An chubaxtaláb axi in éjtowal tu ku walkaʼ

Jun a kʼicháj ti Jerusalén, a Jesús in olnaʼ tin kwéntaj in Tátaj Jehová, ani in olnaʼ abal jitaʼ in okʼnál an belomtaláb in olnaʼ i janamtaláb (Juan 8:​12-30). Kʼal jawaʼ in olnaʼ tu tejwamedhanchal abal kwaʼal ki lej tʼajaʼ ti kwéntaj jawaʼ u olnáb tin kwéntaj a Dios. Jajáʼ in uluw: «Max ka tʼayat bínaʼ a xutsun kʼal jawaʼ nanáʼ u olnál pel i lej chubax exobal kʼal nanáʼ, neʼets ka exlaʼ an chubaxtaláb ani jats neʼets ti walkaʼ» (Juan 8:​31, 32).

Kʼal an kaw «ka tʼayat bínaʼ a xutsun kʼal an kaw jawaʼ nanáʼ u olnál, in leʼ kin uluw abal lej exbadh ki tʼajaʼ ti kwéntaj max jawaʼ i belál chubax o yab chubax. Tam kit uchan jantʼoj tin kwéntaj a Dios, ka konowiʼ ta baʼ: «¿Junat kʼal jawaʼ in olnaʼ a Jesús ani kʼal jawaʼ in ulal an Biblia?». Ka tʼajaʼ jantʼiniʼ an atiklábchik in otsʼowiʼ an abatwalej Pablo ka aliy ti Biblia max chubax jawaʼ it olchinal (Hechos 17:11).

Jats jawaʼ in tʼajaʼ a Marco, a Rosa ani a Raimun­da, axi i tʼilaʼits okʼxidh. Jajáʼchik in exobnaʼ an Biblia kʼal an ólchixchik kʼal a Jehová, ¿jantʼoj in exobnaʼchik?

Marco: «An ólchix axi tu tsaʼbiyalak in eyendhalak an Biblia abal tu ku tokʼtsinchij an konowixtaláb axi i tʼajchalak. Kʼayúm i kʼanidhaʼ a Jehová ani jayej tsapikméj i tomkintal».

Rosa: «U tsalpayalak abal an Biblia pel in tsalapil i inik axi in leʼak tu ku exóbchij jitaʼ jats a Dios. Pero talbél u tʼajaʼ ti kwéntaj abal yab antsanáʼ kom tin tokʼtsinchij patal an konowixtaláb axi u kwaʼalak. Xowéʼ u tʼajámal ti kwéntaj abal a Jehová chubax ejat ani abal u éjtowal ku belaʼ kʼal Jajáʼ».

Raimunda: «U konchij a dios abal ti kin tolmiy ku exlaʼ, u tomkil ani nanáʼ i tujchij ki exobnaʼ an Biblia, i exlaʼ an chubaxtaláb tin kwéntaj a Jehová».

An Biblia yab expidh tu ólchal an chubaxtaláb tin kwéntaj a Dios, jayej tu ólchal jantʼiniʼ jats in ey a Jehová. Jayej tu ólchal an alwaʼtaláb axi tu pidhámal kom jajáʼ lej alwaʼ inik (1 Corintios 2:12). ¿Jaleʼ ti yab a exobnál ta kwetemtal an Biblia abal ka exlaʼ jantʼoj in tsalpayal kin tʼajaʼ a Dios al an kʼicháj axi taʼtál abal kʼal wawáʼ? A éjtowal ka ajiy más tin kwéntaj axéʼ ti www.jw.org ban pejach «Exobchixtaláb axi kaldhach ti Biblia > Konowixtaláb tin kwéntaj an Biblia». Tanáʼ jayej a éjtowal ka konoy jun i exobintaláb kʼal an Biblia kʼal jun i ólchix kʼal a Jehová. Max ka tʼajaʼ neʼets ka tsuʼuw abal a éjtowal ka kʼanidhaʼ a Dios».