám ti waʼats yán i yajchiktaláb. Pero a Jehová in yajnál kin tsuʼuw patal jawaʼ kʼwajat ti watʼel. Ka ajiy Génesis 6:5, 6.

A Jehová chubax tu kʼanidhál ani in léʼ ku kʼwajiy kulbél. Jaxtám neʼets kin talabedhaʼ patal jawaʼ in tʼajál ki yajchiknaʼ. Jajáʼ in exlál lej alwaʼ jaleʼ tin jilál ki yajchiknaʼ. Biyat kwaʼal ki kuxuyej jún i wéʼ. Ti lección 8 neʼets ki exobnaʼ tin kwéntaj nixéʼ. Ka ajiy 2 Pedro 2:9 ani 3:7, 13.

5. ¿Jantʼiniʼ ti ejtowal ku útey kʼal a Dios?

I ejtowal ku útey kʼal a Dios max ki ólonchij. A Jehová tu tʼajál ti kwéntaj, jaxtám tu kaniyal ki ólonchij (Salmo 65:2; 145:18). Jayej tu pakluanchal i wálab ani in tsuʼtal jáy i tsápnanchal ki tʼajaʼ in kulbétal, bélakits abal tam junchikíl lej kʼibat ki atsʼaʼ. Wawáʼ pél u waláblom, pero i ejtowal ki tʼajaʼ ti jaʼúb a Dios. Ka ajiy Salmo 103:12-14 ani Santiago 4:8.

Kom a Jehová tu pidhámal i ejatal, kwaʼal ki kʼanidhaʼ más kej jitákits tám atikláb (Marcos 12:30). Max ka aynanchij ka exobnaʼ más tin kwéntaj jajáʼ ani ka tʼajaʼ jawaʼ ti konchal, neʼets ka tejwamedhaʼ abal chubax a kʼanidhál ani nixéʼ neʼets kin tʼajaʼ kit útey más kʼal jajáʼ. Ka ajiy 1 Timoteo 2:4 ani 1 Juan 5:3.