Yán i atiklábchik in jilámal ka kʼalej kin atsʼaʼ in Káwintal a Dios kom yab tokʼtsinchámej an konówixtaláb axi in tʼajál tin kwéntaj in ejatal. Tám, ¿jaleʼ tin tomnál kit kʼalej ti tamkuntaláb axi in tʼajál an ólchixchik kʼal a Jehová? ¿Jantʼoj neʼets ka tsuʼuw tanáʼ?

Neʼets ka atsʼaʼ kʼijidh kit kʼwajiy kʼal i atiklábchik axi kʼanidhom ani alwaʼ inik. Ti kʼaʼál siglo, an belomchik axi chubax u tamkunalak abal kin kʼakʼnaʼ a Dios, kin exobnaʼ an Biblia ani abal ka kʼanidháxin ani ka tólmíxin (Hebreos 10:24, 25). Al nixéʼ xi tamkuntaláb in atsʼalakchik kʼán (2 Tesalonicenses 1:3; 3 Juan 14). Xóʼ i tʼajál jayetsejkʼij, u támkunal ani i atsʼál lej kʼijidh ku kʼwajiy kʼal an epchalábchik.

Neʼets ka exobnaʼ jantʼiniʼ ti ka punuw ti tʼajbiláb jawaʼ in ólnál an Biblia. Ti biyál, an israelitas u tamkunalakchik abal ka exóbchat in Káwintal a Dios. Xóʼ ta kʼicháj, wawáʼ jayej u támkunal abal ku exóbchat jantʼiniʼ ti ki punuw ti tʼajbiláb jawaʼ in ólnál an Biblia (Deuteronomio 31:12; Nehemías 8:8). Patal axi u kʼalel ti tamkuntaláb, in ejtowal ka ajtin ani kin tókʼtsiy an konówixtaláb axi u tʼajnal tanáʼ. Antsanáʼ, in ejtowal kin tejwamedhaʼ an aychixtaláb axi in kwaʼal (Hebreos 10:23).

Neʼets ka ejtow ka tsapikmédhaʼ a bélomtal kʼal a Dios. An abatwalej Pablo in uchaʼ jún i tamkuntaláb axi waʼatsak tin kʼichájil: «U lej léʼ tu tsuʼuw [...] abal [...] ku junat tsaplíxin jún kʼal xi jún, kom junax i belal a Cristo» (Romanos 1:11, 12). Ku tsuʼuxin ti tamkuntaláb kʼal an epchalábchik tu tsapikmedhanchal i bélomtal ani in tʼajál abal etsʼey ki léʼnaʼ ki tʼajaʼ jawaʼ in ulal an Biblia.

¿Jaleʼ ti yab tu junál ti tamkuntaláb abal ka tsuʼuw ta kwetémtal jawaʼ u tʼajnal tanáʼ? Kʼijidh neʼets ki atsʼaʼ kit kʼwajiy kʼal wawáʼ. Yab u konoyáb i tumín ani yab kwaʼal ka jálbiy abal kit otsits.

• ¿Jawa játs an tʼiplab axi aynál abal ki tʼajaʼ an tamkuntaláb?

• ¿Jantʼiniʼ tu tólminchal ku kʼalej kʼal an tamkuntaláb?

Yab i kwéntaj max kwaʼal ku beláts ów, max ulel i áb o max dhijiy i kʼakʼal, etsʼey u kʼalel ti tamkuntaláb. ¿Jaleʼ ti tsápnanchal ku tamkun kʼal an epchalábchik bélakits max kwaʼal ki watʼenchij yán jantʼoj o u tsekenek?

Tu tólminchal ku kʼwajiy alwaʼ. An abatwalej Pablo in uchaʼ axéʼ xi káw axi u tamkunalakchik tin kʼichájil: «Ku tʼajáxin ti kwéntaj jún kʼal xi jún» (Hebreos 10:24). Ku tʼajáxin ti kwéntaj in léʼ kin uluw «ka lej tʼajaʼ ti kwéntaj jún jantʼoj». Jawaʼ in léʼ tu ku uchaʼ tejéʼ an abatwalej Pablo pél abal kwaʼal ku exláxin alwaʼ jantʼiniʼ i epchaláb, ku tʼeʼpin kʼal jawaʼ in watʼal axi más. Tam i exlál jún i epchaláb, i tʼajál ti kwéntaj abal jayej jantʼiniʼ wawáʼ, in watʼenchamal yán jantʼoj yajchik, pero bél antsanáʼ in kuxuyamal. Ki exlaʼ axéʼ tu tsapikmédhanchal i bélomtal abal ki aynanchij ki kʼakʼnaʼ a Dios.

