AJUMTALÁB 36
Etsʼey ki uluw an chubaxtaláb
Patal i léʼ ki koʼoy i jaʼúb axi etsʼey tu ku uchaʼ an chubaxtaláb ani a Jehová jayetsej in aychal kin tʼajaʼ in jaʼúbchik. Pero junchikíl wéʼ kʼibat ki uluw an chubaxtaláb kom al axéʼ xi xeʼtsintaláb waʼats yan i atikláb axi u kʼambix. ¿Walám neʼets ki batsʼuw i alwataláb max etsʼey ki uluw an chubaxtaláb? ¿Jawaʼ?
1. ¿Jaleʼ ti lej exbadh ki uluw etsʼey an chubaxtaláb?
Tam i ulal etsʼey an chubaxtaláb i tejwamedhál abal i kʼanidhál a Jehová ani i kʼakʼnál. Etsʼey ka tʼilaʼ abal a Jehová in exlál ani in tsuʼtal, jawaʼ i tsálpayal ani patal jawaʼ i tʼajál (Hebreos 4:13). Tam wawáʼ i tsápnanchal ki uluw an chubaxtaláb, Jajáʼ in tʼajál ti kwéntaj ani u kulbél. An Biblia in ulal: «A Jehová in pojkál jitaʼchik in tʼajál jawaʼ kidháb, pero in jaʼubnál jitaʼchik in tʼajál jawaʼ tekedh» (Proverbios 3:32).
2. ¿Jaykʼiʼ tin tomnál ki uluw an chubaxtaláb?
Max i léʼ ki kulbédhaʼ a Jehová kwaʼal «ki uluw etsʼey an chubaxtaláb» (Zacarías 8:16, 17). ¿Jantʼoj in léʼ kin uluw axéʼ? In léʼ kin uluw abal etsʼey i uchál jawaʼ chubax i yanél, i at tʼojnal, an epchalchik axi ban tamkuntaláb ani an eyalchik. An atiklábchik axi etsʼey in ulal an chubaxtaláb, yab u kweʼ, nibal in kʼambiyal axi kʼeʼat (ka ajiy Proverbios 24:28 ani Efesios 4:28). Jayej, in jálbiyal jawaʼ u konchinal kʼal an eyalchik (Romanos 13:5-7). Etsʼey i léʼ ki tʼajaʼ, «expidh jawaʼ alwaʼ» (Hebreos 13:18).
3. ¿Jantʼoj tam alwataláb neʼets ki batsʼuw max etsʼey ki uluw an chubaxtaláb?
Neʼets ku belchin jawaʼ ki uluw max etsʼey ki uluw an chubaxtaláb. Jayej neʼets kin tʼajaʼ abal ti tamkuntaláb ki atsʼaʼ alwaʼ béletnadh, ejtíl max u kʼwajatak kʼal i yanél. Ani neʼets ki koʼoy koyat i tsalápil. Etsʼey ki uluw an chubaxtaláb, abal ki tejwamédhanchij axi kʼeʼat abal lej alabél an exobchixtaláb axi u «exobchinének tin kwéntaj a Dios» ani ma walám kin léʼnaʼchik jayej kin tʼojonchij a Jehová (Tito 2:10).
ABAL KA EXÓBNAʼ MÁS
Ki tsuʼuw abal tam etsʼey i ulal an chubaxtaláb u utel más kʼal a Jehová, ani ki tsuʼuw jantʼoj neʼets tu ku tólmiy abal ki uluw etsʼey an chubaxtaláb.
4. A Jehová u kulbél kʼal jitaʼchik in ulal etsʼey an chubaxtaláb
Ka ajiychik Salmo 44:21 ani Malaquías 3:16 ani ka tsálpaychik kʼal axéʼ:
¿Walám tekedh ki tsalpay abal yab jaykʼiʼ neʼets ka exláj an chubaxtaláb? ¿Jaleʼ ta tsálpayal antsanáʼ?
