AJUMTALÁB 12
¿Jantʼoj neʼets ti tólmiy abal ka áynanchij ka exóbnaʼ an Biblia?
Ki exóbnaʼ an Biblia pel jantʼoj lej kʼijidh. Pero junchikíl neʼets ki atsʼaʼ wéʼ kʼibat, ani walám ma ki tsalpay abal yab neʼets ki ejtow ki áynanchij ki exóbnaʼ. ¿Jaleʼ ti yab kwaʼal ki jilaʼ tu exóbal? ¿Jantʼoj neʼets ti tólmiy abal ka áynanchij tit exóbal bélits max ka támetnaʼ i kʼibataláb?
1. ¿Jaleʼ ti lej alwaʼ ki áynanchij ki exóbnaʼ an Biblia?
«In káwintal a Dios tu lej ejátlinchal ani tu lej tsáplinchal i ichích» (Hebreos 4:12). An Biblia pel jun i libro axi in kwaʼal yan in jalbíl, kom in ulal jantʼoj in tsálpayal ani in atsʼál a Dios abal kʼal tatáʼ. Jawaʼ ka exóbnaʼ ban Biblia yab expidh neʼets ti tólmiy abal ka exlaʼ yan jantʼoj, jayej neʼets ti tólmiy abal ka exlaʼ jantʼiniʼ ka beldhaʼ a ejatal ani abal ka koʼoy jun i aychixtaláb. Pero jawaʼ más kʼijidh játs abal an exobintaláb kʼal an Biblia neʼets ti tólmiy abal ka tʼajaʼ ta jaʼúb a Jehová. Tam tatáʼ a ajiyal an Biblia, kʼwajat a jilál abal a Jehová ti béldhanchij a ejatal.
2. ¿Jaleʼ ti lej exbadh ki pidhaʼ in jalbíl jawaʼ i exobnál ti Biblia?
Patal jawaʼ tu ólchal an Biblia pel ejtíl i kʼaláb axi in kwaʼal yan in jalbíl. Jaxtám, an Biblia in ulal: «Ka pidhaʼ in jalbíl jawaʼ it exobchinének ani yab ka jilaʼ» (Proverbios 23:23). Tam, max etsʼey ki tʼilaʼ abal jawaʼ i exobnámal ban Biblia in kwaʼal yan in jalbíl, neʼets ki áynanchij tu exóbal bélits max ki támetnaʼ i kʼibataláb (ka ajiy Proverbios 2:4, 5).
3. ¿Jantʼiniʼ neʼets ti tólmiy a Jehová abal ka áynanchij tit exóbal?
Kom a Jehová játs axi ti tsʼejkámal, Jajáʼ ti alwaʼ exlál ani neʼets ti tólmiy abal kit utey kʼal Jajáʼ. A Dios neʼets ti pidhaʼ «an tsapláb abal ka léʼnaʼ ka tʼajaʼ jawaʼ alwaʼ, ani ka ejtow ka tʼajaʼ» (ka ajiy Filipenses 2:13). Max a atsʼál abal a yéjenchal más i tsapláb abal ka áynanchij ka exóbnaʼ an Biblia, ka konchij a Jehová, ani Jajáʼ neʼets ti tólmiy. Max kʼwajat a tametnál jun i kʼibataláb o max it kʼanchinal tit exóbal, a Jehová neʼets ti pidhaʼ an tsapláb abal ka kuxuy ani ka áynanchij. Tam, etsʼey ka konchij ti tólmiy (1 Tesalonicenses 5:17).
ABAL KA EXÓBNAʼ MÁS
Ka exóbnaʼ jantʼoj a éjtowal ka tʼajaʼ abal ka áynanchij tit exóbal bélits max it kʼanchinal o yab it lej jólkʼanal. Jayej ka tsuʼuw jantʼiniʼ neʼets ti tólmiy a Jehová abal ka áynanchij tit exóbal.
4. Ka tsalpay jay in exbádh kʼwajat a pidhál an exobintaláb kʼal an Biblia
Junchikíl, walám ka atsʼaʼ kʼibat ka jólkʼaʼ i kʼij abal ka exóbnaʼ an Biblia. ¿Jantʼoj a éjtowal ka tʼajaʼ? Ka ajiychik Filipenses 1:10 ani ka tsálpaychik kʼal axéʼ:
¿Jantʼoj a tsálpayal abal játs axi más exbadh abal tatáʼ?
¿Jantʼoj a éjtowal ka tʼajaʼ abal etsʼey ka pidhaʼ in jalbíl an exobintaláb kʼal an Biblia?
Max ki tʼuchiy jun i bote kʼal i arena ani talbél ki exaʼ ki balchij i tʼujub, yab neʼets ka exey.
Pero max ka baliy okʼox an tʼujub, walám neʼets ka exey patal an arena. Jayej, max ka tʼajaʼ ta ejatal jawaʼ más exbadh, walám neʼets kit jólkʼan abal ka tʼajaʼ kʼeʼat jantʼoj.
