Ka tejwamédhaʼ i iniktaláb

Jawaʼ in tʼajaʼ a Jesús

VIDEO: A Jesús in ólchal an alwaʼ kaw a Zaqueo

1. Ka tsuʼuw an VIDEO o ka ajiy Lucas 19:​1-7. Ani talbél ka tʼajaʼ ti kwéntaj axéʼ xi konowixtalábchik:

1. ¿Jaleʼ ti talchik i atikláb yab in junkuwalak a Zaqueo?

2. ¿Jaleʼ ti a Jesús belits antsanáʼ in tʼilmay?

¿Jantʼoj tu exóbchal in tʼiplabil a Jesús?

2. I yejenchal i iniktaláb abal ki ejtow ki ólchij an alwaʼ kaw patal an atiklábchik.

Ka nitsʼbiy a Jesús

3. Ka lej belaʼ kʼal a Jehová. A Jehová in pidhaʼ an tʼokat tsapláb a Jesús abal ka olnomáts ani jayej in éjtowal ti pidhaʼ tatáʼ (Mat. 10:​19, 20; Luc. 4:18). Ka konchij a Jehová ti tólmiy abal ka ejtow ka tʼilmay an atiklábchik axi walám in leʼ ti jikʼedhaʼ (Hech. 4:29).

4. Yab ka kʼeʼatnaʼ an atiklábchik. Junchikíl walám kʼibat i atsʼál ki tawnaʼ an atiklábchik max ki metʼaʼ jantʼiniʼ ti xeʼets, max in kwaʼal i tumín o max in kwaʼal in ey, jantʼiniʼ tu kʼwajíl o jantʼoj in belál. Pero ka tʼilaʼ:

1. A Jehová ani a Jesús in exlál jantʼoj in kwaʼal tin ichích an atikláb, pero wawáʼ imbáj.

2. Patal in éjtowal ka utey kʼal a Jehová ani kin batsʼuw i alwaʼtaláb.

5. Ka tejwamédhaʼ i iniktaláb, pero jayej ka tʼajaʼ ti kwéntaj (Mat. 10:16). Ka tejwamédhaʼ i kʼakʼnaxtaláb ani yab kit tsakuy. Max an atikláb yab in leʼ ti otsʼowiy o a atsʼál it weʼ jikʼél yabáts ka aynanchij tit tʼilom, pero kʼal a kawintal ka tejwamédhaʼ i kʼakʼnaxtaláb (Prov. 17:14).