AJUMTALÁB 51
¿Jantʼiniʼ i éjtowal ki kulbédhaʼ a Jehová kʼal i káwintal?
A Jehová tu pidhámal jun i tsʼejwalixtaláb lej alabél: ki ejtow ku kawin. ¿Walám in tʼajál ti kwéntaj a Jehová jantʼiniʼ i eyendhál i káwintal? Aníts. (Ka ajiy Santiago 1:26). Tam, ¿jantʼoj i éjtowal ki tʼajaʼ abal ki eyendhaʼ tekedh i káwintal ani ki kulbédhaʼ a Jehová?
1. ¿Jantʼiniʼ i éjtowal ki eyendhaʼ alwaʼ i káwintal?
An Biblia in ulal: «Ki kulbédhanchij ani ki tsáplinchij in ichích axi kʼeʼat» (1 Tesalonicenses 5:11). ¿A exlál jitaʼ axi in yéjenchal ka kanatbedháj? ¿Jantʼoj a éjtowal ka tʼajaʼ abal ka tólmiy? Ka tejwamédhanchij abal a kʼanidhál. A éjtowal ka uchaʼ jantʼoj axi jajáʼ kʼwajat in tʼajál alwaʼ ani tatáʼ a kulbetnál. ¿A tʼilál jun i texto axi ti Biblia axi a éjtowal ka eyendhaʼ abal ka kanatbédhaʼ? Waʼats yan, ani tatáʼ a éjtowal ka takuy jun. Jayej ka lej tʼajaʼ ti kwéntaj jantʼiniʼ ti neʼets ka uchaʼ. Jaxtám etsʼey kit kawin kʼal i kʼayaʼtaláb ani kʼal i kʼanidhomtaláb (Proverbios 15:1).
2. ¿Jantʼiniʼ ti yab in tomnál ku kawin?
An Biblia in ulal: «Ni jun i kaw yab ka wiʼkómnaʼ axi kidháb» (ka ajiy Efesios 4:29). Jaxtám yab i ulal i kidháb kaw nibal i ulal i alkʼidh kaw abal ki ódhnaʼ axi kʼeʼat. Jayej, yab i búkʼuwal i kaw axi yab exbadh, nibal i kawíliyal axi kʼeʼat (ka ajiy Proverbios 16:28).
3. ¿Jantʼoj neʼets tu ku tólmiy abal etsʼey ku kawin tekedh?
Jawaʼ ki uluw in tejwamedhál jawaʼ kʼwajat i tsálpayal ani jawaʼ i atsʼál (Lucas 6:45). Jaxtám kwaʼal ki ujnaʼ ki tsalpay expidh kʼal jawaʼ chubax, jawaʼ tekedh, jawaʼ bolidh, jawaʼ tʼokat, jawaʼ wínat alwaʼ ani kʼal jawaʼ in kulbetnál a Dios (Filipenses 4:8). Abal ka kʼwajiy antsanáʼ i tsalápil, kwaʼal ki takuy alwaʼ kʼal jantʼoj tu kʼijidhbél ani jitaʼchik i jaʼubnál (Proverbios 13:20). Jayej kwaʼal ki lej tsalpay jantʼoj neʼets ki uluw. Ka tsalpay jantʼiniʼ neʼets kin atsʼaʼ axi kʼeʼat kʼal jawaʼ tatáʼ a léʼ ka uluw. An Biblia in ulal: «An kaw axi yab alwaʼ tsalpadh u yajbedhax jantʼiniʼ jun i nakat kutsíl, pero in káwintal jitaʼ tsalpadh pel jantʼiniʼ i ilal» (Proverbios 12:18).
ABAL KA EXÓBNAʼ MÁS
Ka tsuʼuw jantʼiniʼ in tomnál ku kawin abal ki kulbédhaʼ a Jehová ani ki kanatbédhaʼ axi más.
4. Ka tʼajaʼ ti kwéntaj jantʼoj neʼets ka uluw
Patal i ulumal jantʼoj axi talbél i yajnál (Santiago 3:2). Ka ajiychik Gálatas 5:22, 23 ani ka tsálpaychik kʼal axéʼ:
¿Jantʼoj kʼal axi in ulal an texto, a yéjenchal ka konchij a Jehová abal ka exlaʼ jantʼiniʼ kit kawin? ¿Jantʼiniʼ neʼets ti tólmiy axéʼ?
Ka ajiychik 1 Corintios 15:33 ani ka tsálpaychik kʼal axéʼ:
¿In éjtowal ti ódhnaʼ o ti tólmiy a junkuwál, ani kʼal jawaʼ it kʼijidhbél? ¿Jantʼiniʼ?
