¿Jantʼoj in tsálpayal kin tʼajaʼ a Dios kʼal an Tsabál?

1. ¿Jaléʼ tin tsʼejkaʼ a Dios an Tsabál?

A Jehová in tsʼejkaʼ an Tsabál abal ka kʼwajiy an atiklábchik. A Adán ani a Eva tsʼejkáj abal ka kʼwajiy ti Tsabál. An ángeles tsʼejkáj abal ka kʼwajiy ti ébʼ (Job 38:4, 7). Tam ti tsʼejkáj a Adán punuwat al jún i alabél tsabál axi in bij Edén (Génesis 2:15-17). A Jehová in uchaʼ a Adán ani a Eva abal in ejtowalak ka kʼwajiychik abal etsʼey jajáʼchik ani in tsakámil axi kin koʼoyak. Ka ajiy Salmo 37:29 ani 115:16.

Pero yab patal an Tsabál alubélak, expidh ti Edén, juʼtáj ti punuwat a Adán ani a Eva. Jajáʼchik kwaʼalak kin tʼuchiy an Tsabál kʼal in tsakámil ani kʼayúm kʼayúm kin puwedhaʼ an alabél tsabál (Génesis 1:28). A Dios in tsʼejkaʼ an Tsabál abal ka kʼwajiy an atiklábchik. Jaxtám ti yab jaykʼij neʼets ka talabedháj. Ka ajiy Salmo 104:5.

2. ¿Jaleʼ tám ti xóʼ yab u kʼwajat ti jún i alabél tsabál?

Kom a Adán ani a Eva yab in belkaʼchik a Dios kaldhájchik ti Edén, an Paraíso kʼibej ani ni jitaʼ yab in ejtowamal kin tsáb tsʼejkaʼ. An Biblia in ulal abal ma ti tam, an Tsabál kʼwajat tʼuchat kʼal i atiklábchik axi pojkax (Job 9:24). Ka ajiy Génesis 3:23, 24.

Tám, ¿in ukʼchiyits a Jehová jawaʼ in tsálpayalak kin tʼajaʼ? Imbáj, kom jajáʼ játs axi in kwaʼal patal an awiltaláb ani etsʼey in putuwal jawaʼ kin uluw (Isaías 45:18). Axi taʼtál a kʼicháj, a Dios neʼets kin tʼajaʼ abal an kʼwajílomchik ka kʼwajiy al jún i Alabél tsabál anstanáʼ jantʼiniʼ tin tsálpayalak kin tʼajaʼ ma tin tujtal. Ka ajiy Salmo 37:11, 34.

3. ¿Jantʼiniʼ ti neʼets ka tsáb tsʼejkáj an Alabél tsabál?

An Alabél tsabál neʼets ka tsáb tsʼejkáj tam a Jesús kin Abatnaʼ an Tsabál. Okʼox, tolmidh kʼal an ángeles, neʼets kin talabedhaʼ ti Armagedón an atiklábchik axi yab in belkál a Dios. Talbél, a Jesús neʼets kin wikʼaʼ a Satanás mil i tamub. Pero in bichówil a Dios yab neʼets kin watʼaʼ ni jantʼoj kom a Jesús neʼets kin beletnaʼ ani kin kʼániy. Tíkʼalej tam, an kʼwajílomchik neʼets ka kʼwajiy abal etsʼey ti Alabél tsabál. Ka ajiy Revelación (Apocalipsis) 20:1-3 ani 21:3, 4.

4. ¿Jaykʼij ti neʼets ka taley an yajchiktaláb?

¿Jaykʼij ti neʼets kin talabedhaʼ a Dios an yajchiktaláb? A Jesús in bínaʼ jún i «tsuʼbixtaláb» axi neʼetsak kin tejwamedhaʼ tam kʼwajatakits utat nixéʼ xi kʼicháj. Patal an yajchiktaláb axi xóʼ i tsuʼtal, in tejwamedhál abal u kʼwajatits utat tin «taltal axéʼ xi kidháb xeʼtsintaláb». Ka ajiy Mateo 24:3, NM, 7-14, 21, 22.

A Jesús neʼets kin Abatnaʼ an Tsabál ma tiwaʼ ti éb mil i tamub. Al nixéʼ xi kʼij, neʼets kin talabedhaʼ kʼayúm kʼayúm patal an yajal axi kin koʼoyej an atiklábchik (Isaías 9:6, 7; 11:9). A Jesús jayej neʼets kin tʼajaʼ ti sumo sacerdote. Jaxtám ti neʼets kin ejtow kin paklwánchij in wálab an atiklábchik axi in kʼanidhál a Dios. Tám, a Dios tin ebál a Jesús, neʼets kin tʼajaʼ abal an atiklábchik yabáts ka yawʼláts, ka yejtselbej ni ka tsemets. Ka ajiy Isaías 25:8 ani 33:24.

5. ¿Jitaʼ neʼets ka kʼwajiy ti Alabél tsabál?

An atiklábchik axi kin belkaʼ a Dios neʼets ka kʼwajiy ti Alabél tsabál (1 Juan 2:17). A Jesús in abaʼ in aykólilchik kin aliy an atikláb axi in léʼ kin exlaʼ jantʼiniʼ ti kin tʼajaʼ in kulbétal a Dios. Xóʼ, a Jehová kʼwajat in exóbchal yán i atiklábchik abal kin ejtow ka kʼwajiy ti Alabél tsabál (Sofonías 2:3). Axéʼchik xi atikláb u múlkunal al an Atáj Juʼtáj tu Támkunal an Ólchixchik kʼal a Jehová. Tanáʼ, axi tómkidhchik in exobnál ka kʼanidháxin más ani kin beletnaʼ alwaʼ in tsakámil. Tin yanél in exobnál kin kanchij in alwáʼ patal jawaʼ a Dios tu ólchal. Ka ajiy Miqueas 4:1-4.