Jawaʼ in watʼaʼ jun i epchal

Tam ki tejwamédhanchij i kʼanidhomtaláb an atiklábchik, awil ka watʼey yan jantʼoj alwaʼ

Jun a kʼicháj jun i epchal mimláb axi ti Nueva Zelanda in tsuʼuw an video axi in bij Preocupémonos unos por otros, tanáʼ in tʼajaʼ ti kwéntaj abal a Jehová yab expidh tu yajnanchal, jayej in tʼajál jantʼoj abal tu ku tólmiy (Is. 63:​7-9). Jajáʼ in tsalpay kin nitsʼbiy a Jehová, jaxtám in aliy jitaʼ kin tólmiy. Nixéʼ a kʼicháj an epchal kʼalej ti tsʼaʼum ani in tsuʼuw jun i mimláb axi yab in kwaʼal in kʼimáʼ ani u kʼwajíl ban bel. Tam, in uchaʼ abal max in léʼak in éjtowalak kin tsʼaʼiychij jantʼoj kin kʼapuw. An epchal in tsʼaʼiychij an kʼapnél ani talbél in tʼilmay tin kwéntaj an Biblia ani in jilchij an tratado axi in bij ¿Neʼets ki jilaʼ ki yajchiknaʼ jún a kʼicháj?

An mimláb in tujchij ti ukʼnal ani in uchaʼ an epchal abal jajáʼ exóbchin tin kwéntaj a Jehová ma tin tsakamtal. Pero in kwaʼalits yan i támub ti yab u kʼalel ti tamkuntaláb. Jayej in uchaʼ an epchal abal itekʼij ti tújenek kin konchij a Jehová abal ka tolmiyat kom in léʼ ka wichiy tin bichówil a Jehová. An epchal in pidhaʼ jun i Biblia ani jílkʼonchik abal neʼets kin tujchij ti exóbal.a

Wawáʼ jayej i éjtowal ki tejwamédhaʼ abal i yajnanchal axi más, antsanáʼ jantʼiniʼ a Jehová. Ejtíl, i éjtowal ki tejwamédhanchij i yanél ani an epchalchik axi ti tamkuntaláb abal i kʼanidhál. Ani jayej i éjtowal ki tejwamédhaʼ abal i yajnanchal axi más tam ki tsápnanchij ki tʼilmay jitakits tam atikláb tin kwéntaj an Biblia.