AJUMTALÁB 43
¿Jantʼoj in tsálpayal an ólchixchik kʼal a Jehová tin kwéntaj an utsʼnél axi u wíledhax?
An atiklábchik in tsálpayal yan jantʼoj tin kwéntaj an utsʼnél axi u wíledhax. Talchik, in utsʼál junchikíl tam kʼwajat kʼal in jaʼúbchik. Kʼeʼatchik, tʼajatits yab in utsʼál, ani waʼats axi u utsʼál ma ka wílej. ¿Jantʼoj in ulal an Biblia tin kwéntaj an utsʼnél?
1. ¿Walám kidháb ki utsʼaʼ i vino?
An Biblia yab in ulal abal max kidháb ki utsʼaʼ i vino. Ma in ulal abal pel «jun i tsʼejwalixtaláb axi a Jehová tu pidhámal abal ki kulbédhaʼ i ejatal» (Salmo 104:14, 15). Jayej in ulal abal ti biyál waʼtsin in tʼojnálil a Jehová axi in utsʼálakchik i vino (1 Timoteo 5:23).
2. ¿Jantʼoj in ulal an Biblia tin kwéntaj jitaʼchik in tsalpayámal kin utsʼaʼ i vino?
A Jehová yab in léʼ abal jun ka wílej nibal kin watʼkʼanchij kʼal an utsʼnél (Gálatas 5:21). An Biblia in ulal: «Yab ka watʼkʼanchij ka utsʼaʼ an vino jantʼiniʼ tin tʼajál axi kʼeʼat» (Proverbios 23:20). Max neʼets ki utsʼaʼ i vino, tam u kʼwajat kwetém o yan ti eb, in lej tomnál ki tʼajaʼ ti kwéntaj, abal yab ki watʼkʼanchij ma ku tujey tu alkʼidh kaw ani yabáts ku tsálpaxin tekedh. Jayej, yab kwaʼal ki jilaʼ abal an utsʼnél tu ku ódhnanchij i ejatal ma tu ku yaʼundhaʼ. Max i exlál abal neʼets ki watʼkʼanchij, más alwaʼak yab ki utsʼaʼ.
3. ¿Jantʼiniʼ i tejwamedhál abal i kʼakʼnál jawaʼ in takuyámal kin tʼajaʼ axi kʼeʼat?
Jun kwaʼal kin takuy tin kwetémtal max neʼets kin utsʼaʼ i vino o imbáj. Yab kwaʼal ki uchaʼ jantʼoj, jitaʼ in tsalpayámal kin utsʼaʼ wéʼ i vino ani yab kwaʼal ki níxoknaʼ kin utsʼaʼ, jitaʼchik yab in léʼ (Romanos 14:10). Jayej yab i utsʼál, max jitaʼchik kʼwajat kʼal wawáʼ yab neʼets kin tsuʼuw alwaʼ max ki utsʼaʼ (ka ajiy Romanos 14:21). I tʼajál antsanáʼ kom an Biblia tu uchál abal «yab expidh ki tʼajaʼ jawaʼ wawáʼ ki kweteʼ kulbétnaʼ» (ka ajiy 1 Corintios 10:23, 24).
ABAL KA EXÓBNAʼ MÁS
Ki tsuʼuw talchik i tsalpadh kaw axi neʼets ti tólmiy ka tsalpay max neʼets ka utsʼaʼ i vino o imbáj. Jayej, ka tsuʼuw jantʼoj a éjtowal ka tʼajaʼ max kʼwajat a tsápnanchal ka jilaʼ tit utsʼál.
4. Ka tsalpay max neʼets ka utsʼaʼ i vino o imbáj
¿Jantʼoj in tsálpayalak a Jesús tin kwéntaj an utsʼnél? Abal ki exlaʼ, ki tsuʼuw jawaʼ játs an kʼaʼál labidh tʼajbiláb axi in tʼajaʼ. Ka ajiychik Juan 2:1-11 ani ka tsálpaychik kʼal axéʼ:
¿Jantʼoj in tsálpayalak a Jesús tin kwéntaj an vino ani kʼal jitaʼchik in utsʼál?
Max a Jesús yab jitaʼ in kʼanchij kin utsʼaʼ wéʼ i vino, ¿jantʼoj in tomnál ki tsalpay kʼal jitaʼchik in utsʼál wéʼ?
Max jun i epchal in tsalpayámal kin utsʼaʼ wéʼ i vino, yab in léʼ kin uluw abal in tomnál kin utsʼaʼ juʼtámakits. Ka ajiychik Proverbios 22:3 ani ka tsálpaychik jaykʼiʼ tin tomnál jun i atikláb kin lej tʼajaʼ ti kwéntaj max neʼets kin utsʼaʼ i vino o imbáj:
Max neʼets ka beldhaʼ jun i carro o jun i máquina.
Max jun i mimláb xeʼets koʼodh.
Max an doctor ti uchámal yab ka utsʼaʼ i vino.
Max tam kit tújeyits ka utsʼaʼ, yab a éjtowal ka jilaʼ.
Max ta kwenchálil, an eyalchik ti kʼanchal ka utsʼaʼ.
Max it kʼwajat kʼal jitaʼ, axi kʼwajat in tsápnanchal kin jilaʼ ti utsʼál.
Max neʼets kit tómkin o neʼets ka tʼajaʼ jun i ajib, ¿in tomnál ka bínaʼ i vino? Abal ka exlaʼ jantʼoj kwaʼal ka tʼajaʼ ti kwéntaj, ka tsuʼuwchik an VIDEO.
