AJUMTALÁB 42
¿Jantʼoj in ulal an Biblia tin kwéntaj jitaʼchik tomkidh ani axi yab tomkidh?
Al talchik i bichow u tsalpayáb, abal jun i atikláb kwaʼal ka tómkin abal ka kʼwajiy kulbél. Pero yan i atikláb axi kwetém in atsʼálchik kulbél. Jayej, yab patal axi tómkidh in atsʼálchik kulbél. An Biblia in ulal abal pel jun i tsʼejwalixtaláb max jun i atikláb kʼwajat tómkidh o kʼwajat kwetém.
1. ¿Jantʼoj tam alwataláb waʼats max jun ka kʼwajiy kwetém?
An Biblia in ulal: «Alwaʼ max jun ka tómkin, pero más alwaʼ max yab ka tómkin» (ka ajiy 1 Corintios 7:32, 33, 38). ¿Jaleʼ tin ulal an Biblia abal «más alwaʼ» máx jun i atikláb yab ka tómkin? Jitaʼchik kʼwajat kwetém yab u tʼeʼpinal kin béletnaʼ in kʼimádhil o in tomkíl. Jaxtám jajáʼchik, más u jólkʼanal abal kin tʼajaʼ yan jantʼoj. Talchik in éjtowal kin tʼojonchij más a Jehová, ejtíl ka kʼalej ti tólmix pil juʼtáj. Ani jawaʼ más exbadh játs abal más u jólkʼanalchik abal ka utey kʼal a Jehová.
2. ¿Jantʼoj tam alwataláb in bátsʼuwal jitaʼchik kʼwajat tómkidh jantʼiniʼ tin kónoyal an eyal?
Axi tómkidh jayej in bátsʼuwal yan i alwataláb. An Biblia in ulal abal más alwaʼ max «jun kin koʼoy in junik» (Eclesiastés 4:9). Antsanáʼ u tejwamél kʼal jitaʼchik in tsápnanchal kin eyendhaʼ tin ejatal jawaʼ in ulal an Biblia. Jitaʼchik tómkidh jantʼiniʼ tin kónoyal an eyal, in ulumalchik abal neʼets ka kʼanidháxin, neʼets ka tolmíxin ani ka beletnáxin. In exlál abal kom kʼwajatchik tómkidh, yab neʼets ka jílkakiyat. Jayej, an tsákamchik u yejél más kulbél kʼal tsablom in tátajchik.
3. ¿Jantʼoj in tsálpayal a Jehová tin kwéntaj an tomkintaláb?
Tam ti a Jehova in tomkiy a Adán ani a Eva, in uluw: «An inik neʼets kin jilaʼ in tátaj ani in mim ani kwaʼal ka kʼwajiy kʼal in kʼimádhil» (Génesis 2:24). A Jehová in léʼ abal an inik ani in kʼimádhil ka kʼwajiychik etsʼey junax. Ani in ulal abal expidh in éjtowal kin konoy an divorcio, max kʼambiyat. Pero a Jehová in jilál abal an inik o an uxum axi kʼambiyámej, kin takuy max neʼets kin konoy an divorcio o imbáj (Mateo 19:9).a A Jehová yab in kulbetnál abal jun i atikláb kin koʼoy tsab in kʼimádhil o tsab in tomkíl (1 Timoteo 3:2).
ABAL KA EXÓBNAʼ MÁS
Ka exóbnaʼ jantʼoj a éjtowal ka tʼajaʼ abal kit kʼwajiy kulbél ani ka kulbédhaʼ a Jehová, bélits max it kwetém o it kʼwajat tómkidh.
4. Max it kwetém, ka eyendhaʼ alwaʼ a ejatal
A Jesús in tsuʼtalak jantʼiniʼ jun i tsʼejwalixtaláb, tam jun ka kʼwajiy kwetém (Mateo 19:11, 12). Ka ajiychik Mateo 4:23 ani ka tsálpaychik kʼal axéʼ:
¿Jantʼiniʼ tin eyendhaʼ in ejatal a Jesús abal kin tʼojonchij a Jehová ani kin tólmiy axi kʼeʼat?
An epchalchik axi kwetém neʼets kin ejtow kin atsʼaʼ kulbél max kin nítsʼbiy a Jesús. Ka tsuʼuwchik an VIDEO ani ka tʼilaʼchik jawaʼ a tsuʼuw.
¿Jantʼoj in éjtowal kin tʼajaʼ jitaʼchik kwetém, abal kin eyendhaʼ alwaʼ in ejatal?
¿A exlalak?
An Biblia yab in olnál jay i támub kwaʼal kin koʼoy jun i atikláb abal ka tómkin. Pero in ulal abal jun yab kwaʼal ka tómkin «tam lej tsákamej», kom tam jun tsákamej pil jantʼiniʼ tu tsalpax tin kwéntaj an tomkintaláb (1 Corintios 7:36).
5. Ka tsalpay alwaʼ kʼal jitaʼ neʼets kit tómkin
Lej exbadh ka tʼajaʼ ti kwéntaj kʼal jitaʼ neʼets kit tómkin. Ka ajiychik Mateo 19:4-6, 9 ani ka tsálpaychik kʼal axéʼ:
Max jun i epchal in léʼ ti tómkinal, ¿jaleʼ ti kwaʼal kin alwaʼ tsalpay okʼxidh ka tómkin?
An Biblia neʼets ti tólmiy abal ka exlaʼ jantʼoj ka tʼajchij ti kwéntaj an atikláb axi a léʼ ka tómiknaʼ. Pero jawaʼ más kwaʼal ka tʼajaʼ ti kwéntaj, játs max in kʼanidhál a Jehová.b Ka ajiychik 1 Corintios 7:39 ani 2 Corintios 6:14. Talbél ka tsálpaychik kʼal axéʼ:
Max jun i epchal in tsálpayal ka tómkin, ¿jaleʼ ti lej exbadh kin aliy jitaʼ axi jayej in kʼakʼnál a Jehová?