In tʼajál ki koʼoy i jaʼubchik axi chubax tu kʼanidhál. An epchaláb axi u kʼalel ti tamkuntaláb i tsuʼtal jantʼiniʼ i jaʼúb, yab expidh jantʼiniʼ i exlowál. Tam junchikíl, jayej u múlkunal abal ku kʼijidhbej jún i wéʼ. ¿Jantʼoj tam alwaʼtaláb i kaldhál tam i tʼajál axéʼ? In tʼajál ku exláxin ani ku kʼanidháxin más. Ani tam jún i epchaláb kʼwajat in yajchiknál, ti adhík i tólmiyal kom lej i kʼanidhál jantʼiniʼ i jaʼúb (Proverbios 17:17). Tam i júnkuwal patal an epchalábchik axi ti tamkuntaláb, i tejwamedhál abal «u junax tolmíx» (1 Corintios 12:25, 26).

Jaxtám tu kaniyal ka tʼajaʼ ta jaʼúb i atiklábchik axi kʼwajat in tʼajál in kulbétal a Dios. Axéʼchik xi jaʼúb neʼets ka elaʼ tin bichówil an ólchixchik kʼal a Jehová. Yab ka jilaʼ abal ni jantʼoj ti tʼokʼbay kit kʼalej tit támkunal kʼal wawáʼ.

• ¿Jaleʼ ti alwaʼ ku tamkun kʼal an epchalábchik axi ti tamkuntaláb?

• ¿Jaykʼij a léʼ tu ku júnaʼ ti tamkuntaláb?

¿Jantʼiniʼ tu tʼajnalak an tamkuntaláb ti kʼaʼál siglo? Jajáʼchik u ajatak, u ól ani in exobnálakchik an Biblia (1 Corintios 14:26). Tam tatáʼ kit kʼalej al an tamkuntaláb axi wawáʼ i tʼajál, neʼets ka tsuʼuw abal u tʼajnal jayetsekʼij.

U exobchinal jantʼiniʼ ti ki punuw ti tʼajbiláb jawaʼ tal ti Biblia. Tin taltal an semana, an ólchixchik kʼal a Jehová u támkunal abal kin atsʼaʼ jún i tʼilomtaláb axi kaldhach ti Biblia, axéʼ in tʼójonchal 30 i minutos. Tanáʼ u ólchinal jantʼiniʼ tu tólmiyal an Biblia ti ejatal. Jaxtám tu kaniyab ki aliy an textos al an Biblia. Talbél in tujchal an Exobintaláb de La Atalaya. Axéʼ in tʼójonchal jún i hora. Wawáʼ i ejtowal ki tókʼtsiy an konówixtaláb axi u tʼajnal. Axéʼ xi revista tu tólmiyal ki punuw ti tʼajbiláb ti ejatal jawaʼ tu exóbchal in Káwintal a Dios. Waʼats watʼadh ciento diez mil i tamkuntaláb tin puwél an Tsabál ani al kʼalejkʼij u exobnáb axéʼ xi revista.

Tu tólminchal ku bajudhméj jantʼiniʼ i exóbchix. Jayej u támkunal jún i kʼicháj ti semana. Axéʼ xi programa u watʼbab ti óx i péjach. An kʼaʼál, pél an Exobintaláb kʼal an Biblia ti Tamkuntaláb, in tʼójonchal 30 i minutos. Axéʼ tu tólminchal ki exbay más alwaʼ an abatnaxtaláb axi a Dios tu pidhál ani an kʼejkáw axi tal ti Biblia. U tʼajnal tin ebál i konówixtaláb ani i tokʼtsixtaláb. An tsábchil, pél an Escuela abal ku Bajudhméj tin Tʼojlábil a Dios, in tʼójonchal 30 i minutos. Tejéʼ u wilkʼáb tálchik i capítulos axi okʼxidh i ajiy ti kʼimáʼ. Jayej i ejtowal ki dhayaʼ i kʼubak abal ki olnaʼ jantʼiniʼ tu tólmiyal axi ajiy. Talbél, axi kʼwajatchik dhuchadh al nixéʼ xi escuela in watʼbálchik jún i tejwamedhomtaláb. Ani axi in ókʼnál an escuela tu uchál juʼtáj kwaʼalej ku tʼójon abal ki ejtow tu ajum ani tu káw más alwaʼ (1 Timoteo 4:13). An oxchíl pél, an Tamkuntaláb abal ku Bajudhméj tu Ólchix, in tʼójonchal treinta i minutos. Tanáʼ u olchab tin ebal i tʼilomtaláb ani kʼal jawaʼ u watʼbab jantʼiniʼ ti ejtowal ki eyendhaʼ an Biblia abal ki tólmiy an atiklábchik.

