Xowé’ u ats’ál abal u éjtowal tin tólmix

JANT’INI’ U EYAK:

In wa’tsin ti Guatemala al jun i tsakam kwenchal axi in bij Acul. U yanél u kaw Ixil, jajá’chik tal k’al an mayas. Naná’ in kaw labkáw ani Ixil. Naná’ in yejey tam ti k’wajatak jun i pextaláb axi owey treinta y seis i támub. Al nixé’ xi pextaláb tsemets yan i ixiles.

Tam ti naná’ u kwa’alak tse’ i támub, u epchal axi más we’ púlik kwajatak ti ubat k’al jun i pat’ál axi u petnal. An pat’ál peten, u epchal tsemets ani naná’ in jílk’on jok’tsej. Tam, naná’ in ne’dháj al jun i atáj ju’táj tu k’wajíl axi jok’tsej, taná’ u exóbna’ ku ajiy an braille. Yab jayk’i’ tu exla’ jalé’ tin k’anchinalak ku junkuw axi k’e’at, ets’ey in xe’etsak kwetém. U lé’akits kin ayin tu k’imá’ abal ku tsu’uw u mamá, tam in aynalak in k’wajílak tsab a its’ k’al jajá’. Jajá’ tin lej k’anidhálak, pero tsemets tam ti u kwa’alak 10 i támub. U lej yajna’, kom játs expidh jajá’ axi tin t’ajálak ti kwéntaj.

Tam ti u kwa’alak 11 i támub, in k’alej tin k’wajíl k’al u ts’ejel epchal, ani in yanél. Tin pidhálak jawa’ u yéjenchal pero yab jita’ in éxbayalak jawa’ u ats’ál. Tam junchikíl, u kónoyalak a Dios: «¿Jale’ ti tsemets u mamá? ¿Jale’ tin jílk’on jok’tsej?». Ets’ey in uxnalak abal jawa’ u wat’ál pel a Dios tin abchij. Jaxtám u tsálpayalak abal a Dios pojkax ani tu odhnál. Max u ejtowámalak, u tixk’amalak u ejatal.

U lej yajchiknálak kom yab in tsu’ux. Yaníl in odhnáj, kom in takan k’al i kidháb tsalap. Yab jayk’i’ tu ólna’, kom u tsálpayalak abal yab ne’ets kin t’ajan ti kwéntaj. Yab jita’ tin lej tawnálak. Yab u lé’ak ku junkuw ni jita’, kom u tsálpayalak abal ne’ets ti kin ódhna’.

JANT’INI’ TIN TÓLMIY AN BIBLIA ABAL KU JALK’UY U EJATAL:

Tam tu kwa’alak 13 i támub, in k’wajatak ti escuela ani jun i tomkinél tin ólchij tin kwéntaj an Biblia, biyat in k’wajatak tin k’apul. Jun i maestra in konchij an tomkinél abal ti kin t’ilmay. Jajá’chik tin ólchij abal an Biblia in ulal, abal axi jok’tsej ne’ets ka tsu’uxin ani abal an tsemélom ne’ets ka edháj (Isaías 35:5; Juan 5:​28, 29). U kulbetnálak jawa’ tin ólchalakchik, pero kom yab u ujnamak tin kaw, yab u tók’tsiyalak. Pero jajá’chik tin lej k’ayana’ ani in áynanchij ti kin tsa’biy abal ti kin exóbchij tin kwéntaj an Biblia. Kwa’alakchik ka beláts 10 kilómetros al i ts’énlom abal ka ulits tu k’imá’.

U epchal tin ólchij abal axé’ xi tomkinél ts’ejwantalak, pero ets’ey u ulelak jálk’uk’udhchik. U ats’álak abal tin lej k’anidhálak, kom tam junchikíl tin nenchalak jant’oj. Naná’ u lej belálak abal expidh jita’ chubax in k’ak’nálak a Dios ne’etsakchik kin t’aja’ antsaná’.

U éxbayalak jawa’ u exobnál, kom u eyendhálak an publicaciones ti Braille. Pero wa’atsak talchik i exobchixtaláb axi k’ibatak u ats’ál ku bela’. K’ibatak u ats’ál ku bela’ abal a Dios tin k’anidhál ani abal k’e’at i atikláb tin t’ajál ti kwéntaj. U exbay jale’ a Dios in jilál ki yajchikna’, pero k’ibat u ats’a’ ku bela’ abal chubax tu k’anidhál.a

Tam ti k’ayúm k’ayúm u exóbna’ jawa’ in ulal an Biblia, u tsalápil jalk’un. Jun i t’iplab, u exóbna’ abal a Dios in lej yajnál tam in tsu’tal abal wawa’ i yajchiknál. A Jehová in ulal axé’ tin kwéntaj in t’ojnálil axi u odhnáb: «Lej chubax u tsu’umal jant’ini’ in yajchiknál [...;] u alwa’ exlál an yajal axi in kwa’al» (Éxodo 3:7). Tam ti u exbay abal a Jehová tin lej k’anidhál u tsalpay ku pidha’ i ejatal. Ti 1998 in pujan jant’ini’ in ólchix k’al a Jehová.

Jun i támub talbél in k’alej ti Escuintla abal ku bats’uw jun i curso abal i atiklábchik axi jok’tsej. Jun i epchal axi in ok’nálak an tamkuntaláb, in t’aja’ ti kwéntaj abal lej k’ibatak abal naná’ kin k’alej ma tu kwenchálil abal an tamkuntaláb. Jun i yaneláb in uluw abal u éjtowalak kin k’wajiy k’al jajá’chik, ani ma xowé’ belej in k’wajat k’al jajá’chik. Tin beletnálchik jant’ini’ max pelak u yanél.

U éjtowal ku t’ila’ yan jant’oj axi in t’ajámal an epchalchik abal ti kin tólmiy. Tam in k’wajat k’al an ólchixchik k’al a Jehová, u lej belál abal in k’wajat k’al i atikláb axi chubax in k’ak’nál a Jehová (Juan 13:​34, 35).

AN ALWATALÁB AXI U BATS’UWAMAL:

Xowé’ yabáts u ats’ál abal yab jant’oj u jalbíl. U exlál jant’ini’ ku eyendha’ u ejatal. Yab in k’wajíl tin tsalpax abal in jok’tsej, u eyendhál u ejatal abal ku exóbchij axi k’e’at tin kwéntaj an Biblia. Xowé’ in tólmix abal ka beletnáj jun i tamkuntaláb, ani tam junchikíl in kaniyáb abal ku bína’ i t’ilomtaláb al pil i kwenchal. U lej k’ak’nál kom in konchinal ku bína’ i t’ilomtaláb, al i púlik tamkuntaláb.

Ti 2010, in kaniyat ban Escuela de Entrenamiento Ministerial (xowé’ u bijiyáb Escuela abal an Ólchixchik) axi t’ajan ti Salvador. Al axé’ xi escuela u exóbna’ abal lej exbadh ku tólmiy an epchalchik. Jayej tin tólmiy abal ku exbay, abal u kwa’al u jalbíl ani abal a Jehová chubax tin k’anidhál, ani abal in éjtowal kin eyendha’ jitakits tam atikláb abal ka t’ojonchat.

A Jesucristo in uluw: «Lej kulbél in ats’ál jita’ in bats’uwal jant’oj, pero más kulbél ne’ets kin ats’a’ jita’ kin bína’ jawa’ in kwa’al» (Hechos 20:35). Xowé’ u ats’ál in lej kulbél ani u t’ajál jawa’ u tsálpayalak abal yab jayk’i’ ne’ets ku ejtow.