In tomnál ki konowiy axéʼ ti kwetémtal: «¿In tʼajálchik ti kwéntaj axi más abal u éxbayal? ¿U kúxunchal axi kʼeʼat ani u tsápnanchal ku jalkʼuy u tsalápil max kwaʼal ku tʼajaʼ? ¿In exláb abal in lej tsákulom ani abal expidh u léʼ ka tʼajan jawaʼ nanáʼ u ulal? ¿U tsápnanchal ku otsʼówiy axi kʼeʼat ani ku jalkʼuy u tsalápil?». Max ki tsápnanchij ki exbay más axi kʼeʼatchik, más neʼets ki nitsʼbiy jantʼiniʼ játs in ey a Jehová ani a Jesús. Tam ka jalkʼun jantʼoj ti ejatal neʼets ki yéjenchij ki jalkʼuy i tsalápil. Ejtíl, jun dhúbatkʼij awits ku yawʼláts o ki koʼoy kʼeʼat i kʼibataláb kʼal tin kwéntaj an tumín o kʼal an eyalchik. Axéʼ in éjtowal kin jalkʼuy patal jawaʼ i tsálpayalak ki tʼajaʼ, o walám kin tʼajaʼ abal ki koʼoy jun i kʼibataláb axi yab jaykʼiʼ i tsalpay abal neʼets ki tamétnaʼ (Ecl. 9:11). Kʼeʼat jantʼoj axi in éjtowal tu ku jálkʼunchij i ejatal játs max ku jálkʼunchat jun i tʼojláb axi i tʼajálak tin bichówil a Jehová. Neʼets ki ejtow ki watʼenchij max ki éyendhaʼ axéʼ xi tseʼ i tolmixtaláb: 1) ki batsʼuw jawaʼ i tamtémits, 2) ki tsalpay kʼal jawaʼ i éjtowalej ki tʼajaʼ, 3) ki tʼajaʼ ti kwéntaj an alwaʼtaláb axi kʼwajat i bátsʼuwal ani 4) ki tsápnanchij ki tólmiy axi kʼeʼatchik. w23.07 21, 22 párrs. 7, 8

Tam ti a Daniel tsákamej, neʼdháj jantʼiniʼ i wikʼnél abal ti Babilonia, pero belits abal tsakamej, lej tsalpadhak. An babilonios in lej kulbétnaʼ abal a Daniel lej alabél ti kwitól, yab u yaʼulak ani talak al jun i yaneláb axi lej éxladhak (1 Sam. 16:7). Jaxtám an babilonios in takuy a Daniel abal kin exóbchij, kom in léʼakchik kin pidhaʼ jun in éy ti Babilonia (Dan. 1:​3, 4, 6). A Jehová in lej kʼanidhálak a Daniel, in kulbetnálak jantʼiniʼ in ey. ¿Jaleʼ i exlál nixéʼ? Walám a Daniel yabaye in kwaʼal nibal veinte i támub tam ti a Jehová in uluw abal pelak jun i inik lej putudh, antsanáʼ jantʼiniʼ a Noé ani a Job. Jayej ki tʼilaʼ abal axéʼ xi tsab i inik in lej tʼojonchij a Jehová al yan i támub (Gén. 5:32; 6:​9, 10; Job 42:​16, 17; Ezeq. 14:14). A Daniel kʼwajiy ejat yan i támub ani etsʼey kʼanidháj kʼal a Jehová (Dan. 10:​11, 19). w23.08 2 párrs. 1, 2

Ka tsalpay abal tatáʼ a léʼ ka tsʼaʼiy jun i atáj, ¿jantʼoj neʼets ka tʼajaʼ okʼxidh ka tsʼaʼiy? Neʼets kit kʼalej ka metʼaʼ. Walám ma neʼets ka konoy jantʼiniʼ ti kʼwajat tsʼejkadh an atáj. Jayetsej in tomnál ki tʼajaʼ tam i ajiyal ani i exobnál an Biblia. Yab ki ajchikiy, kom antsanáʼ expidh neʼets ki exbay «i kaw axi exlantálits ani yab kʼibat» (Heb. 5:12). Tam, ¿jantʼoj in tomnál ki tʼajaʼ? Kwaʼal ki tʼajaʼ ejtíl kʼal an atáj, kwaʼal ki talaʼ metʼaʼ altáj ani eléb abal ki exlaʼ patal. Tam i exobnál an Biblia in tomnál ki tsalpay jantʼiniʼ u júmbinal jun i pejach ban Biblia kʼal kʼeʼat i textos, yab expidh i yéjenchal ki exlaʼ jawaʼ in ulal an Biblia, jayej in yéjenchal ki exbay jaleʼ ti belál kʼal jawaʼ in ulal. Abal ki exbay alwaʼ an Biblia in yéjenchal ki exóbnaʼ an exobchixtalábchik axi más wéʼ kʼibat. An abatwálej Pablo in uchaʼ an epchalchik abal in yéjenchalak kin alwaʼ exóbnaʼ an dhuchlab, abal kin éxlanchij in tsʼikwél, in nakél, in lupúdh ani in tʼekʼem in káwintal a Dios. Kʼal nixéʼ neʼetsak ka tólmiyatchik abal ka utey más kʼal a Jehová (Efes. 3:​14-19). Wawáʼ jayetsej in tomnál ki tʼajaʼ. w23.10 18 párrs. 1-3