Jawaʼ u exóbchinal ti Biblia ti tamkuntaláb lej alwaʼ. Tatáʼ neʼets ka tsuʼuw nixéʼ tam kit kʼalej (Isaías 54:13).

• ¿Jantʼoj neʼets ka exobnaʼ al an tamkuntaláb axi in tʼajál an ólchixchik kʼal a Jehová?

• ¿Kʼal jawaʼ tam tamkuntaláb axi tsuʼuw ebal a léʼ tu ku júnaʼ?

¿A tsuʼuwits ti fotografía jantʼiniʼ tu kʼalel lej tsʼejkadh ti tamkuntaláb an ólchixchik kʼal a Jehová? ¿Jaleʼ ti u kʼalel tʼokat ani alwaʼ tsʼejkadh ti tamkuntaláb?

Kom i kʼakʼnál a Jehová. Chubax abal jawaʼ a Dios tu tʼajchal ti kwéntaj pél i ichích, yab i kʼwaʼchímal (1 Samuel 16:7). Max tam ku kʼalej ki kʼakʼnaʼ a Dios, ku kʼalej tʼokat ani alwaʼ tsʼejkadh i tejwamedhál abal i kʼakʼnál jajáʼ ani an epchalábchik. Jún i éyal i lej kʼakʼnál, max ku kʼalejak ki tsuʼuw, yab neʼets ku kʼalej luklichik o mitsʼichik ¿yab aníts? Jayetsejkʼij, tam u kʼalel tu támkunal u kʼalel tʼokat ani alwaʼ tsʼejkadh kom antsanáʼ i tejwamedhál abal i kʼakʼnál an «Púlik Éyal tin puwél an tsabál», a Jehová Dios, ani jawaʼ jajáʼ tu exóbchal (Génesis 18:25).

I tejwamedhál jawaʼ a Jehová tu exóbchal. An Biblia tu ólchal abal kwaʼal ku kʼwáʼchiman «jantʼiniʼ tin tomnál» (1 Timoteo 2:9, 10). Ku kʼwáʼchiman «jantʼiniʼ tin tomnál» in léʼ kin uluw abal yab ki punuw i kotón axi kin tʼajaʼ abal an atiklábchik tu ku lej metʼaʼ. Jayej in léʼ kin uluw abal i tʼajál ti kwéntaj abal i kʼwaʼchímal yab ka kʼwajiy luklidh o mitsʼichik. I ejtowal ki kaʼiy jawaʼ wawáʼ más ki kulbetnaʼ tʼajadh ti kwéntaj jawaʼ in ulal an Biblia. Tam u tsʼejkanal alwaʼ «patal neʼets kin tsuʼuw in alwáʼ an exobchixtaláb tin kwéntaj a Dios an kʼánix» antsanáʼ i puwénchal a Dios abal íb ku káwin (Tito 2:10; 1 Pedro 2:12). Ku kʼalej lej tsʼejkadh ti tamkuntaláb in tʼajál abal kʼeʼat i atiklábchik ka káwin alwaʼ tin kwéntaj in bichówil a Jehová.

Abal ku tejwamej alwaʼ yab in yéjenchal i kotón ít o axi lej jalbidh. Tatáʼ a ejtowal kit kʼalej ti tamkuntaláb abal íb ka koʼoy a kotón axi ít o axi lej alabél.

• ¿Jaleʼ ti lej exbadh ki tʼajaʼ ti kwéntaj i kotón tam u kʼalel ki kʼakʼnaʼ a Dios?

