AJUMTALÁB 26
¿Jaleʼ ti lej waʼats i yajchiktaláb?
Tam u watʼel jun i yajchiktaláb, yan i atikláb in konówiyal: «¿Jaleʼ ti watʼey?». ¡U lej kulbél ki exlaʼ abal an Biblia tu ólchal jaleʼ!
1. ¿Jantʼoj in tʼajaʼ a Satanás abal ka waʼtsin i pojkaxtaláb tejéʼ ban Tsabál?
A Satanás, axi jayej u bijiyáb ti Diablo, in jekʼomnaʼ a Jehová. Jajáʼ in léʼak ti abatnom, jaxtám in tʼajaʼ abal a Adán ani a Eva jayej kin jekʼomnaʼ a Dios. A Satanás in kʼambiy a Eva (Génesis 3:1-5). In tʼajaʼ abal a Eva kin tsalpay abal kʼwajatak ti kʼanchinal jantʼoj alwaʼ kʼal a Jehová. Pel ejtíl max kʼwajatak in uchál abal an atiklábchik neʼets ka kʼwajiy más kulbél max kin jekʼomnaʼ a Dios. An kʼaʼál janamtaláb axi a Satanás in uchaʼ a Eva játs abal yabchik neʼets ka tsemets max ka jekʼombéj. Jaxtám, an Biblia in ulal abal a Satanás «pel i janamkaw ani kʼal jajáʼ játs tu waʼtsindháb an janamtaláb» (Juan 8:44).
2. ¿Jantʼoj in takuy kin tʼajaʼ a Adán ani a Eva?
A Jehová lej alwaʼ inik. In uchaʼ a Adán ani a Eva abal in éjtowalak kin kʼapuw patal an waliláb axi kin tsuʼuw ban jardín de Edén, expidh junkats i waliláb axi yab in éjtowalak kin takaʼ (Génesis 2:15-17). Pero jajáʼchik in léʼnaʼ kin kʼapuw an waliláb axi yab kwaʼalakchik kin takaʼ. A Eva «in yekʼwaʼ an waliláb ani tujey in kʼapal». Talbél, a Adán «jayej in kʼapuw» (Génesis 3:6). Tam, tsablom in jekʼomnaʼ a Dios. A Adán ani a Eva yab wálbidhakchik. Jaxtám, tam tin kʼibchij a Jehová tʼajchíl tin tʼajaʼchik. Jajáʼchik jekʼombéj, antsanáʼ ti wálbinchik ani in tejwamédhaʼ abal yab in léʼakchik ka abatnáj kʼal a Jehová. Kʼal jawaʼ in tákuychik kin tʼajaʼ, in lej yajchiknaʼ (Génesis 3:16-19).
3. ¿Jantʼiniʼ tu odhnál jawaʼ in takuy kin tʼajaʼ a Adán ani a Eva?
Tam ti a Adán ani a Eva in jekʼomnaʼchik a Jehová, wálbinchik ani nixéʼ xi walabtaláb in wátʼbanchij patal in tsakámil. An Biblia in ulal: «Kʼal junkats i inik, a Adán, játs ti tsʼiʼkin o tujey an walabtaláb tejéʼ Tsabál, ani tin ebál an walabtaláb játs tu tsemel an inik. Kom patal walbinének, jaxtám patal u tsemel» (Romanos 5:12).
Tam, ¿jaleʼ i yajchiknál? Junchikíl, kom i tákuyal ki tʼajaʼ jantʼoj axi yab tekedh. Jayej, jawaʼ kin takuy kin tʼajaʼ kʼeʼat i atikláb in éjtowal tu ku ódhnaʼ. Ani junchikíl neʼets ki yajchiknaʼ max ka watʼey jantʼoj juʼtáj tu kʼwajat (ka ajiy Eclesiastés 9:11).
ABAL KA EXÓBNAʼ MÁS
Ka exóbnaʼ jaleʼ ti yab in tomnál ki walbiy a Dios kʼal patal an yajchiktaláb axi waʼats tin puwél an Tsabál. Jayej neʼets ki tsuʼuw jantʼoj in atsʼál tam in tsuʼtal abal i yajchiknál.
4. ¿Jitaʼ játs axi in tʼajál ki yajchiknaʼ?
Yan i atikláb in tsálpayal abal pel a Dios axi in abatnál an xeʼtsintaláb, ¿pero chubax nixéʼ? Ka tsuʼuwchik an VIDEO.
Ka ajiychik Santiago 1:13 ani 1 Juan 5:19, ani ka tsálpaychik kʼal axéʼ:
¿Walám pel a Dios in tʼajál ki yajchiknaʼ?
5. Jawaʼ watʼenek kʼal in wálab a Satanás
Ka ajiychik Génesis 3:1-6 ani ka tsálpaychik kʼal axéʼ:
¿Jantʼoj tam janamtaláb in uluw a Satanás? (Ka exóbnaʼchik an versículos 4 ani 5).