Max jun i epchal ka tómkin kʼal jun i atikláb axi yab pel i ólchix, ¿jantʼiniʼ wálam neʼets kin atsʼaʼ a Jehová?
Max ka tʼojondháj tsab i koʼnél axi yab junat in tsap, neʼetschik kin lej yajchíknaʼ. Jayetsej u watʼel max jun i epchal ka tómkin kʼal jitaʼ axi yab in kʼanidhál a Jehová, neʼets kin koʼoy yan i kʼibataláb.
6. Ka pidhaʼ in jalbíl an tomkintaláb, antsanáʼ jantʼiniʼ in tʼajál a Jehová
Ti biyál, talchik i israelitas in kónchalak an divorcio in kʼimádhil, expidh kom yabáts in léʼak ka kʼwajiy kʼal jajáʼ. Ka ajiychik Malaquías 2:13, 14, 16 ani ka tsálpaychik kʼal axéʼ:
¿Jaleʼ ti a Jehová in pojkál abal jun i atikláb kin konoy an divorcio alkʼidhkʼij?
Max jun i atikláb kin kʼambiy in kʼimádhil o in tomkíl, an tsákamchik in lej yajchiknál, jayej max jun kʼal jajáʼ kin konoy an divorcio.
Ka tsuʼuwchik an VIDEO ani ka tʼilaʼchik jawaʼ a tsuʼuw:
Max it kʼwajat tómkidh kʼal jun i atikláb axi yab in kʼakʼnál a Jehová, ¿jantʼoj a éjtowal ka tʼajaʼ abal kit kʼwajiy kulbél?
7. Ka belkaʼ jawaʼ a Jehová in kónoyal tin kwéntaj an tomkintaláb
Talchik in atsʼál kʼibat kin belkaʼ jawaʼ a Jehová tu konchal tin kwéntaj an tomkintaláb.c Pero a Jehová in lábliyal jitaʼchik in tsápnanchal kin tʼajaʼ jawaʼ Jajáʼ tu konchal. Ka tsuʼuwchik an VIDEO.
Ka ajiychik Hebreos 13:4 ani ka tsálpaychik kʼal axéʼ:
¿Wálam tekedh jawaʼ tu konchal a Jehová tin kwéntaj an tomkintaláb? ¿Jaleʼ ta tsálpayal antsanáʼ?
A Jehová in léʼ abal tam jun i atikláb ka tómkin, o kin konoy an divorcio, kin tʼajaʼ antsanáʼ jantʼiniʼ tin kónoyal an eyalchik. Ka ajiychik Tito 3:1 ani ka tsálpaychik kʼal axéʼ:
Max it kʼwajat tómkidh, ¿a kwaʼal jantʼiniʼ ka tejwamédhaʼ abal it tomkinének, jantʼiniʼ tin kónoyal an eyal?
JAWAʼ TALCHIK WALÁM TI KONOY: «¿Walám in yéjenchal jun i uw abal ka exláj abal in kʼwajat tómkidh?».
¿Jantʼoj neʼets ka tókʼtsiy?
JAWAʼ I EXOBNÁMAL
Max u kwetém o max u tómkidh, pel jun i tsʼejwalixtaláb axi a Jehová tu pidhámal. Neʼets ki atsʼaʼ kulbél max ki belkaʼ a Jehová.
Ki tʼilaʼ jawaʼ i exóbnaʼ
¿Jantʼiniʼ in éjtowal kin eyendhaʼ alwaʼ in ejatal, jitaʼ yab tómkidh?
¿Jaleʼ in ulal an Biblia abal jun i epchal expidh kwaʼal ka tómkin kʼal jitaʼ axi jayej in kʼanidhál a Jehová?
¿Jaykʼiʼ tin ulal an Biblia abal jun i atikláb in éjtowal kin konoy an divorcio?
KA EXOBNAʼ JANTʼOJ ÍT
¿Jantʼoj in léʼ kin uluw ku tómkin expidh «kʼal jun axi pel i belom»?
«Konowixtalábchik axi a tʼajámal» (La Atalaya, 1 de julio de 2004)
Ka exóbnaʼ jantʼoj a éjtowal ka tʼajaʼ max a léʼ kit tómkin.
Ka exla jaleʼ ti jun i epchal in lej belál abal pidhnének kʼal a Jehová, jantʼoj axi in lej kwaʼal in jalbíl.
Max jun i epchal in tsalpayámal kin jilaʼ in tomkíl o kin konoy an divorcio, ¿jantʼoj kwaʼal kin lej tʼajaʼ ti kwéntaj?
«Ki kʼakʼnaʼ jawaʼ a Dios in junkuwámal» (La Atalaya, diciembre de 2018)
a Ban nota 4 neʼets ka tsuʼuw jaykʼiʼ tin éjtowal jun i atikláb, kin jilaʼ in tomkíl o in kʼimádhil (max yab kʼambiyámej).
b Al talchik i bichow, an tataláb játs axi in alchal kʼal jitaʼ neʼets ka tómkin in tsʼikʼáchil o in kwitólil. Jawaʼ más in tʼajálchik ti kwéntaj, játs max in kʼanidhál a Jehová kʼal jitaʼ neʼets kin tómkiy in tsakámil. Yabchik in lej tʼajál ti kwéntaj max tumínladh o max in kwaʼal yan jantʼoj.
c Max it kʼwajíl junax, tatáʼ kwaʼal ka takuy max neʼets kit tómkin kʼal jajáʼ o max neʼets kit jiláxin.