Jawaʼ jun in éjtowal kin olnaʼ tam neʼets kin tʼajaʼ an tamkuntaláb abal an olnomtaláb

An tamkuntaláb axi u tʼajnal abal an olnomtaláb ani patal an tamkuntaláb axi u tʼajnal ban semana, pel jun i tsʼejwalixtaláb in kʼál a Jehová axi tu tólmiyal ki tejwamédhaʼ i kʼanidhomtaláb ani ki tʼajaʼ jawaʼ tekedh (Heb 10:24, 25). Tam, an tamkuntaláb axi u tʼajnal abal an olnomtaláb, kwaʼal kin tʼojonchij 5 ma 7 i minutos. Ajidhits an kʼij axi u eyendháb abal ka tʼojojóyat an grupos, ka abanchik juʼtáj neʼets ti ólnom ani an oláb. Max an tamkuntaláb abal an olnomtaláb ka tʼajan talbél kʼal jun i tamkuntaláb, yab in yéjenchal kin tʼojonchij an 5 o 7 i minutos. Jitaʼchik kin ókʼnaʼ an tamkuntaláb abal an olnomtaláb, kwaʼal kin olnaʼ jantʼoj axi an epchalchik kin ejtow kin eyendhaʼ nixéʼ a kʼicháj tam ka kʼalej ti ólnom. Jun i tʼiplab, tam sábado, waʼats yan i epchal axi yab kalnek ti ólnom ban semana, a éjtowal ka tʼilaʼ jantʼoj axi an epchalchik kin ejtow kin eyendhaʼ ban olnomtaláb. ¿Jantʼoj tam kʼeʼat i tsalap a éjtowal ka eyendhaʼ?

• Tsalap abal ku tʼilmáts in kʼal an Tolmixtaláb abal ti exóbal abal an tamkuntaláb I Ejatal ani i Tʼojlábil tu aykol kʼal a Cristo.

• A éjtowal ka eyendhaʼ jawaʼ itekʼej watʼenek ta kwenchálil abal ka tujuw ti tʼilom ban olnomtaláb.

• Ka tejwamédhaʼ jantʼiniʼ kit tokʼtsin max yabchik in léʼ ti atsʼaʼ.

• Jantʼiniʼ ka tʼilmay jun i atikláb axi yab in belál kʼal a Dios, jun i atikláb axi in belál kʼal an evolución, jun i atikláb axi u kaw al pil i kawintaláb o jitaʼ axi in kwaʼal jun i belomtaláb axi yab lej exladh.

• Jayej a éjtowal ka olnaʼ jantʼiniʼ ka eyendháj an página ti Internet jw.org, an aplicación JW Library^® o an Biblia.

• Jayej a éjtowal ka olnaʼ jantʼiniʼ ki eyendháj jun i publicación axi i eyendhál abal ki bínaʼ i exobintaláb kʼal an Biblia.

• Jayej a éjtowal ka olnaʼ jantʼiniʼ ku olnomáts kʼal an telefono, kʼal an cartas, an predicación publica, jantʼiniʼ ku wichiy ki tsaʼbiy jun i atikláb ani jantʼiniʼ ki tujuw jun i exobintaláb kʼal an Biblia.

• Jayej in éjtowal kin olnaʼ jantʼiniʼ kin béletnaʼ tin baʼ ban olnomtaláb, kin tʼilmay an atikláb tin kwéntaj jawaʼ in kulbetnál, kin tejwamédhaʼ abal u kʼakʼnax, ani jantʼiniʼ kin tejwamédhaʼ i kulbetaláb ban olnomtaláb.

• Jayej in éjtowal kin eyendhaʼ jun i ajumtaláb o jun i video in kʼál an folleto Ku bajudhméj tu ajum ani tu exóbchix.

• Jayej in éjtowal kin olnaʼ jantʼiniʼ kin kanatbedháj ani kin tólmiy in juntal ban olnomtaláb.

• A éjtowal ka olnaʼ jun i texto axi ka eyan ban olnomtaláb o jawaʼ in watʼaʼ jun i epchal.