• ¿Jawaʼ tam principios tu tólmiy ki tsuʼuw jantʼiniʼ ku kʼwáʼchiman ani ku tsʼejkan?

Max a exobnálits an Biblia kʼal jún i ólchix kʼal a Jehová, walám a ujnámits ka okʼxidh ajiy jawaʼ neʼets kit ólchin nixéʼ xi semana. Alwaʼ ki tʼajaʼ jayetsejkʼij kʼal jawaʼ neʼets ki tsuʼuw ti tamkuntaláb. Antsanáʼ neʼets ki más exbay jawaʼ ku exóbchin. Alwaʼ ka dhuchaʼ al jún i úw an kʼicháj jaykʼij neʼets ka tʼajaʼ axéʼ.

Ka tsuʼuw jaykʼij ani juʼtáj a ejtowal kit exobláts. ¿Jaykʼij ta ejtowal kit exobláts más alwaʼ? ¿Tam kit tsʼakiy, tam wákal o akal tam an tsakam ka kʼalejits ti wáyal? Ka tákuy jún i kʼij axi tatáʼ neʼets ka eyendhaʼ abal kit exobláts. Yab in tʼajál max wéʼ i kʼij axi neʼets ka jólkʼanchij, pero yab ka jilaʼ abal ni jantʼoj ti tʼokʼbay ka tʼajaʼ nixéʼ. Ka aliy kit exobláts juʼtáj ka kʼwajiy tsʼibibidh. Abal kit exobláts más alwaʼ ka tepdhaʼ an televisión, an radio ani an teléfono. Ka ólonchij a Jehová okʼxidh ka tujuw tit exóbal abal ka ejtow ka punuw a tsalápil al an exobintaláb (Filipenses 4:6, 7).

Ka kiloy an tokʼtsixtaláb ani ka dhayaʼ a kʼubak tam ka tʼajan an konówixtaláb. Okʼox ka tsuʼuw jawaʼ neʼets ka ajiy, ejtíl in bij an párrafo, an tʼiplab an káw axi tal mukudh tʼunuʼ. Talbél ka ajiy ti junchik an párrafo ani ka aliy in tokʼtsixtal an konówixtaláb axi kʼwajat alál. Jayej ka aliy ani ka ajiy an textos axi kʼwajat ti párrafo talbél ka tsuʼuw jantʼiniʼ u junkunal kʼal jawaʼ kʼwajat a ajiyal (Hechos 17:11). Tam ka elaʼ in tokʼtsixtal an konówixtaláb, ka kiloy abal ka tʼilaʼ tam kit kʼwajiy ti tamkuntaláb. Ani max a léʼ a ejtowal ka dhayaʼ a kʼubak abal ka bínaʼ a tokʼtsixtal ta kwetém káwintal.

Al an pilchik exobintaláb axi kóʼoyal ti semana ti tamkuntaláb neʼets ti tólmiy ka balchij ít i tsalap an «kʼalab» axi i kwaʼal tin kwéntaj an Biblia (Mateo 13:51, 52).

• ¿Jantʼoj tam programa a ejtowal ka tʼajaʼ abal ka okʼxidh exobnaʼ jawaʼ neʼets ka watʼbáj o ka tsuʼtat ti tamkuntaláb?

• ¿Jantʼiniʼ a ejtowal ka tsʼejkaʼ jún i tokʼtsixtaláb okʼxidh kit kʼalej tit támkunal?

Ma ti biyal, a Jehová etsʼey in leʼnamal abal an tatalábchik ani an tsakam ka kʼwajiy júnkudh abal kin tsapikmedhachik in belomtal kʼal a Dios ani ka exláxinchik (Deuteronomio 6:6, 7). Jaxtám, an ólchixchik kʼal a Jehová ti semana i jólkʼanchal jún i kʼij abal ku utey kʼal a Dios jantʼiniʼ i yanéláb. Okʼox i tʼajál ti kwéntaj an yejenchixtaláb axi in kwaʼal i yanél tin kwéntaj a Dios ani tam, i aliyal i tolmixtaláb tin kwéntaj nixéʼ, axéʼ i tʼajál jantʼiniʼ max u kʼwajatkʼij tu tʼilom kʼal i yanél. Max tatáʼ it kʼwajíl kwetem jayej a ejtowal ka koʼoy axéʼ xi exobintaláb tin kwéntaj i temas bíblicos, ka tsuʼuw a yejenchixtal espiritual axi a kwaʼal ani tam ka aliy jantʼoj in ulal an Biblia tin kwéntaj nixéʼ.

