¿Pel in wálab an tumín kʼal patal an kʼibataláb axi kʼwajat ti watʼel?

Jawaʼ in ulal an Biblia

Imbáj. An Biblia yab in ulal abal an tumín kidháb, ni abal pel in wálab kʼal patal jawaʼ kidháb kʼwajat ti watʼel. Jun i kaw in ulal: «an tumín pel in tujtal patal an yajchiktaláb» an atiklábchik in tsálpayal abal nixéʼ xi kaw kʼwajat ti Biblia ani ¿játs antsanáʼ? Imbáj. Kʼal an chubaxtaláb, an Biblia in ulal: «An kʼanidhomtaláb kʼal an tumín, pel in tujtal patal an yajchiktaláb» (1 Timoteo 6:10, Reina-Valera, 2009, negritas nuestras).a

¿Jantʼoj in ulal an Biblia tin kwéntaj kʼal an tumín?

An Biblia in ulal abal max ki éyendhaʼ alwaʼ, in éjtowal tu ku tólmiy ani ma «tu ku kʼániy» (Eclesiastés 7:12). Jayej u kaw alwaʼ kʼal an atiklábchik axi in binál jawaʼ in kwaʼal ani in tólmiyal axi kʼeʼat kʼal in tumínal (Proverbios 11:25).

Ka tʼajaʼ ti kwéntaj, an Biblia in ulal abal yab ki punuw okʼox ti éjatal an tumín. Ti Hebreos 13:5, in ulal: «Yab ka kʼadhpich kʼanidhaʼ an tumín, ka neʼdhaʼ kulbél a ichích kʼal jawákits a kwaʼal». I exobnál abal an tumín u éynal abal yan jantʼoj, pero yab kwaʼal ki pidhaʼ lej in exbádh. Kwaʼal ku kʼwajiy kulbél kʼal jawaʼ i kwaʼal, ejtíl, an kʼapnél, i toltómil ani i kʼimaʼ (1 Timoteo 6:8).

**¿Jaleʼ ti yab alwaʼ ki kʼadhpich kʼanidhaʼ an tumín?**

n atiklábchik axi in léʼ kin koʼoy yan jantʼoj, yab neʼets kin batsʼuw an ejataláb abal etsʼey (Efesios 5:5). Okʼox, kom yab u kulbél kʼal jawaʼ in kwaʼal, pel ejtíl max in kʼakʼnál kʼeʼat i dios (Colosenses 3:5). Tsabchíl, kom abal kin koʼoy jawaʼ in léʼchik, an atiklábchik yab in tʼajál jawaʼ tekedh. Ti Proverbios 28:20, in ulal: «Jitaʼ in léʼ kin tʼajaʼ ti tuminladh tin adhík yab neʼets kin éjtow kin tejwamédhaʼ abal bolidh». Kom walám kin léʼnaʼ kin kʼámbiy ani kin kweʼchij in tuminal an atiklábchik jayej neʼets kin léʼnaʼ kin tsemdhaʼ abal kin tixkʼanchij jawaʼ in kwaʼal.

Bélits max yab kin tʼajaʼ jantʼoj kidháb, max ki jálpidh kʼaʼinchij an tumín, in ejtowal tu ódhnanchij i éjatal. An Biblia tu ólchal: «Axi in lej kʼaʼinchal an tumín, u lej nixokʼnáb abal ka wálbin. U wikʼat koʼoyab in ichích kʼal yan i leʼnomtaláb kʼal tu kweteʼ tontobel ani tu odhnáb» (1 Timoteo 6:9).

An alwaʼtaláb axi i kanchal max ki tʼajaʼ jawaʼ in ulal an Biblia

Max etsʼey ki tʼajaʼ ti kwéntaj jawaʼ in tsálpayal a Dios ani ki tʼajaʼ jawaʼ alwaʼ ti éjatal, yab neʼets ki ukʼchiy jawaʼ i exobnámal. Neʼets ki kulbédhanchij in ichích. Ani max ki tsápnanchij ki tʼajaʼ jawaʼ Jajáʼ in kulbetnál a Dios tu ólchal: «Ni jaykʼiʼ yab neʼets tu ow tsuʼuw ani ni jaykʼiʼ yab neʼets tu jilkakay» (Hebreos 13:5, 6). Ani in ulal abal «an atikláb axi pútudh in bátsʼuwal yan i lablixtaláb» (Proverbios 28:20).

Olchixtaláb axi in binál an Biblia kʼal tin kwéntaj an tumín

Eclesiastés 7:12: «Kʼal an tumín ka éjtow ka tʼajaʼ yan jantʼoj».

Jawaʼ in léʼ kin uluw: Max ki éyendhaʼ alwaʼ, an tumín in éjtowal tu ku tólmiy jun i wéʼ.

Lucas 12:15: «Kom yab kʼal an tumín ti neʼets ka koʼoy an ejataláb abal etsʼey».

Jawaʼ in léʼ kin uluw: Yab ki lej pidhaʼ in jalbíl an tumín, kom yab neʼets kin éjtow tu ku kʼániy.

1 Timoteo 6:10: «An kʼanidhomtaláb kʼal an tumín jaʼits juʼtáj tu júnel patal axi yab alwaʼ. Waʼats talchik kom in kʼaʼinchámal an tumín, in jilámalits ti bélom ani in támuwal yan jantʼoj yajchik».

Jawaʼ in léʼ kin uluw: An tumín yab kidháb. Pero an atiklábchik axi in kʼaʼinchal an tumín, in punchal más in exbádh tin éjatal. Pero talbél, in koʼoyal yan i kʼibataláb kʼal in yanél ani ma u yaʼulchik kom u kʼadhpich tʼojnal.

Hebreos 13:5: «Yab ka kʼadhpich kʼanidhaʼ an tumín, ka neʼdhaʼ kulbél a ichích kʼal jawákits a kwaʼal».

Jawaʼ in léʼ kin uluw: Yab ki léʼnaʼ ki kaldhaʼ expidh más i tumín. Más alwaʼ ku kʼwajiy kulbél kʼal jawaʼ i kwaʼal.

Mateo 19:24: «Yab kʼibat ka watʼey jun i camello tin jólil jun i tʼidhab, pero watʼadh kʼibat ka otsits tin Eyaltal a Dios jun axi lej tuminladh».

Jawaʼ in léʼ kin uluw: A Jesús ítekʼij in kaniyámal jun i kwitól axi tuminladh abal kin tʼajaʼ tin aykólil. Pero yab in léʼnaʼ kom jajáʼ in lej kʼanidhálak patal jawaʼ in kwaʼal. A Jesús in léʼak kin bínaʼ jun i exobchixtaláb kʼal axéʼ. Max i pidhál más in exbádh an tumín, yab neʼets ki bajuw an ejataláb abal etsʼey.

a Axéʼ xi versículo jayej wilkʼámej antsanáʼ: «an kʼanidhomtaláb kʼal an tumín, pel in tujtal patal an yajchiktaláb».