I tʼojojoy an Atáj tamkuntaláb biyat kʼwajatak an coronavirus

«U kulbél ki exlaʼ abal an Kwenél i Ókʼnom in ulumal abal max an eyal tu ku jilaʼ i éjtowal ku tamkun ti Atáj tamkuntaláb ti kʼaʼál a abril». Lej kulbél in atsʼaʼ an ólchikchik kʼal a Jehová axi tin puwél an tsabál tam tin ajiy axéʼ xi olchixtaláb ti marzo 2022 ti jw.org pero an coronavirus yabayej talnekak. Abal yab ka dhaʼun jitaʼ ka kʼalej ti tamkuntaláb kwaʼalak ka tsʼaʼiyat talchik jantʼoj axi ki eyendhaʼ abal ki beletnaʼ ti baʼ.a ¿Jantʼoj in yejenchalak ka tʼajan abal an Atáj tamkuntaláb ka kʼwajiy tʼojojodh junilekʼij abal tam ku tamkun?

An epchalchik in neʼdhalakits talchik a ítsʼ ti tʼojojonál abal tam kin bajuw axéʼ an kʼij: Junilekʼij u tamkunal ban Atáj tamkuntaláb.

I tʼajal jawaʼ i yéjenchal juʼtáj tu kʼwajíl

Jun a ítsʼ talbél tu uchan abal yabáts neʼets ku tamkun ti Atáj tamkuntaláb, an departamento de Diseño y Construcción axi ti Warwick, in tʼajaʼ ti kwentaj jantʼoj awilak ka tʼajan abal ka beletnaj an Ataj tamkuntaláb biyat kʼwajatak an coronavirus ani ki áynanchij ki koʼoy an tamkuntaláb ani yab ku dhaʼun k’al an yaw’láts.

An epchalchik axi tin puwél an tsabál yab junat jawaʼ in yéjenchalchik. A Matthew De Sanctis axi u tólmix ban Departamento mundial de Diseño y Construcción in ulal: «Al talchik i kwénchal lej kʼibat ki elaʼ juʼtáj ki tʼakaʼ i kʼubak. Max al jun i Atáj tamkuntalab yab u ulel an jaʼ kwaʼal ka tsʼa’iyat o kwaʼal ka ikʼtat al jun i itseʼ o al jun i mom axi kwajat utat. Al kʼeʼat i kwénchal an eyal in uluw jantʼiniʼ ka eyendháj an ventiladores, an aires acondicionados ani abal ka kʼwabáj i olchixtaláb abal jantʼoj ki tʼajaʼ abal yab ku dhaʼun kʼal an yaw’láts.

¿Jantʼoj in tʼajaʼ an epchalchik abal kin tsʼejkaʼ axéʼ xi kʼibataláb? A Mateo in ulal abal yan i Atáj tamkuntaláb in tsʼejkachik an kʼibataláb ani yab in pakuw yan i tumín. Jun i tʼiplab, an epchalchik axi ti Papua ti nueva guinea in eyéndhachik i yogas axi in akʼnál 20 litros i jáʼ ani in kʼwanchichik jun i llave abal kin ejtow kin tʼakaʼchik in kʼubak. Abal ka tʼojojoyat jun i Atáj tamkuntaláb al jun i kwénchal expidh u yejenchabák 800 pesos. Jun i nujul axi ti Asia tu nujchij watʼadh 6,000 i eyextaláb abal ki tʼakáʼ i kʼubak ani i abchj an Atáj tamkuntalábchik axi ti Africa.

Al kʼeʼat i Atáj tamkuntaláb punuwat i ventiladores ani al talchik tʼojojoyat an aire acondicionado abal ka waʼtsin i ikʼ. Al yan i Atáj tamkuntalab tsʼaychat in akan an micrófono abal an epchalchik yab kin takaʼ, jayej an epchalchik in tsapnanchij abal wilkʼidh kin kʼwitʼiy jawaʼ patal in takal abal antsanáʼ yab ka bukʼey an yawláts. Ejtíl an wiléb o tam in takal an llave abal kin tʼakaʼ in kʼubák. Al kʼeʼat tʼojojoyat an llave abal tam kin tʼakaʼchik in kʼubak ka kwetém kalej an jáʼ. Ban bichow axi in bij chile, abal ka tʼojojoyat jun i Atáj tamkuntaláb pakuwat watʼadh 28,000 pesos.

