Ki tʼojojon abal ti exóbal

Wawáʼ i ajiyal an Biblia kom i léʼ abal a Jehová tu ku tólmiy ki jalkʼuy jawaʼ i tsalpayal, ani jawaʼ i atsʼál ti ichích. Antsanáʼ i nitsʼbiyal a Esdras, jajáʼ «in tʼójojoy in ichích» abal kin exóbnaʼ in káwintal a Jehová (Esd. 7:10). ¿Jantʼiniʼ ti éjtowal ki tʼajaʼ?

Ka ólonchij a Jehová. Okʼxidh ka tujchij ta exóbal kʼal an Biblia, ka konchij a Jehová ti tólmiy abal ka exbay jawaʼ neʼets ka exóbnaʼ ani ti tólmiy ka exlaʼ jantʼiniʼ ka eyendhaʼ ta ejatal (Sal. 119:​18, 34).

Ka koʼoy i tsaʼataláb. A Dios in tsínkanchal an exlomtaláb an atiklábchik axi in kʼadhatnál tin baʼ ani axi in tsalpayal abal lej witʼadh (Luc. 10:21). Jaxtám, yab kit exobláts expidh abal ka tejwamédhaʼ abal tatáʼ a exlál yan jantʼoj. Max ka tʼajaʼ ti kwéntaj abal in yéjenchal ka jalkʼuy jantʼoj ta ejatal, ka koʼoy i tsaʼataláb ani ka tʼajaʼ.

Ka atsʼaʼ jun i ajatláb axi in tsʼejkámal in bichówil a Jehová. An ajatlábchik in éjtowal tu ku tólmiy abal ki kʼayúm tsalpay kʼal jawaʼ neʼets ki exóbnaʼ. Jaxtám an ajatláb neʼets tu ku tólmiy abal ki tsalpay kʼal a Jehová ani ki jilaʼ abal an exobintaláb ka ulits ti ichích.