Axéʼ xi exobintaláb tu utuwál más kʼal a Jehová. «Kit utat kʼwajiy kʼal a Dios ani jajáʼ neʼets ka utat kʼwajiy kʼal tataʼchik.» (Santiago 4:8.) Tin ebal an Biblia i ejtowal ki exlaʼ in éy a Jehová ani patal jawaʼ jajáʼ in tʼajámal. ¿Jantʼiniʼ ti ejtowal ki tujuw axéʼ xi exobintaláb? I ejtowal ki eyendhaʼ an programa in kʼal an Exobintaláb abal kit Bajudhméj tin Tʼojlábil a Dios. Kʼalejkʼij in ejtowal kin ajiy junchik i péjach de an Biblia, ani talbél kin uluw jawaʼ in exbay.

Jayej in tʼajál ku más junkun kʼal i yanél. Tam i exobnál an Biblia kʼal i yanél axi ti kʼimáʼ in tʼajál abal ku más kʼanidháxin. Patal i yanél axi ti kʼimáʼ kwaʼal kin aychij kulbél an kʼij axi kwaʼal abal axéʼ xi exobintaláb. An tatalábchik kwaʼal kin aliy jún i tema axi uchbidh abal in tsakámilchik. Waʼats yán i tolmixtaláb ejtíl an revista La Atalaya ani ¡Despertad! o an página ti Internet, jw.org. Jayej in ejtowalchik kin tsuʼuw jantʼoj tam kʼibataláb exom in tametnál in tsakámil ti escuela. Maxʼíj in ejtowal kin okʼxidh ajatnaʼ an kʼaniláb axi neʼets ka ajatnáj ti tamkuntaláb. Ani tin taltal a ejtowalchik ka kʼapuw o ka utsʼaʼ jantʼokitskʼij.

An kʼij axi i eyendhál abal ku útey kʼal a Jehová junax kʼal i yanél in tʼajál ki atsʼaʼ kʼijidh ki exobnaʼ an Biblia. Jawákits tam tsápláb axi ki tʼajaʼ abal etsʼey ki koʼoy axéʼ xi exobintaláb junax kʼal i yanél a Jehová neʼets tu ku lej láblinchij (Salmo 1:1-3).

• ¿Jaléʼ ti kaldhál i kʼij abal ki exobnaʼ an Biblia junax kʼal i yanél?

• ¿Jantʼoj in ejtowal kin tʼajaʼ an tataláb abal tam ka kʼwajiychik ti exóbal, in yanél kin atsʼaʼ kʼijidh ani kulbél?

¿Jaleʼ axéʼchik xi atikláb kʼwajat lej kulbél? Kom kʼwajatchik al jún i púlik tamkuntaláb. Ti biyál in bichówil a Dios u konchábak ka tamkun óxíl ti tamub. Xóʼ ta kʼicháj, wawáʼ aniyej u lej kulbél ku tamkun kʼal patal an epchalábchik (Deuteronomio 16:16). Ti tamub i tʼajál óx i púlik tamkuntaláb: tsáb i púlik tamkuntaláb ti circuito axi jún a kʼicháj, ani an púlik tamkuntaláb regional axi óx a kʼicháj. ¿Jantʼiniʼ tu tólmiyal axéʼchik xi púlik tamkuntaláb?

In tʼajál ki kʼanidhaʼ más an epchalábchik. An israelitas u lej kulbélakchik ka kʼalej kin kʼakʼnaʼ a Jehová ti púlik tamkuntaláb, ani xóʼ wawáʼ aniyej kʼijidh i atsʼál ku tamkun kʼal an epchalábchik ti púlik tamkuntaláb (Salmo 26:12, ka tʼajaʼ ti kwéntaj; 111:1). Axéʼchik xi tamkuntaláb in tʼajál ku junkun kʼal kʼeʼat i epchalábchik axi u kʼwajíl pil i kwenchal, pil i bichow o país. Ti tsʼejel kʼicháj tajnayej juʼtáj tu mulkunének u koyol jún i wéʼ abal ti yanel ku kʼapúts junax. Al axéʼ xi kʼij u tʼilom ani i exlál kʼeʼat i epchalábchik (Hechos 2:42). Tanáʼ i tsuʼtal an kʼanidhomtaláb axi in tʼajál ka kʼwajiy júnkudh an kwenél i epchalábchik axi tin puwél an Tsabál (1 Pedro 2:17, NM).

