¿Jantʼoj a ejtowal ka tʼajaʼ max it jikʼél ani a atsʼál abal it kwetém?

Ka metʼaʼ an tsakam kwitól axi ti walekláb. Tejwaʼ abal kʼwajat kwetém ani jikʼél ¿yab aníts? ¿Tatáʼ a atsʼámal antsanáʼ?... Patal i watʼamal axéʼ. An Biblia in ólnál tin kwéntaj in tʼojnálilchik a Jehová, bélits abal in kʼanidhálak a Jehová jaye in atsʼaʼchik abal kʼwajatak kwetém ani jikʼél. Jún i tʼiplab pél a Elías. Ki exóbnaʼ jantʼoj in watʼaʼ.

In tʼajál yán i kʼij a Elías kʼwajiy ti Israel, okʼxidh ka waʼtsin a Jesús. Al nixéʼ xi kʼij an tsʼálej axi ti Israel ani in kʼimádhil yab in kʼakʼnálak a Jehová an Dios axi chubax. In bij pélak a Acab ani a Jezabel, jajáʼchik in kʼakʼnálak jún i dios axi yab chubax, a Baal. Jaxtám talchik i atikláb axi ti Israel in tujuwámalak kin kʼakʼnaʼ a Baal. An uxum tsʼálej Jezabel lej pojkaxak ani in léʼak kin tsemdhaʼ patalchik axi in kʼakʼnálak a Jehová. Ani kom a Elías in kʼakʼnálak a Jehová, ¡jaye leʼnabak ka tsemdhaʼ! ¿Jantʼoj in ejtowalak kin tʼajaʼ a Elías? ¿Ani tatáʼ, jantʼoj a tʼajámalak?...

¡A Elías kʼalej ti tsinel lej ow! Kʼalej ti an joltám tsabál ani tsinkʼon al jún i cueva. ¿Jaleʼ ti tsinkʼon?... Kom jikʼélak. Pero a Elías yab in tomnálak ka jikʼey. ¿Jaleʼ? Jajáʼ in exlálak abal neʼetsak ka tolmiyat kʼal a Dios, kom in tsuʼúmalakits in tólmixtal. Jún i tʼiplab, pél tam ti a Elías in tʼajaʼ jún i oláb, ani a Dios in tokʼtsínchij tam ti in tʼajaʼ ka ijkan i kʼamal ti tsabál. ¿Yab aníts abal a Jehová in kwaʼal yán i tsápláb? Antsanáʼ. ¡A Elías chubax in ejtowalak kin belaʼ kʼal a Jehová!

Biyat a Elías kʼwajatak al an cueva a Jehová in konówiy: «¿Jantʼoj a tʼajál tejéʼ?». Tam a Elías tokʼtsin: «Ti jaykʼiʼ waʼatsak i atiklábchik axi ti kʼakʼnálak, pero xowéʼ expidh in jilkʼonal nanáʼ. Ani in jikʼél max nanáʼ jaye kin tsemdháj». A Elías in tsálpayalak abal patal axi in kʼakʼnálak a Jehová tsemdhámejits. Pero a Jehová in uchaʼ a Elías: «Imbáj, waʼatse siete mil i atiklábchik axi bél tin kʼakʼnál, yab expidh it jilkʼonal tatáʼ. Yab kit jikʼey, kom u kwaʼal jún i tʼojláb abal tatáʼ». ¿Jantʼoj in atsʼaʼ a Elías tam ti a Dios in uchaʼ nixéʼ xi káw?... ¡In atsʼaʼ lej kulbél!

Xowéʼ ka tsalpay jawaʼ in watʼaʼ a Elías. ¿Jantʼoj i ejtowal ki exóbnaʼ?... Tam junchikíl walám ka atsʼaʼ abal it kʼwajat kwetém o it jikʼél. Pero ka tʼilaʼ, yab it kʼwajat kwetém kom a kwaʼal a jaʼubchik axi in kʼanidhál a Jehová ani jaye ti kʼanidhál tatáʼ. Ani yab ka ukʼchiy abal a Jehová in kwaʼal yán i tsápláb ani etsʼey neʼets ti tólmiy. ¿It kulbél ka exlaʼ axéʼ?...