¿Chubax tal kʼal a Dios jawaʼ tu ólchal an Biblia?

1. ¿Jitaʼ in kʼál an tsalap axi kʼwajat ti Biblia?

An Biblia in kwaʼal in tsalápil a Dios. Jajáʼ in eyendhaʼ jún i 40 i inik abal kin dhuchaʼ an Biblia. Axéʼ in kwaʼal 66 i tsakam libros. A Moisés in dhuchaʼ bóʼ i libros axi kʼwajat tin tujtal an Biblia in tʼajál jún i tres mil quinientos i tamub. An abatwalej Juan in dhuchaʼ an libro axi in bij Revelación o Apocalipsis in tʼajál jún i mil novecientos i tamub. A Dios tu ólchal ti Biblia jún jantʼoj lej alwaʼ: tu ólchal abal neʼets ku kʼwajiy abal etsʼey tejéʼ ti Tsabál (Salmo 37:29). ¿Jantʼiniʼ tin tʼajchij a Dios abal kin dhuchaʼ in tsalápil ti Biblia? A Dios in eyendhaʼ an espíritu santo abal kin punchij tin tsalápil axéʼ xi inikchik jawaʼ in léʼak ka dhuchan (2 Samuel 23:2). Jaxtám ti ulal abal an Biblia pél in Káwintal a Dios, yab in kʼál i inik. Ka ajiy 2 Timoteo 3:16 ani 2 Pedro 1:20, 21.

2. ¿Jaleʼ ti i ejtowal ki belaʼ abal an Biblia tu ólchal an chubaxtaláb?

I ejtowal ki belaʼ kom in kwaʼal in tsalápil a Dios ani patal jawaʼ kin kʼej uluw etsʼey u putnal, jún jantʼoj axi an inikchik yab in ejtowal kin tʼajaʼ (Josué 23:14). Expidh a Dios axi in Kwaʼal patal an awiltaláb, in ejtowal kin exlaʼ jantʼoj neʼets ka watʼey axi taʼtál a kʼicháj. Ka ajiy Isaías 42:9 ani 46:10.

Yab waʼats júnakej i libro jantʼiniʼ axi in kʼál a Dios. Bukʼúmej más de dos mil millones i Biblias ani wilkʼamej al lej yán i kawintaláb. Chubax, an Biblia lej biyálits ti dhuchnének, pero kʼwajat júnkudh kʼal jawaʼ in ólnál an ciencia. Jayej an 40 i inikchik axi in dhuchaʼ, yab tomolnáxin kʼal jawaʼ in dhuchaʼ.a Al patal jawaʼ dhuchadh ti Biblia u tejwamél in kʼanidhomtal a Dios ani ma xóʼ ta kʼicháj an Biblia in kwaʼal in tsap abal kin jalkʼunchij in ejatal an atiklábchik. Jaxtám, kʼal patal jawaʼ i tsuʼuwits, yán i atiklábchik in belál abal an Biblia chubax pél in káwintal a Dios. Ka ajiy 1 Tesalonicenses 2:13.

3. ¿Jantʼoj tu ólchal an Biblia?

An Biblia tu ólchal an alabél tsalap axi in kwaʼal a Dios abal an kʼwajílomchik. Jayej tu ólchal jaleʼ ti kaldháj a Adán ani a Eva ti paraíso ani tu wilkʼánchal jantʼiniʼ ti neʼets ka tsáb tsʼejkáj an Alabél Tsabál. Ka ajiy Revelación (Apocalipsis) 21:4, 5.

In Káwintal a Dios tu pidhál i abatnaxtaláb, i tsalpadh káw o principios ani tu exóbchal jantʼiniʼ tu ku kʼwajiy. Tam ki ajiy patal jawaʼ in tʼajámal kʼal an atiklábchik, tu tejwamédhanchal jantʼiniʼ in éy jajáʼ. An Biblia tu tólmiyal ki exlaʼ más tin kwéntaj a Dios ani tu ólchal jantʼiniʼ ti ejtowal ki tʼajaʼ ti jaʼúb. Ka ajiy Salmo 19:7, 11; Santiago 2:23, ani 4:8.

4. ¿Jantʼiniʼ ti i ejtowal ki exbay an Biblia?

I ejtowal ki exbay an Biblia max ki tʼajaʼ jantʼiniʼ tin tʼajaʼ a Jesús. Jajáʼ in úlalak junchik i versículos ani talbél in wilkʼálak abal an atiklábchik kin «ejtiy an Tʼokat Dhuchlab». Axéʼ xi folleto tsʼejkadh antsanáʼ abal ka ejtow ka exbay an Biblia. Ka ajiy Lucas 24:27, 45.

I exlál abal neʼets ka atsʼaʼ kʼijidh ka exobnaʼ tin kwéntaj a Dios ani jawaʼ jajáʼ in tsálpayal kin tʼajaʼ. Pero waʼats i atikláb axi yab in kulbetnál kin exlaʼ tin kwéntaj a Dios, tálchik ma u tsakúl. Pero yab ka jilaʼ abal nixéʼ kin tʼajaʼ ka jilaʼ tit exóbal. An Biblia in ulal abal max ki exobnaʼ tin kwéntaj a Dios neʼets ki ejtow ku kʼwajiy abal etsʼey. Ka ajiy Juan 17:3, NM.