In tʼajál ka tsapikméj i bélomtal. An israelitas lej tólmiyatchik kin «[exbay] an káw» axi u exobchábak tin kwéntaj an Biblia (Nehemías 8:8, 12). Wawáʼ aniyej i lej punchal in jalbíl jawaʼ u exóbchinal ti púlik tamkuntaláb. Patal axéʼ kaldhach al jún i tema bíblico. Tin ebal i tʼilomtaláb ani jawaʼ u watʼbab u exobcháb jantʼiniʼ ti ki tʼajaʼ in kulbétal a Dios. Jayej in tʼajál ka tsapikméj i bélomtal ki atsʼaʼ tin kwéntaj i atiklábchik axi in tametnámal yán i tʼeʼpintaláb ani bél antsanáʼ in ejtowamal kin tʼajaʼ in kulbétal a Dios. Al an púlik tamkuntaláb regional axi óx a kʼicháj u watʼbab jún i tejwamedhomtaláb tin kwéntaj jún i tʼilab axi ti Biblia, tam junchikíl u watʼbab kʼal i kʼwaʼchim axi u éynalak ti biyál. Axéʼ in pidhál in tsap an tʼilab axi ti Biblia ani in tʼajál ki exbay abal ka ulits ti ichích. Aniyej al kʼalejkʼij tam púlik tamkuntaláb yán i atiklábchik in tejwamedhál kʼal in pújantal abal in léʼ kin tʼajchij in kulbétal a Dios.

• ¿Jaleʼ ti an púlik tamkuntaláb lej exbadh ani kʼijidh abal wawáʼ?

• ¿Jantʼiniʼ ti neʼets ti tólmiy kit kʼalej ti púlik tamkuntaláb?

Okʼxidh ka tsemets, a Jesús in uluw: «Axéʼ xi alwaʼ káw tin kwéntaj in Eyaltal a Dios neʼets ka olnáj tin puwél an tsabál abal patal an atiklábchik kin exlaʼ. Ani tam neʼets ka chích an taltalab» (Mateo 24:14, NM). Pero, ¿jantʼiniʼ ti neʼetsak ka bináj ka exláj tin puwél an Tsabál an alwaʼ káw tin kwéntaj in Eyaltal a Dios? Aynadh an tʼiplab axi in jilaʼ a Jesús tam ti kʼwajiy tejéʼ ti Tsabál (Lucas 8:1).

I tsaʼbiyal an atiklábchik tin kʼimáʼ. A Jesús in exóbchij in aykólilchik jantʼiniʼ ti kin olnaʼ an alwaʼ káw kʼimádh ti kʼimádh (Mateo 10:11-13; Hechos 5:42; 20:20). An áykolchik axi ti kʼaʼál siglo bijchin juʼtáj ti kwaʼalakchik ka kʼalej kin olnaʼ an alwaʼ káw (Mateo 10:5, 6; 2 Corintios 10:13). Jayetsejkʼij xóʼ, i tʼojlábil tu ólchix kʼwajat lej alwaʼ tsʼejkadh, ani kʼalejkʼij an tamkuntaláb u bijchinal ma juʼtáj wichat neʼets ka tʼojon kin olnaʼ an alwaʼ káw. Axéʼ tu tólmiyal ku káwin kʼal patal an atiklábchik axi ki ejtow ani antsanáʼ ki putuw an tʼojláb axi tu jilchij a Jesús abal «ki olnaʼ tin puwél an Tsabál» an alwaʼ káw (Hechos 10:42, NM).

I tsápnanchal ki aliy an atiklábchik juʼtámakits ka kʼwajiy. A Jesús in punuw an tʼipláb, juʼtáj kin elaʼak i atiklábchik in tawnalak tin kwéntaj a Dios. Ejtíl tin wal an púlik lejem o ti mom (Marcos 4:1; Juan 4:5-15). Wawáʼ aniyej i tsápnanchal tu tʼilom tin kwéntaj a Dios kʼal patal an atiklábchik juʼtámakits ka kʼwajiy: ti bél ti itsʼeʼ ti plaza, juʼtáj tu nujulchik ani por teléfono. Jayej i ólchal tin kwéntaj a Dios i juntal kʼwajíl, i juntal tʼojnal, i juntal exóbal ani tam ki ejtow i jaʼub. Axéʼ in tʼajámal abal yán i atiklábchik tin puwél an Tsabál kin ejtow kin atsʼaʼ «an alwaʼ káw abal an kʼanixtaláb» (Salmo 96:2).

