¿Jantʼoj in ulal an Biblia max ka jidhkʼow jun i tsakam?
Jawaʼ in ulal an Biblia
An Biblia yab in eyendhál an kaw «Jidhkʼow» abal kin ódhnaʼ an tʼeleʼ axi yabáyej u waʼtsinal. Pero an Biblia, tu tólmiyal ki exlaʼ jantʼiniʼ tin tsuʼtal a Jehová an ejataláb, ejtíl an tʼeleʼ axi yabáyej u waʼtsinal.
An ejataláb pel jun i tsʼejwalixtaláb axi tal kʼal a Dios (Génesis 9:6; Salmo 36:9). Patal jawaʼ kʼwajat éjat in kwaʼal in jalbíl kʼal a Dios ani axéʼ kwaʼal kin tsuʼuw kʼal an tʼeleʼ axi kʼwajatej tin chúkul in mamá. Jaxtám jitaʼ tʼajchíl kin jidhkʼow jun i tsakam axi yabáyej u waʼtsinal kʼwajat in tʼajál jun i púlik walabtaláb.
An abatnaxtaláb axi a Jehová in pidhaʼ an israelitas, in ulal: «Max jun i inik kin ódhnaʼ jun i uxum axi koʼodh ani ka waʼtsin an tʼeleʼ ani yab jitaʼ ka tsemets, an kwadhax kwaʼal kin jálbiy jawaʼ ka uchan kʼal an jueces, pero max jun jitaʼ ka tsemets, kwaʼal jayej ka tsemdháj» (Éxodo 21:22, 23).a
¿Jaykʼiʼ tu tujél in éjatal jun i atikláb?
Abal a Dios, axéʼ u tujél tam ka tsʼiʼkin tin chúkul in mamá, tam ka jilkʼon koʼodh an mimláb. An Biblia in ulal abal bélits abal an tʼeleʼ yabáyej u waʼtsinal, a Jehová in tsuʼtal jantʼiniʼ jun i atikláb. Ki tsuʼuw junchik i tʼiplab jantʼiniʼ a Dios in tsuʼchal in jalbíl axi yabáyej waʼtsidh ani axi waʼtsinénekits.
Ki tsuʼuw jantʼoj in uchaʼ a Dios, an tsʼaleʼ David: «Tatáʼ Dios, tin tsuʼuw tam ti nanáʼ yabáyej in waʼtsinal Tam tin kʼwajatej tin tsʼejkanal» (Salmo 139:16). Jaxtám a Dios in tsuʼtalak a David jantʼiniʼ jun i atikláb ókʼxidh ka waʼtsin.
Ki tsuʼuw kʼeʼat i tʼiplab, a Dios in kwaʼalak jun i uchbiláb abal an kawlómej Jeremías, ókʼxidh ka waʼtsin. A Dios in uchaʼ: «Ókʼxidh kit tújey tit púwel tin chúkul a mamá tu exlálakits. Ani okʼxidh kit kalej tin chúkul a mamá tu lábliy. Kawlómej abal an atiklábchik tu tʼajaʼ» (Jeremías 1:5).
A Lucas pel jun axi in dhuchaʼ an Biblia ani pelak i ilálix, in éyendhaʼ an kaw Griego abal kin ólnaʼ tin kwéntaj jun i tʼeleʼ axi yabáyej waʼtsinének ani axi waʼtsinénekits (Lucas 1:41; 2:12, 16).
¿In pákwlanchal a Dios jitaʼ kʼal in tʼajchíl kin jidhkʼow in tʼeléʼíl?
Aníts. Jitaʼ in tʼajchíl kin jidhkʼow in tʼeléʼíl a Dios in pákwlanchal. Max ka tsuʼuw an ejataláb jantʼiniʼ tin tsuʼtal a Dios, yab in kwaʼal jaleʼ tin ka atsʼaʼ wálbidh kʼal jawaʼ a tʼajaʼ. An Biblia in ulal: «A Jehová lej alwaʼ inik ani yajnanchix ... Antsanáʼ jantʼiniʼ in owél juʼtáj u kalel an kʼakʼal ani am juʼtáj u otsel, antsanáʼ in owél in púnuwal i wálab» (Salmo 103:8-12).b Jitaʼ ka wichkʼon kʼal in wálab, kʼal patal in ichích a Jehová in pákwlanchal. Jayej jitaʼ kin jidhkʼow tʼajchíl jun i tʼeleʼ (Salmo 86:5).
¿Walám u jólbinal max kin jidhkʼow an tʼeleʼ tam an mamaláb o an tʼeleʼ in ejtowal kin kʼibaʼ in éjatal?
Kʼal jawaʼ in ulal an Biblia kʼal an tʼeleʼ axi yabáyej u waʼtsinal, pel jun i walabtaláb jitaʼ kin jidhkʼow an tʼeleʼ bélits max neʼets ka tsemets an mamaláb o an tʼeleʼ.
Ani, ¿jantʼoj neʼets ka watʼey tam kʼwajat ti waʼtsinal an tʼeleʼ ani kwaʼal ka tákuy jitaʼ neʼets ka jilkʼon éjat an mamaláb o an tʼeleʼ? I exlál abal nixéʼ yab wilkʼidh u watʼel, expidh axi kʼwajat in tametnál nixéʼ xi kʼibataláb, játs kwaʼal kin tákuy jantʼoj neʼets kin tʼajaʼ.
a Talchik i wilkʼaxtaláb kʼal an Biblia in wilkʼál abal jawaʼ más exbadh játs jawaʼ kin watʼaʼ an nanaláb ani yab an tʼeleʼ. Pero an texto Hebreo in ulal jawaʼ in éjtowalak kin watʼaʼ tsablóm tin éb, an nanaláb ani an tsakam.
b An Biblia in ulal abal in bij a Dios, pel Jehová (Salmo 83:18).