¿Jantʼoj in léʼ kin uluw abal a Jesús tu kʼaniyamal?
Jawaʼ in ulal an Biblia
A Jehová in eyendhámal in tsémtal a Jesús abal tu ku kʼaniy kʼal an walabtaláb ani an tsemláj. An Biblia in ulal abal in xitsʼál a Jesús eyendháj jantʼiniʼ i jalbixtaláb (Efesios 1:7; 1 Pedro 1:18, 19). Jaxtám a Jesús in uluw abal chich ti Tsabál abal kin bínaʼ in ejatal «ti kalchixtaláb abal yántolom i inik ka walkáj ani yabáts ka kʼunat koʼoyat kʼal i walabtaláb» (Mateo 20:28, Biblia de Jerusalén, 1998).
Jaleʼ u yejenchábak jun i jalbixtaláb
An kʼaʼál inik axi tsʼejkáj kʼal a Dios, a Adán, yabák wálbidh. Jajáʼ in éjtowalak ka kʼwajiy abal etsʼey, pero in kʼibaʼ in ejatal kom in jekʼómnaʼ a Dios (Génesis 3:17-19). A Adán in watʼbanchij an walabtaláb in tsakámil (Romanos 5:12). Jaxtám an Biblia in ulal abal a Adán in nujuw in tsakámil kʼal an walabtaláb ani an tsemláj (Romanos 7:14). Yab jitaʼ in éjtowal kin tsab koʼoy jawaʼ in kʼibaʼ a Adán, kom patal u wálbidh (Salmo 49:7, 8).
A Dios in yájnanchij in tsakámilchik a Adán kom kʼwajatakchik kʼibenek (Juan 3:16). Pero kom a Dios etsʼey in tʼajál jawaʼ tekedh, yab in éjtowalak expidh tu ku pákwlanchij i wálab alkʼidhkʼej ani kin ukʼchiy jawaʼ in tʼajaʼ a Adán (Salmo 89:14; Romanos 3:23-26). Kom a Jehová tu lej kʼanidhál, in tʼajaʼ jantʼoj abal ku pákwlanchat i wálab ani ka tixkʼáj abal etsʼey (Romanos 5:6-8). Jaxtám in bínaʼ jun i jalbixtaláb.
Jantʼoj játs an jalbixtaláb
Ban Biblia, an kaw jalbixtaláb in léʼ kin uluw ox jantʼoj:
I tumín abal ka jálbiyat jun i tokʼláb (Números 3:46, 47).
Abal ka walkáj jitaʼ o abal ka wichbáj jantʼoj (Éxodo 21:30).
Abal ka jálbiyat jantʼoj axi jayetsej in jalbíl.a
Ki tsuʼuw jaleʼ in tsémtal a Jesucristo pel jun i jalbixtaláb.
Abal ka jálbiyat jun i tokʼláb. An Biblia in ulal abal a Dios tu «jálbidh tsʼaʼyamal» (1 Corintios 6:20; 7:23). Nixéʼ xi jalbixtaláb pel in xitsʼál a Jesús, kʼal nixéʼ játs tin tsʼaʼyamal a Dios i atiklábchik axi «tin patál an bichówlomchik ani tin patál an pakdhaʼ bichówlomchik» (Revelación [Apocalipsis] 5:8, 9).
Abal ka walkáj jitaʼ. In tsémtal a Jesús tu walkál kʼal an walabtaláb (1 Corintios 1:30; Colosenses 1:14; Hebreos 9:15).
Abal ka jálbiyat jantʼoj axi junat in jalbíl. A Adán pelak jun i inik axi tʼokat, jaxtám u yejenchábak kʼeʼat i inik tʼokat abal kin jalbiy in wálab a Adán, ani axéʼ játs a Jesús (1 Corintios 15:21, 22, 45, 46). An Biblia in ulal: «Kʼal in jékʼomtal junkats i inik, a Adán, játs ti tsuʼtat yántolom i inik ti walbinél. Kom junkats i inik, a Jesucristo, in tʼajámal in uchbíl kʼal a Dios, játs ti neʼets ka tsuʼtat yántolom i inik ti bolidh kʼal a Dios (Romanos 5:19). Axéʼ xi texto tu tólmiyal ki exbay jaleʼ ti junkats i inik in éjtowal kin kʼaniy yan i atikláb. Jaxtám in tsémtal a Jesús in éjtowal «kin jekʼondhaʼ patal an inikchik axi kin belaʼ kʼal jajáʼ» (1 Timoteo 2:5, 6).
a Ban kʼaʼál kawintaláb kʼal axi ti dhuchan an Biblia, an kaw «jalbixtaláb» in léʼ kin uluw i tumín axi u eyendháb abal ka jálbiyat jantʼoj. Jun i tʼiplab, ti Hebreo an kaw kafár in léʼ kin uluw «paxkʼiy» (Génesis 6:14). Axéʼ xi kaw u lej eyendháb abal ka uluwat abal u paxkʼiyáb i wálab (Salmo 65:3). An kaw kófer u eyendháb abal ka uluwat jantʼoj kwaʼal ka tʼajan abal ka jálbiyat o ka kʼaniyat jantʼoj (Éxodo 21:30). Kʼeʼat i kaw ti Griego, lýtron, in léʼ kin uluw ka «jálbiyat» jantʼoj (Mateo 20:28, The New Testament in Modern Speech, de R. F. Weymouth). An dhúchumchik axi ti Griego, in eyendhál an kaw lýtron, abal kin uluw jawaʼ jalbiyámej abal jun i atikláb ka walkáj.