¿Jantʼiniʼ tin tʼajaʼ a Satanás abal a Eva kin tsalpay abal kʼwajatakchik ti kʼanchinal jantʼoj alwaʼ kʼal a Jehová?
¿Jantʼoj in ulal a Satanás abal i yéjenchal abal ku kʼwajiy kulbél?
Ka ajiychik Eclesiastés 8:9 ani ka tsálpaychik kʼal axéʼ:
¿Jantʼoj in watʼamal an xeʼtsintaláb kom yab in jilámal ka abatnáj kʼal a Jehová?
A Adán ani a Eva yabák wálbidh ani u kʼwajílakchik ban Paraíso, pero in jekʼómnaʼchik a Jehová ani in belkaʼ a Satanás.
An walabtaláb, an yajchiktaláb ani an tsemláj bukʼey tin puwél an Tsabál talbél ti jekʼombéjchik.
A Jehová neʼets kin talabédhaʼ an walabtaláb, an yajchiktaláb ani an tsemláj. An atiklábchik neʼets ka tíxkʼanchat an walabtaláb ani neʼets ka kʼwajiy ban Paraíso.
6. A Jehová in yajnál kin tsuʼuw abal i yajchiknál
¿Walám in tʼajál ti kwéntaj a Dios jawaʼ i watʼál? Ka tsuʼuw jawaʼ in dhuchaʼ a David ani an abatwálej Pedro. Ka ajiychik Salmo 31:7 ani 1 Pedro 5:7, ani ka tsálpaychik kʼal axéʼ:
¿Jantʼoj a atsʼál ka exlaʼ abal a Jehová in yajnál tam i yajchiknál?
7. A Dios neʼets kin tixkʼaʼ patal an yajchiktaláb axi waʼats
Ka ajiychik Isaías 65:17 ani Apocalipsis 21:3, 4, ani ka tsálpaychik kʼal axéʼ:
A Jehová in ulumal abal neʼets kin talabédhaʼ patal jawaʼ in tʼajámal abal an atiklábchik kin yajchiknaʼ. ¿Ti kanatbedhál ka exlaʼ axéʼ? ¿Jaleʼ?
¿A exlalak?
A Satanás játs axi kʼaʼál in uluw i janamtaláb tin kwéntaj a Jehová. In tʼajaʼ abal ka tsálpayat abal a Jehová yab u abatnom tekedh. Lej wéʼits a Jehová neʼets kin tixkʼaʼ an yajchiktaláb, antsanáʼ neʼets kin tʼajaʼ abal ka tʼokej in bij. Axéʼ in léʼ kin uluw abal expidh Jajáʼ in éjtowal ti abatnom tekedh. Jawaʼ más exbadh játs ka jilkʼon tʼokat in bij a Jehová (Mateo 6:9, 10).
JAWAʼ TALCHIK IN TSÁLPAYAL: «A Dios in tʼajál ki yajchiknaʼ abal kin tsuʼuw max chubax i kʼanidhál».
¿A tsálpayal abal chubax axéʼ?
JAWAʼ I EXOBNÁMAL
A Satanás, a Adán ani a Eva játs axi in tʼajaʼchik abal ka waʼtsin i yajchiktaláb ban Tsabál. A Jehová in lej yajnál kin tsuʼuw abal i yajchiknál ani in ulumal abal lej wéʼits neʼets kin talabédhaʼ an pojkaxtaláb.
Ki tʼilaʼ jawaʼ i exóbnaʼ
¿Jantʼoj tam janamtaláb uchan a Eva kʼal a Satanás?
¿Jantʼiniʼ tu odhnámal jawaʼ in takuy kin tʼajaʼ a Adán ani a Eva?
¿Jaleʼ ti lej belál abal a Jehová in yajnál kin tsuʼuw abal i yajchiknál?
KA EXÓBNAʼ JANTʼOJ ÍT
Ka exlaʼ jantʼoj in ulal an Biblia abal játs an walabtaláb.
Ka ajiy jantʼoj játs axi in tʼajaʼ a Satanás ka tsálpayat ban jardín de Edén.
«¿Jaleʼ tin jilál a Dios ki yajchiknaʼ?» (La Atalaya, 1 de enero de 2014)
Ka exlaʼ jantʼoj in ulal an Biblia kʼal jun i yajchiktaláb axi watʼey ti biyál. An tokʼtsixtaláb neʼets ti lej kanatbédhaʼ.
«¿Jaleʼ ti tsemets yan i judíos? ¿Jaleʼ ti yab kʼaniyatchik kʼal a Dios?» (Artículo axi ti jw.org)
Ka tsuʼuw jantʼoj in exóbnaʼ jun i inik axi in lej yajchiknaʼ.