AJUMTALÁB 14

Ka olnaʼ an tsalapchik axi más exbadh

Hebreos 8:1

RESUMEN: Ka tólmiy kin exbay an tʼilomtaláb jitaʼchik ti atsʼál. Ka tejwamédhaʼ jantʼiniʼ tu júmbinal an tsalapchik axi más exbadh, in bij an tʼilomtaláb ani an exobintaláb axi a léʼ abal kin exbaychik.

JANTʼINIʼ KA TʼAJAʼ

Ka tsalpay jaleʼ a binál an tʼilomtaláb. Ka tsalpay jantʼoj a léʼ abal kin exbaychik kʼal an tʼilomtaláb axi a binál: walám a léʼ ka olnaʼ jantʼoj, ka tólmiy kin belaʼchik jún i exobchixtaláb, o walám expidh a léʼ ka kanatbédhaʼ. Ka tʼilaʼ axéʼ biyat it exóbal abal ka bínaʼ an tʼilomtaláb. Ka tʼajaʼ ti kwéntaj max patal an tsalapchik axi más exbadh neʼets ti tólmiy abal ka éxbayat an tʼilomtaláb.

Ka konówiy ta báʼ: «¿Jantʼoj in ejtowal kin tsalpay jitaʼ kin atsʼaʼ tam ku uluw axéʼ xi káw? ¿Jantʼoj tam konowixtaláb walám kin tʼajaʼchik?». Ka tsalpay kʼal an tokʼtsixtaláb axi neʼets ka bínaʼ ani játs ka eyendhaʼ jantʼiniʼ i tsalap axi más exbadh ban tʼilomtaláb. Antsanáʼ jitaʼchik ti atsʼál neʼets kin exbay an exobchixtaláb axi kʼwajat a binál ani neʼets kin léʼnaʼ kin punuw ti tʼajbiláb.
Ka tejwamédhaʼ an tsalap in kʼál an tʼilomtaláb. Tin nakél an tʼilomtaláb ka eyendhaʼ pílchik i káw abal ka olnaʼ wilkʼidh an tsalap in kʼál an tʼilomtaláb.
Ka olnaʼ an tsalapchik axi más exbadh kʼal i káw axi ka éxbayat dhubat. An tsalapchik axi exbadh kwaʼal ka kʼwajiy júnkudh kʼal in tsalap an tʼilomtaláb ani ka wilkʼaʼ ban kʼij axi bíjidhits. Yab ka eyendhaʼ kʼeʼat i tsalap axi yab kwaʼal kin tsuʼuw kʼal an tʼilomtaláb. Ka olnaʼ jawa játs an tsalapchik axi más exbadh ani yab ka eyendhaʼ yan. Okʼxidh ka olnaʼ kʼeʼat i tsalap axi exbadh ka wéʼ koydhaʼ a káwintal ani ka tejwamédhaʼ abal neʼets ka olnaʼ kʼeʼat i tsalap.

A ejtowal ka olnaʼ an tsalapchik axi más exbadh tam ka tujuw an tʼilomtaláb abal jitaʼ ti atsʼál kin exlaʼ jawaʼ a léʼ ka ólchij, jayej ka tsáb olnaʼ tin taltal abal yabchik kin ukʼchiy.