Ka tsalpay al jún i atikláb axi a léʼ ka ólchij an alwaʼ káw tin kwéntaj in Eyaltal a Dios ani ka tsalpay al an alwaʼtaláb axi neʼets kin koʼoy max kin exlaʼ axéʼ. Tam, yab ka jilaʼ expidh abal tatá jawaʼ it kʼwajat a exobnál tin kwéntaj an Biblia ka ólchij jitákits ka ejtow.

• ¿Jantʼoj tam «alwaʼ káw» kwaʼal ki ólnaʼ?

• ¿Jantʼiniʼ tin nitsʼbiyal an ólchixchik kʼal a Jehová in tʼiplábil a Jesús tin kwéntaj an tʼojláb ti ólchix?

An káw precursor in léʼ kin uluw jún axi in tujchal kin kʼaʼal jápiy jún i bél abal axi más kin aynaʼ. I ejtowal ki uluw abal a Jesús pélak jún i precursor kom ában ti Tsabál kin olnaʼ an alwaʼ káw axi in bínál i ejataláb ani kin jápiy an bél abal an atiklábchik ka beláts tanaʼ abal kin ejtow ka kʼanin (Mateo 20:28). Xoʼ i aynál an tʼiplab axi in jilaʼ jajáʼ ani i kaldhál patal an kʼij axi ki ejtow abal ki aliy mas i áykol (Mateo 28:19, 20). Jaxtám ti tálchik in tʼajál ti precursor.

Atikláb axi in eyendhál yán i kʼij ti ólchix. Patal an ólchixchik kʼal a Jehová u kalel ki olnaʼ an alwaʼ káw. Pero waʼats axi in jolkʼanchalchik más i kʼij ti ólchix. Ejtíl an precursores regulares, jajachik in tʼajál setenta horas ta ítsʼ. Abal kin putuw kʼal an setenta horas kwaʼal kin aliy jún i tʼojláb axi ka jilan kin tʼajaʼ axéʼ. Jayej kʼwajatchik axi u bijiyáb ti precursores especiales, axéʼchik u takuyab abal ka kʼalej ti tolmix ólchix juʼtáj waʼats más i yejenchixtaláb. Jajachik in tʼajál ciento treinta horas o más ti ólchix ta ítsʼ. Patal axéʼchik xi atikláb u kulbél kʼal jawaʼ in kwaʼal kom in exlál abal a Jehová etsʼey neʼets kin pidhaʼ jawaʼ kin yejenchij (Mateo 6:31-33; 1 Timoteo 6:6-8). Jitaʼ yab in ejtowal kin tʼajaʼ setenta o ciento treinta horas ti ólchix ta ítsʼ, in ejtowal kin tʼajaʼ treinta o cincuenta horas ta ítsʼ, axéʼchik u bijiyáb ti precursores auxiliares.

In tʼajálchik ti precursor kom in lej kʼanidhál a Dios ani an atiklábchik. A Jesús in tsuʼtalak abal an atiklábchik in yéjenchalak ka utey kʼal a Dios ani kin exlaʼ jawaʼ a Dios neʼets kin tʼajaʼ. Wawáʼ aniyej i tsuʼtal nixéʼ (Marcos 6:34). Pero i kwaʼal an chubaxtaláb axi ti Biblia axi in ejtowal kin tólmiy an atiklábchik kom in pidhál i aychixtaláb abal ku kʼwajiy más alwaʼ axi taʼtal a kʼicháj. An precursor kom in lej kʼanidhál an atiklábchik in bínál an kʼij ani in tsap abal kin tólmiy kʼeʼat kin exlaʼ tin kwéntaj a Dios (Mateo 22:39; 1 Tesalonicenses 2:8). Patal axéʼ in tʼajál abal an precursor ka tsapikméj in bélomtal, ka utey más kʼal a Dios ani kin atsʼaʼ lej kulbél (Hechos 20:35).