Ka ajiychik Romanos 13:13 ani 1 Corintios 10:31, 32. Talbél ta ajiyámal ti junchik axéʼ an textos, ka tsálpaychik kʼal axéʼ:
¿Jantʼiniʼ neʼets ti tólmiy axéʼ xi tsalpadh kaw, abal ka takuy ka tʼajaʼ jantʼoj axi kin kulbédhaʼ a Jehová?
Jun kwaʼal kin takuy tin kwetémtal max neʼets kin utsʼaʼ wéʼ i vino o imbáj. Pero jayej kwaʼal kin tsalpay jaykʼiʼ tin éjtowal kin utsʼaʼ ani jaykʼiʼ yab in tomnál.
5. Ka tsalpay jay in tomnál ka utsʼaʼ
Max a tsalpayámal ka utsʼaʼ wéʼ i vino, ka tʼilaʼ abal a Jehová yab tu kʼanchal. Pero yab in léʼ, abal ki watʼkʼanchij. ¿Jaleʼ? Ka ajiychik Oseas 4:11, 18 ani ka tsálpaychik kʼal axéʼ:
¿Jantʼoj in éjtowal kin tʼajaʼ jun i atikláb max kin watʼkʼanchij ti utsʼál?
¿Jantʼoj i éjtowal ki tʼajaʼ, abal yab ki watʼkʼanchij kʼal an utsʼnél? Kwaʼal ka exlaʼ jay a éjtowal ka kuxuy, kom yab in tomnál kit wílej. Ka ajiychik Proverbios 11:2 ani ka tsálpaychik kʼal axéʼ:
¿Jaleʼ ti lej alwaʼ ka tsalpay jay neʼets ka utsʼaʼ?
6. Yab ka jilaʼ abal ti ataʼ an utsʼnél
Ka exlaʼ kʼal jantʼoj ti tólmiyat jun i inik abal kin jilaʼ ti utsʼál. Ka tsuʼuwchik an VIDEO ani ka tʼilaʼchik jawaʼ a tsuʼuw.
¿Jantʼiniʼ ti odhnáj a Dimitri kʼal an utsʼnél?
¿Dhúbatkʼij in jilaʼ ti utsʼál?
¿Jantʼiniʼ in ejtow kin jilaʼ ti utsʼál?
Ka ajiychik 1 Corintios 6:10, 11 ani ka tsálpaychik kʼal axéʼ:
¿Walám pel i walabtaláb jun ka wílej? ¿Jaleʼ?
¿Jaleʼ i lej belál abal jun i atikláb in éjtowal kin jilaʼ ti utsʼál?
Ka ajiychik Mateo 5:30 ani ka tsálpaychik kʼal axéʼ:
Kʼal axéʼ xi tʼiplab axi in eyendhaʼ a Jesús, in léʼak tu ku exóbchij abal kwaʼal ki lej tsápnanchij max i léʼ ki kulbédhaʼ a Jehová. ¿Jantʼoj kwaʼal ka tʼajaʼ, max kʼwajat a tsápnanchal ka jilaʼ tit utsʼál?a
Ka ajiychik 1 Corintios 15:33 ani ka tsálpaychik kʼal axéʼ:
¿Jantʼoj a éjtowal ka watʼaʼ max ka junkuw i atikláb axi in kulbetnál ti utsʼál?
JAWAʼ TALCHIK WALÁM TI KONOY: «¿Walám yab alwaʼ tu utsʼál?».
¿Jantʼoj neʼets ka tókʼtsiy?
JAWAʼ I EXOBNÁMAL
A Jehová tu pidhámal an vino jantʼiniʼ i tsʼejwalixtaláb, pero yab in léʼ abal ku wílej, nibal ki watʼkʼanchij.
Ki tʼilaʼ jawaʼ i exóbnaʼ
¿Jantʼoj in ulal an Biblia tin kwéntaj an utsʼnél?
¿Jantʼoj neʼets ki watʼaʼ max ki watʼkʼanchij kʼal an utsʼnél?
¿Jantʼiniʼ i éjtowal ki tejwamédhaʼ abal i kʼakʼnál jawaʼ kʼeʼatchik in tsálpayal tin kwéntaj an utsʼnél?
KA EXÓBNAʼ JANTʼOJ ÍT
¿Jantʼoj kwaʼal kin tʼajaʼ ti kwéntaj axi tsákamej, max in léʼ kin utsʼaʼ i vino?
Ka exlaʼ jantʼoj a éjtowal ka tʼajaʼ abal ka jilaʼ tit utsʼál.
«Jawaʼ a éjtowal ka tʼajaʼ abal yab ti ataʼ an utsʼnél» (La Atalaya, 1 de enero de 2010)
¿Walám in tomnál kin tʼajaʼ an brindis an ólchixchik kʼal a Jehová?
«Konowixtalábchik axi a tʼajámal» (La Atalaya, 15 de febrero de 2007)
Ka exlaʼ jantʼiniʼ in ejtow jun i inik kin jilaʼ ti utsʼál, ban biografía «In lej utsʼálak».
«Tólmiyatchik kʼal an Biblia abal kin jalkʼuy in ejatal» (La Atalaya, 1 de mayo de 2012)
a An atiklábchik axi lej u utsʼál, walám in yéjenchal ka tólmiyat kʼal jun i atikláb axi exoblámadh. Yan i doctor in ulal abal max jun i atikláb u lej utsʼálak ti biyál ani in jílaʼits, yabáts kwaʼal kin utsʼaʼ.