A Timoteo in tólmiy an atiklábchik

A Timoteo pélak jún i kwitól axi in atsʼalak lej kulbél tam in tólmiyalak axi más. Etsʼey xeʼtsin lej tʼojlidh. Kʼalej al yán i bichow abal kin tólmiy an atiklábchik. ¿A léʼ abal tu ólchij más tin kwéntaj jajáʼ?...

A Timoteo yejey al an bichow axi bijidh Listra. In nánaj in bijak Eunice, ani in ách Loida. Ma tin tsakamtal, a Timoteo exobchábak tin kwéntaj a Jehová. Jaxtám, ma tin tsakamtal, a Timoteo in léʼak kin tólmiy an atiklábchik abal kin exlaʼ a Jehová.

Tam ti a Timoteo pélakits jún i kwitól, uchan kʼal a Pablo: «In neʼets ku olnaʼ an alwaʼ káw al pil i bichow. ¿A léʼ kit kʼalej kʼal nanáʼ?». Lej kulbél a Timoteo in uluw: «¡U léʼ kin kʼalej!». Jajáʼ in léʼak kin tólmiy an atiklábchik.

A Timoteo in junaʼ a Pablo ti Tesalónica, jún i bichow axi kwéntalidh ti Grecia. Abal ka ulitschik tanáʼ, koʼoychik ka beláts ow ani tálbél kʼadhiychik al jún i tan. Ani tam ti ultsitschik, in tólmiy yán i atikláb abal kin exlaʼ a Jehová. Pero junchik lej tsákuy ani ma leʼnábakchik ka odhnaʼ. Jaxtám, a Pablo ani a Timoteo in koʼoychik ka kʼalej ti ólnom al pil i bichow.

Junchik a ítsʼ tálbél, a Pablo in konchij a Timoteo abal ka wichiy ti Tesalónica. In léʼak kin exlaʼ jantʼiniʼ ti kʼwajatak an epchalchik. Pero ti Tesalónica waʼatsak junchik i atikláb axi in odhnámalak an belom. ¡A Timoteo yab kwaʼalak ka jikʼey abal ka wichiy tanáʼ! ¿Jantʼoj in tʼajaʼ a Timoteo? Jajáʼ in léʼnaʼ ka kʼalej kom kʼwajatak tʼeʼpidh kʼal jawaʼ in watʼamalak an epchalchik. Ani tam ti wichiy in chiʼdhaʼ i alwaʼ olchixtaláb abal a Pablo. ¡An epchalchik axi ti Tesalónica bél in tʼójonchal a Jehová!

A Timoteo in tʼojonchij a Jehová yán i tamub junax kʼal a Pablo. Jaxtám, a Pablo in dhuchaʼ tin kwéntaj a Timoteo: «Neʼets ku abaʼ a Timoteo abal kin tólmiy an epchalchik. Ni jitaʼ yab waʼats ejtíl jajáʼ. Jajáʼ in kʼanidhál a Jehová ani jaye in léʼ kin tólmiy an atiklábchik».

Tatáʼ jaye a kʼanidhál axi más, ¿yab aníts? ¿A léʼ ka tólmiy an atiklábchik abal kin exlaʼ a Jehová?... Max antsanáʼ ka tʼajaʼ, neʼets ka ejtow ka koʼoy jún i ejataláb kulbél, jantʼiniʼ a Timoteo.