KONOWIXTALÁB 5
¿Walám in tomnál ki bela’ jawa’ in ulal an Biblia?
Ók’xidh ka exla’ jun i atikláb, ¿a tsalpayámal lej pil k’al jawa’ chubax in ey? Pel walám kom a ats’ámal abal k’e’at i atikláb in ulumal jant’oj tin kwéntaj jajá’. Pero tam ta exla’, a t’aja’ ti kwéntaj abal yab játs antsaná’ jant’ini’ ti uchnének. Nixé’ játs in t’ajámal ti kwéntaj yan i atikláb tam kin exóbna’ an Biblia.
Yan i atikláb axi exoblámadh yab in lej kulbetnál jawa’ in ulal an Biblia. ¿Jale’? Kom junchikíl lej pilits jant’ini’ tu wilk’áb jawa’ in ulal, ani u tejwamél ejtíl max pel an Biblia axi u úk’pinal ani yab in ulal jant’oj tekedh. ¿Walám u olchinének jant’oj axi yab tekedh tin kwéntaj axé’ xi libro?
Biyat a ajiyalak axé’ xi folleto, ¿a jík’pa’ ka exla’ abal an Biblia biyálits in olnámal jawa’ an científicos ítek’ij tin exlámal? Yan i atikláb in jik’pamal axé’, ani jayej in jik’pamal kin t’aja’ ti kwéntaj abal an Biblia yab in olnál abal a Dios in ts’ejka’ an k’aylál, ani patal an ejataláb ti akak a k’icháj. An Biblia yab in olnál jayk’i’ ti tujey an k’aylál ani an Tsabál, jaxtám an científicos in éjtowal kin tsálpanchij jayk’i’ ti tujey.a
Jayej, kom an Biblia yab in lej olnál jant’ini’ ti a Dios in ts’ejka’ an k’aylal ani an Tsabál, an científicos in éjtowal kin uluw jawa’ in tsálpayal. Jawa’ an Biblia in olnál játs abal a Dios in ts’ejka’ patal jawa’ in kwa’al i ejataláb ani «in ts’ejka’ ti junchik» (Génesis 1:11, 21, 24). Axé’ xi tsalap lej pilits k’al jawa’ an científicos in belál, pero wa’ats k’e’at i tsalap axi an científicos in ejtowámal kin tejwamedha’ ani an Biblia jayetsej in olnál. Ets’ey tejwamének abal jawa’ in tsálpayal an atiklábchik ne’ets ti jálk’unal, pero max jant’oj pel chubax yab u jálk’unal.
Yan i atikláb yab in lé’ kin bela’ k’al an Biblia kom k’ambiyamej k’al k’e’at i belomtaláb. In t’ajámalchik ti kwéntaj abal yan i belomtaláb u janamkaw, u kwe’ ani u otsel k’al i pextaláb. Pero, ¿walám in tomnál ki pojka’ an Biblia expidh kom jita’ in ok’nál jun i belomtaláb yab in t’ajál jawa’ in tomnál? Yan i atikláb axi in belál tin kwéntaj an evolución yab in kulbetnál abal k’al jita’chik u tólmiyab, kin ódhna’ k’e’at i atikláb expidh kom yab u tsálpaxchik ejtíl jajá’. Kom yan i atikláb axi in belál tin kwéntaj an evolución antsaná’ in t’ajámal, ¿walám in tomnál ki kawíliychik? Jawa’ in tomnál ki t’aja’, játs ki exla’ jale’ tin tsálpayal antsaná’ ani ki tsu’uw max chubax.
Max k’wajat a ajiyal axé’ xi folleto, tu kániyal ka tsu’uw jawa’ in ulal an Biblia. Ne’ets ka t’aja’ ti kwéntaj abal lej pilits k’al jawa’ in olnál yan i belomtaláb. Ne’ets ka t’aja’ ti kwéntaj abal yab tu exóbchal tu pejéx, nibal ki pojka’ k’e’at i atikláb. Tu exóbchal abal max jun i atikláb in lé’ kin t’ojonchij a Dios, yab kwa’al ka pejéxin, nibal kin dhaya’ i lokotaláb tin ichích abal kin k’wiya’ k’e’at i atikláb (Isaías 2:2-4; Mateo 5:43, 44; 26:52). An Biblia yab tu nixál k’al i tsapláb ki alk’idh bela’ k’al jant’oj. Tu tejwamédhanchal jale’ i éjtowal ki bela’ k’al jant’oj, ani tu exóbchal abal i yéjenchal ki eyendha’ i tsalápil abal ki t’ojonchij a Dios (Romanos 12:1; Hebreos 11:1). Yab tu exóbchal abal yab ki t’aja’ i konowixtaláb, jawa’ tu exóbchal játs ki aliy an tok’tsixtaláb k’al jawa’ i lé’ ki exla’.
Jun i t’iplab. Walám a tsalpayámal tin kwéntaj axé’, ¿jale’ ti wa’ats yan i yajchiktaláb max wa’ats jun i Dios? An Biblia in tók’tsiyal axé’ ani k’e’at i konowixtaláb, ani jawa’ ka exóbna’ ne’ets ka lej kulbétna’.b Tu lej kániyal ka áynanchij ka aliy an chubaxtaláb. An Biblia ne’ets ti pidha’ i tok’tsixtaláb axi chubax, ani ne’ets ti tejwamédhanchij jale’ ta éjtowal ka bela’. Yab alk’idh ti dhuchadh taná’.
a Ne’ets ka ela’ más i olchixtaláb ban folleto ¿Es la vida obra de un Creador?, axé’ in ts’ejkamal an ólchixchik k’al a Jehová.
b Ka tsu’uw an capítulo 11 in k’ál an libro ¿Qué enseña realmente la Biblia?, axé’ in ts’ejkamal an ólchixchik k’al a Jehová.