Al talchik i bichow an epchalchik in batsʼuw an tolmixtaláb axi in binal an eyál abal kin tsʼaʼiy juʼtáj ka kʼwajbaj an micrófono ani abal kin tsʼaʼiy an eyextaláb juʼtáj kin tʼakaʼchik in kʼubak, jaye an sucursales junkunchik abal kin tsʼaʼiy jawaʼ in yejénchal ani antsanáʼ ka kalej más tsaʼat. An sucursales ani an departamento mundial axi u tólmix abal ka tsʼayat jawaʼ u yejencháb in tsʼaychichik jitaʼ in tsʼejkal jawaʼ in yéjenchal, antsanáʼ u kalelak más tsáʼat ani u ulelak más dhúbat jawaʼ u yéjenchab.

«An epchalchik in eyendhaʼ alwaʼ an tumín, abal yab ka dhaʼun jitaʼ ka kʼalej ti tamkuntaláb»

Patal jawaʼ in tʼajámal an epchalchik in tólmiyamal abal jitaʼ u kʼalel ti tamkuntaláb yab ka jikʼey ka dhaʼun kʼal an yaw’láts. Jun i epchal axi in bij Dulce in ulál abal tam tin exlaʼ abal neʼetsak ku wichiy ku tamkun ti Átaj tamkuntaláb in atsʼalak u wé jikʼel, jajá in ulal: «U koʼoy i covid tam tin tujchij an yawláts jaxtam in jikʼelak kin dhaʼun junilekʼij tam kin kʼalej ti Atáj tamkuntaláb. Pero tam tin ulits ban Atáj tamkuntaláb u tʼajaʼ ti kwentaj abal an ókʼnomchik in kwaʼalak patal alwaʼ tʼojojodh, waʼatsak i gel abal ki eyendhaʼ ti kʼubak ani an micrófono tʼojojoyat abal yab ki takaʼ, jayej u tʼokedhabak an Atáj tamkuntaláb okʼxidh ani talbél an tamkuntaláb, antsanáʼ jantʼiniʼ tu tʼokedhabak tin tólmiy abal ku lej belaʼ abal yabáts neʼetsak kin dhaʼun.b

An epchal Sara axi u kʼwajil ti Zambia in tametna kʼeʼat i kʼibataláb, jajáʼ in ulal: «U tomkíl tsemets kom dhaʼun kʼal an covid 19, in tʼeʼpinalak kom yab u exlalák jantʼoj neʼetsak ku atsʼaʼ tam kin kʼalej kwetém ti Atáj tamkuntalab». ¿Jantʼiniʼ in atsʼál xowéʼ kom kʼwajatits ti tamkunal? An tamkuntaláb tin tólmiyal abal ku tʼajaʼ ti kwentaj abal a Jehová kʼwajat tu tólmiyal xowéʼ ban taltal kʼicháj. Ban tamkuntaláb an ókʼnomchik ani an epchalchik u atsʼál abal tin kanatbedhál ani tin kʼanidhalchik.

Tin puwél an tsabál an epchalchik in atsʼál lej kulbel kom in éjtowalitschik ka tamkun junilekʼij ban Atáj tamkuntaláb. I lej kʼakʼnál an tolmixtaláb axi a tʼajalchik kʼal i tumín, talchik kʼal tatáʼ a binalchik ti donate.jw.org. kʼal an tumín axi a binálchik i ejtowamal ki tólmiy an epchalchik abal kin atsʼaʼ abal kwajat alwaʼ beletnadh ban Atáj tamkuntaláb.