• ¿Jantʼoj játs jún i precursor?

• ¿Jantʼoj in tʼajál abal tálchik i ólchix kin leʼnaʼ kin tʼajaʼ ti precursor?

An exobchixtaláb teocrática pél jantʼoj axi expidh an Ólchixchik kʼal a Jehová in batsʼuwal. Kom kʼal axéʼ xi exobchixtaláb u bajudhmedhab jitaʼchik in jilál yán i kʼij abal ka tʼójon júnkudh ani antsanáʼ kin putuw an tʼojláb ti ólchix jantʼiniʼ tin uchbíl. (2 Timoteo 4:5).

Escuela abal an Precursores. Tam an precursor kin putuw jún i tamub ti ólnom u kaniyáb al jún i escuela axi in tʼójonchal seis i kʼícháj, tam junchikíl axéʼ u tʼajnal al jún i Atáj Tamkuntaláb axi utat. Axéʼ in tólmiyal an precursor abal ka útey kʼal a Jehová, kin tʼajaʼ alwaʼ in tʼojlábil ti ólnom ani kin aynanchij putudh al axéʼ xi tʼojláb.

Escuela abal an Ólchixchik. An escuela pél abal ka bajudhmedháj an precursores ani in tʼójonchal tsáb a íts’ axéʼ pél abal jitaʼchik kin léʼnaʼ kin jilaʼ in kʼimáʼ abal ka kʼalej ti ólnom juʼtá ti wa’ats i yejenchixtaláb. Jaxtám, jajáʼchik in ulal: «¡Tejé’ in kʼwajat nanáʼ! ¡Nanáʼ ti kin abaʼ!» antsanáʼ tin nitsʼbiyal in tʼiplábil a Jesucristo an Ólchix más bajudh axi tʼojnének tejé’ ti tsabál (Isaías 6:8; Juan 7:29). Ka kʼalejchik ti kʼwajíl ów tin kʼimáʼ in léʼ kin uluw abal kwaʼalchik kin ujnaʼ kʼeʼat i kʼapnél, ka kʼwajiy juʼtá ti tsamay o juʼtá ti kʼákʼ ani ka kʼwajiy kulbél kʼal jawaʼ kin koʼoy. Jaye tam junchikíl kwaʼal kin exóbnaʼchik pil i kawintaláb. Axéʼ xi escuela in tólmiyal an epchalábchik axi tómkidh ani axi yab tómkidh, axi in kwaʼalchik 23 i tamúb ma 65, abal kin tejwamédhaʼchik i alwaʼ tʼajbiláb axi yejentál tam ka kʼalej ti ólnom ani neʼets ka tolmiyat abal ka eyendhaj más kʼal a Jehová ani kʼal in bichówil.

Escuela kʼal an Biblia axi ti Galaad in kʼal an Watchtower. Ti hebreo an káw «Galaad» in léʼ kin uluw «múkeʼ i tʼujub axi u éynal abal kin bínaʼ ka exláj jún jantʼoj». Ma tin tujtal a Galaad ti 1943, más de ocho mil i misioneros axi kʼalnek ti Galaad abnenek ów tin kʼimáʼ abal kin bínaʼ ka exláj an alwaʼ káw tin «puwél an tsabál» (Hechos 13:47). Ejtíl, tam ti kʼaʼál ulitschik an misioneros ti Perú yabak waʼats ni jún i tamkuntaláb. Xóʼ, waʼats watʼadh 1.000. Tam ti ulitschik ti Japón yabak in bajuwal an laju i Ólchix. Xowé’ waʼats más de doscientos mil. An exobintaláb axi ti Galaad in tʼójonchal bóʼ a íts’, tanáʼ in exobnálchik an Biblia tin putat. Jitaʼchik kʼwajat ti tʼojnal jantʼiniʼ precursores especiales o misioneros, kʼwajatchik ti sucursales o axi u tʼojnal jantʼiniʼ i ókʼnom kʼal an circuito, kʼwajatchik kanidh al axéʼ xi escuela abal ka bajundhaʼ ani antsanáʼ kin tsapikmédhaʼchik an tʼojláb tin puwél an tsabál.

• ¿Jaleʼ ti tʼojojoyame an Escuela abal an Precursores?

• ¿Jitaʼchik kʼwajat kanidh ti an Escuela abal an Ólchixchik?