AJUMTALÁB 14
¿Jantʼoj i tomnál ki tʼajaʼ abal ki kʼakʼnaʼ a Dios jantʼiniʼ tin tomnál?
Jantʼiniʼ i exóbnaʼits, a Dios yab in bátsʼuwal patal an kʼakʼnaxtaláb. Pero max ki kʼakʼnaʼ jantʼiniʼ Jajáʼ in kónoyal i éjtowal ki kulbédhaʼ. ¿Jawaʼ játs «an lej kʼakʼnaxtaláb» o belomtaláb, axi a Dios in bátsʼuwal? (Santiago 1:27; nota). Ki tsuʼuw jantʼoj tu exóbchal an Biblia.
1. ¿Juʼtáj ti neʼets ki elaʼ jantʼiniʼ in tomnál ki kʼakʼnaʼ a Dios?
An Biblia játs axi tu ólchal jantʼiniʼ ki kʼakʼnaʼ a Dios. A Jesús in uchaʼ a Dios: «A káwintal pel an chubaxtaláb» (Juan 17:17). Yan i kʼakʼnaxtaláb yab in eyendhál an Biblia abal ti exóbchix, expidh in olnál in kwetém tsalápil o in tsalápil kʼeʼat i atikláb. Pero an atiklábchik axi in «jekʼonchal in abatnaxtal a Dios» yab in éjtowal kin kulbédhaʼ (ka ajiy Marcos 7:9). Wawáʼ i éjtowal ki kulbédhaʼ a Jehová tam ki belkaʼ jawaʼ tu konchal ban Biblia.
2. ¿Jantʼiniʼ in tomnál ki kʼakʼnaʼ a Jehová?
A Jehová játs axi tu tsʼejkámal, jaxtám expidh in tomnál ki kʼakʼnaʼ Jajáʼ (Apocalipsis 4:11). Jaxtám kwaʼal ki kʼanidhaʼ ani ki kʼakʼnaʼ expidh a Jehová, ani yab kwaʼal ki eyendhaʼ nibal jun i walekláb (ka ajiy Isaías 42:8).
Max ki kʼakʼnaʼ a Jehová jantʼiniʼ Jajáʼ in kónoyal, «neʼets ka kulbéj» (Romanos 12:1). Tam, kwaʼal ki tsápnanchij ki koʼoy tʼokat i ejatal. Jun i tʼiplab, jitaʼchik in kʼanidhál a Jehová in belkál jawaʼ Jajáʼ tu uchámal tin kwéntaj an tomkintaláb. Jayej, yab in odhnál in ejatal. Jaxtám yabchik u jútsʼul ani yab in wátʼkʼanchal kʼal an utsʼnél.a
3. ¿Jaleʼ ti kwaʼal ku tamkun kʼal i atiklábchik axi in belkál a Jehová, abal ki kʼakʼnaʼ?
Ban tamkuntaláb axi i tʼajál semana ti semana i puwénchal a Jehová (Salmo 111:1, 2). Tanáʼ i éjtowal ki ájtinchij a Jehová (ka ajiy Salmo 104:33). A Jehová tu konchal ku tamkun kom tu kʼanidhál ani kom in exlál abal antsanáʼ neʼets ki ejtow ku kʼwajiy abal etsʼey. Tam ku tamkun, i éjtowal ki kanatbédhaʼ axi kʼeʼatchik ani jayej wawáʼ u kanatbél.
ABAL KA EXÓBNAʼ MÁS
Ki exóbnaʼ jaleʼ ti a Jehová yab in kulbetnál ki eyendhaʼ i walekláb abal ki kʼakʼnaʼ. Ki tsuʼuw jantʼiniʼ a Jehová tu konchal abal ki kʼakʼnaʼ.
4. Yab tekedh ki eyendhaʼ i walekláb abal ki kʼakʼnaʼ a Jehová
¿Jaleʼ i exlál abal a Jehová yab in kulbetnál ki eyendhaʼ i walekláb? Ka tsuʼuwchik an VIDEO ani ka tsálpaychik kʼal axéʼ:
¿Jantʼoj in atsʼaʼ a Jehová tam ti an israelitas in eyendhaʼ i walekláb abal ka kʼakʼnáj?
Yan i atikláb in tsálpayal abal in yéjenchal kin eyendhaʼ i walekláb abal kin atsʼaʼ abal kʼwajat ti utel kʼal a Dios. Pero, ¿yab walám kʼwajat ti owmél kʼal a Dios tam kin tʼajaʼchik antsanáʼ? Ka ajiychik Éxodo 20:4-6 ani Salmo 106:35, 36, ani ka tsálpaychik kʼal axéʼ:
¿Jantʼoj tam walekláb a tsuʼumal abal in lej eyendhál an atiklábchik?