An exobintaláb kʼal an Biblia tu tólmiyal abal ki exlaʼ más a Dios, ani jayej abal ki exlaʼ jantʼiniʼ ki kʼakʼnaʼ. Ka ajiychik Mateo 5:3 ani ka tsálpaychik kʼal axéʼ:
¿Jantʼoj tam alwataláb i bátsʼuwal max etsʼey ki pidhaʼ in exbádh an exobintaláb kʼal an Biblia?
5. Yab ka jilaʼ tit exóbal bélits max it kʼanchinal
Walám neʼets ka waʼtsin i atikláb axi neʼets ti kʼanchij ka exóbnaʼ an Biblia. Ka tsuʼuw jantʼoj watʼey kʼal a Francesco. Ka tsuʼuwchik an VIDEO ani ka tʼilaʼchik jawaʼ a tsuʼuw:
¿Jantʼoj uchan a Francesco kʼal in yanél ani in jaʼúbchik tam ti in ólchij abal kʼwajatak in exobnál an Biblia?
¿Jaleʼ ti lej alwaʼ abal in áynanchij ti exóbal?
Ka ajiychik 2 Timoteo 2:24, 25 ani ka tsálpaychik kʼal axéʼ:
¿Jantʼoj in tsálpayal a jaʼúb ani a yanél kʼal jawaʼ tatáʼ kʼwajat a exobnál?
¿Jantʼoj tu exóbchal axéʼ xi versículos abal kwaʼal ki tʼajaʼ, tam ku kʼanchat ki exóbnaʼ an Biblia? ¿Jaleʼ ti kwaʼal ki tʼajaʼ antsanáʼ?
6. Ka belaʼ abal a Jehová neʼets ti tólmiy
Tam ka exlaʼ más a Jehová, más neʼets ka léʼnaʼ ka tʼajaʼ jawaʼ Jajáʼ in kulbetnál. Walám junchikíl neʼets ki atsʼaʼ kʼibat ki tʼajaʼ jawaʼ i exobnál ban Biblia. Tam ka atsʼaʼ antsanáʼ, ka tʼilaʼ abal a Jehová neʼets ti tólmiy. Ka tsuʼuwchik an VIDEO ani ka tʼilaʼchik jawaʼ a tsuʼuw:
¿Jantʼoj koʼoy kin tʼajaʼ a Jim abal kin ejtow kin kulbedhaʼ a Jehová?
¿Jantʼoj játs axi más a kulbétnaʼ kʼal jawaʼ in tʼajaʼ a Jim?
Ka ajiychik Hebreos 11:6 ani ka tsálpaychik kʼal axéʼ:
¿Jantʼiniʼ neʼets ka tólmiyat kʼal a Dios, jitaʼchik in tsápnanchal ka utey kʼal Jajáʼ?
¿Jantʼiniʼ a tsálpayal abal in atsʼál a Jehová tam kin tsuʼuw an tsapláb axi a tʼajál abal ka exóbnaʼ an Biblia?
JAWAʼ TALCHIK IN TSÁLPAYAL: «¿Jaleʼ ta alkʼidh ajiyal an Biblia?».
¿Jantʼiniʼ neʼets ka tókʼtsiy?
JAWAʼ I EXOBNÁMAL
Walám xowéʼ ka atsʼaʼ kʼibat ka exóbnaʼ an Biblia, pero axéʼ neʼets ti tólmiy abal ka ejtow kit kʼwajiy abal etsʼey. Max etsʼey ka belaʼ kʼal a Jehová, Jajáʼ neʼets ti lej labliy.
Ki tʼilaʼ jawaʼ i exóbnaʼ
¿Jaleʼ a pidhál yan in jalbíl jawaʼ a exobnál ti Biblia?
¿Jantʼoj kwaʼal ka tʼajaʼ tam ka exlaʼ jawaʼ játs axi más exbadh?
¿Jaleʼ in tomnál ka konchij a Jehová abal ti tólmiy ka áynanchij ka exóbnaʼ an Biblia?
KA EXÓBNAʼ JANTʼOJ ÍT
Ka exóbnaʼ tseʼ i tsalap axi in tolmiyámal yan i atikláb abal kin eyendhaʼ alwaʼ an kʼij.
«Jantʼiniʼ ki eyendhaʼ alwaʼ an kʼij» (¡Despertad!, febrero de 2014)
Jun i mimláb in léʼak kin tʼojonchij a Jehová pero yab u lej tolmiyábak kʼal in tomkíl. Ka tsuʼuw jantʼiniʼ ti tólmiyat kʼal a Jehová.
A Jehová tu pidhál an tsapláb abal ki támetnaʼ an kʼibataláb (5:05)
Ki tsuʼuw jantʼiniʼ jun i mimláb in tólmiy in tomkíl kom in áynanchij ti exóbal.
Waʼats yan axi in ulal abal an ólchixchik kʼal a Jehová in tʼajál abal an yaneláb ka bukʼlaxin. ¿Walám chubax nixéʼ?