¿Jantʼoj in éjtowal kin tʼajaʼ abal ku kawin tekedh, o abal ku kawin kidháb?
Ka ajiychik Eclesiastés 3:1, 7 ani ka tsálpaychik kʼal axéʼ:
¿Jaykʼiʼ ti yab in tomnál ku kawin, o ki wéʼ aychij max neʼets ki uluw jantʼoj?
5. Ku kawin alwaʼ tin kwéntaj axi kʼeʼat
¿Jantʼoj i éjtowal ki tʼajaʼ abal yab ki uluw i kaw axi kin yajnaʼ axi kʼeʼatchik? Ka tsuʼuwchik an VIDEO ani ka tʼilaʼchik jawaʼ a tsuʼuw:
¿Jaleʼ ti an epchal in léʼak kin jalkʼuy jantʼiniʼ u kaw?
¿Jantʼoj in tʼajaʼ?
Ka ajiychik Eclesiastés 7:16 ani ka tsálpaychik kʼal axéʼ:
¿Jantʼoj kwaʼal ki tʼilaʼ tam ki atsʼaʼ abal i léʼ ki kawíliy jitaʼ?
Ka ajiychik Eclesiastés 7:21, 22 ani ka tsálpaychik kʼal axéʼ:
¿Jantʼiniʼ neʼets ti tólmiy axéʼ xi versículo tam jitakits kin uluw jantʼoj tin kwéntaj tatáʼ?
6. Ka tawnaʼ kʼal i kʼanidhomtaláb a yanél
A Jehová in léʼ abal ki tʼilmay i yanél kʼal i kʼanidhomtaláb. Ka tsuʼuwchik an VIDEO ani ka tʼilaʼchik jawaʼ a tsuʼuw:
¿Jantʼoj neʼets ti tólmiy abal ka tawnaʼ kʼal i kʼanidhomtaláb a yanél?
Ka ajiychik Efesios 4:31, 32 ani ka tsálpaychik kʼal axéʼ:
¿Jantʼiniʼ kwaʼal ku kawin kʼal i yanél, abal ku kʼwajiy junkudh?
A Jehová in olnálak jawaʼ in atsʼalak kʼal in tsakámil, a Jesús. Ka ajiychik Mateo 17:5 ani ka tsálpaychik kʼal axéʼ:
¿Jantʼiniʼ a éjtowal ka nítsʼbiy a Jehová tam it tʼilom kʼal a yanél?
Ka tsápnanchij ka uchaʼ axi kʼeʼat patal jawaʼ in tʼajál alwaʼ.
JAWAʼ TALCHIK IN TSÁLPAYAL: «Nanáʼ antsanáʼits in kaw, max axi kʼeʼat yab in kulbetnál, jajáʼits in wálab».
¿Walám tekedh ki tsalpay antsanáʼ? ¿Jaleʼ?
JAWAʼ I EXOBNÁMAL
An kaw u lej ódhnax, jaxtám ti lej exbadh ki tsalpay jantʼoj neʼets ki uluw, jaykʼiʼ tin neʼets ki uluw ani jantʼiniʼ ti neʼets ki uluw.
Ki tʼilaʼ jawaʼ i exóbnaʼ
¿Jantʼiniʼ a éjtowal ka eyendhaʼ a káwintal abal ka tólmiy axi kʼeʼat?
¿Jawaʼ játs an kaw axi a léʼ ka jilaʼ ka uluw?
¿Jantʼoj neʼets tu ku tólmiy abal etsʼey ku kawin tekedh ani kʼal i kʼanidhomtaláb?
KA EXÓBNAʼ JANTʼOJ ÍT
¿Jantʼoj neʼets tu ku tólmiy abal ku kawin tekedh?
Ka tsuʼuw jantʼoj a éjtowal ka tʼajaʼ abal yab ka eyendhaʼ i kaw axi kidháb.
«¿Jaleʼ ti yab tekedh ki eyendhaʼ i kidháb kaw?» (Artículo axi ti jw.org)
Ka tsuʼuw jantʼoj a éjtowal ka tʼajaʼ abal yab ka bukʼuw i alkʼidh kaw.
Ka tsuʼuw jantʼiniʼ ti tólmiyat kʼal a Jehová jun i inik abal kin jilaʼ ti atʼaxkaw.
«In tujey ku tsalpay jantʼiniʼ ti kʼwajat u eyendhál u ejatal» (La Atalaya, 1 de agosto de 2013)