¿Jantʼoj in atsʼál a Jehová tam kin tsuʼuw abal an atiklábchik in eyendhál i walekláb?
¿Jantʼoj a tsálpayal tatáʼ kʼal axéʼ?
5. Max expidh ki kʼakʼnaʼ a Jehová, yab jitaʼ neʼets kin ejtow tu ku kʼambiy
Ki exóbnaʼ abal tam i kʼakʼnál a Jehová jantʼiniʼ Jajáʼ in kónoyal, yab jitaʼ neʼets tu ku kʼambiy. Ka tsuʼuwchik an VIDEO.
Ka ajiychik Salmo 91:14 ani ka tsálpaychik kʼal axéʼ:
¿Jantʼoj in ulal a Jehová abal neʼets kin tʼajaʼ, max expidh ki kʼanidhaʼ ani ki kʼaʼknaʼ Jajáʼ?
6. Ki kʼakʼnaʼ a Jehová ti tamkuntaláb
Tam u ajat ti tamkuntaláb ani i binál i tokʼtsixtaláb, i puwénchal a Jehová ani i kanatbedhál axi kʼeʼatchik. Ka ajiychik Salmo 22:22 ani ka tsálpaychik kʼal axéʼ:
¿A kulbetnál an tokʼtsixtaláb axi u bináb ti tamkuntaláb?
¿A léʼ ka tʼojojoy jun i tokʼtsixtaláb abal ka bínaʼ ti tamkuntaláb?
7. A Jehová in léʼ abal ki tʼilchij axi kʼeʼatchik jawaʼ kʼwajat i exobnál
I éjtowal ki tʼajaʼ yan jantʼoj abal ki ólchij axi kʼeʼatchik jawaʼ i exobnámal ti Biblia. Ka ajiychik Salmo 9:1 ani 34:1, ani ka tsálpaychik kʼal axéʼ:
¿Jantʼoj a léʼ ka ólchij axi kʼeʼat kʼal jawaʼ i exobnámal ti Biblia?
JAWAʼ TALCHIK IN TSÁLPAYAL: «Yab lej exbadh jantʼiniʼ ki kʼakʼnaʼ a Dios, expidh yab ki tʼajaʼ jantʼoj axi kidháb».
¿Jantʼoj a tsálpayal tatáʼ?
JAWAʼ I EXOBNÁMAL
I kulbedhál a Jehová tam expidh i kʼakʼnál Jajáʼ, tam i puwénchal ti tamkuntaláb ani tam i tʼilchal axi kʼeʼat jawaʼ i exobnámal.
Ki tʼilaʼ jawaʼ i exóbnaʼ
¿Juʼtáj ti neʼets ki elaʼ jantʼiniʼ tin tomnál ki kʼakʼnaʼ a Dios?
¿Jaleʼ ti expidh kwaʼal ki kʼakʼnaʼ a Jehová?
¿Jaleʼ ti kwaʼal ku tamkun kʼal jitaʼchik in kʼakʼnál a Jehová?
KA EXÓBNAʼ JANTʼOJ ÍT
Ka ajiy an biografía «Xowéʼ yabáts u kʼakʼnál i walekláb», abal ka tsuʼuw jantʼiniʼ jun i mimláb in jilaʼ kin kʼakʼnaʼ i walekláb.
«Tólmiyatchik kʼal an Biblia abal kin jalkʼuy in ejatal» (La Atalaya, 1 de julio de 2011)
Ka exóbnaʼ jantʼoj a éjtowal ka tʼajaʼ abal ka bínaʼ i tokʼtsixtaláb ti tamkuntaláb.
«Ki puwénchij a Jehová ti tamkuntaláb» (La Atalaya, enero de 2019)
Ki tsuʼuw jantʼiniʼ ti tólmiyat jun i kwitól kʼal an tamkuntalábchik, bélits abal in atsʼalak lej kʼibat ka kʼalej.
Yan i atikláb in eyendhál an cruz, ¿pero walám in tomnál ki eyendhaʼ abal ki kʼakʼnaʼ a Dios?
«¿Jaleʼ ti an ólchixchik kʼal a Jehová yab in eyendhál an cruz?» (Artículo axi ti jw.org)
a Axéʼ neʼets ki exóbnaʼ al kʼeʼat i ajumtalábchik.