AJUMTALÁB 1

Ka exlaʼ jantʼiniʼ kit tujey ti tʼilom

Hechos 17:22

RESUMEN: Tam kit tujey tit káw ka tʼajaʼ abal kit otsʼówiyat, ka tajaxmédhaʼ jantʼoj játs axi a léʼ ka olnaʼ ani ka tejwamédhaʼ jaleʼ ti lej exbadh jawaʼ neʼets ka uluw.

JANTʼINIʼ KA TʼAJAʼ

Ka tʼajaʼ abal kit otsʼówiyat. Ka takuy jún i konowixtaláb, jún i káw axi exbadh, jún i tʼilab kʼal axi in watʼamal jún i epchal o jún i noticia axi u leʼnáb ka atsʼan.

Ka okʼxidh tsalpay jantʼoj walám neʼets kin kulbétnaʼ kin atsʼaʼchik ani jantʼoj tam tʼeʼpintaláb in kwaʼalchik, tam, ka jalkʼuy a tʼilomtalábil abal ka olnaʼ kʼal jantʼoj ti neʼets ka tolmiyat jitaʼ kʼwajat ti otsʼox.
Ka tajaxmédhaʼ jantʼoj játs axi a léʼ ka olnaʼ. Tam ki tujey tit káw ka jilaʼ tajax jantʼoj játs axi a léʼ ka uluw ani jantʼoj a léʼ abal kin exlaʼchik.
Ka tejwamédhaʼ jaleʼ ti lej exbadh jawaʼ neʼets ka uluw. Ka olnaʼ jantʼoj axi chubax kin tólmiy jitaʼ kʼwajat ti atsʼál. Jajáʼchik kwaʼal kin tʼajaʼ ti kwéntaj abal chubax neʼets ka tolmiyat kʼal jawaʼ neʼets kin atsʼaʼ.

Tam kit exobláts abal ka bínaʼ jún i tʼilomtaláb, ka tsalpay: «¿Jantʼoj tam kʼibataláb in tametnál an epchalchik axi ti tamkuntaláb?». Tam ka exlaʼits jawaʼ játs, ka eyendhaʼ nixéʼ abal ka tujuw an tʼilomtaláb.