Max ki tsápnanchij ki uluw etsʼey an chubaxtaláb, bélits abal kʼibat i atsʼál, ¿jantʼiniʼ wálam neʼets kin atsʼaʼ a Jehová?
An tatalábchik in atsʼál lej kulbél tam in tsakámil in ulal an chubaxtaláb. Tam wawáʼ ki uluw etsʼey an chubaxtaláb, i kulbédhanchal in ichích a Jehová.
5. Etsʼey ki uluw an chubaxtaláb
Bélits abal yan i atikláb in tsálpayal abal yab lej exbadh ki uluw etsʼey an chubaxtaláb, ki tsuʼuw jaleʼ tin tomnál ki uluw etsʼey an chubaxtaláb. Ka tsuʼuwchik an VIDEO.
Ka ajiychik Hebreos 13:18 ani ka tsálpaychik, jantʼiniʼ a éjtowal ka uluw etsʼey an chubaxtaláb...
... kʼal a yanél.
... ban tʼojláb o ban escuela.
... al pil juʼtáj.
6. I bátsʼuwal i alwataláb tam i ulal etsʼey an chubaxtaláb
Walám junchikíl kʼibat ki atsʼaʼ ki uluw an chubaxtaláb, pero talbél neʼets ki batsʼuw yan i alwataláb. Ka ajiychik Salmo 34:12-16 ani ka tsálpaychik kʼal axéʼ:
¿Jantʼiniʼ neʼets tu ku tólmiy ti ejatal max etsʼey ki uluw an chubaxtaláb?
Tam axi tomkidh in ulalchik etsʼey an chubaxtaláb, u kʼwajílchik más junkudh.
Tam jun i tʼojnal etsʼey in ulal an chubaxtaláb, etsʼey u bélchinal jawaʼ kin uluw kʼal jitaʼ tu tʼojondháb.
An eyalchik tu kʼakʼnál tam i pútuwal kʼal jawaʼ tu konchal.
JAWAʼ TALCHIK IN TSÁLPAYAL: «Yab jitaʼ u odhnál tam junchikíl ku uluw i janamtaláb».
¿A tsálpayal abal a Jehová in pojkál patal an janamtaláb? ¿Jaleʼ a tsálpayal antsanáʼ?
JAWAʼ I EXOBNÁMAL
A Jehová in aychal abal in jaʼúbchik etsʼey kin uluw an chubaxtaláb ani kin tʼajaʼ jawaʼ tekedh.
Ki tʼilaʼ jawaʼ i exóbnaʼ
¿Jaykʼiʼ tin tomnál ki uluw an chubaxtaláb?
¿Jaleʼ ti yab in tomnál ki tsalpay abal yab jaykʼiʼ neʼets ka exláj an chubaxtaláb?
¿Jaleʼ ti etsʼey a léʼ ka uluw an chubaxtaláb?
KA EXÓBNAʼ JANTʼOJ ÍT
¿Jantʼiniʼ in éjtowal an tatalábchik kin exóbchij in tsakámil abal etsʼey kin uluw an chubaxtaláb?
¿Jantʼoj tam alwataláb neʼets kin batsʼuw jitaʼ etsʼey in pútuwal in káwintal?
Ka tsápnanchij ka putuw jawaʼ a ulumal ani neʼets ka batsʼuw yan i alwataláb (9:09)
Ka exlaʼ max kwaʼal ki jalbiy jawaʼ an eyalchik tu konchal, bélits max an tumín yab ka eyan tekedh.
«¿Kwaʼal ka jalbiy jawaʼ ti konchal an eyal?» (La Atalaya, 1 de septiembre de 2011)
Ka tsuʼuw kʼal jantʼoj ti tólmiyat kin jalkʼuy in ejatal, jun i inik axi in kulbetnálak kin kʼambiy an atikláb.
«U exóbnaʼ abal a Jehová u kʼanidhom ani u pákwlanchix» (La Atalaya, 1 de mayo de 2015)