¿A exlálak?
¿Jantʼiniʼ jatsak an carreta juʼtáj ti neʼetsak an etíope tam ti a Felipe utey in tʼilmayal?
BAN Traducción del Nuevo Mundo an kaw carro u eyendháb abal ka bíjiyat pílchik i tolilíl patʼál (Hech. 8:28, 29; 38). Pero an carreta juʼtáj ti neʼetsak an etíope yab pelak jun i alkʼidh carreta axi u eyendhábak abal ti pejex o axi u eyendhábak abal ti adhilchik, pelak jun i carreta más púlik. Ki tsuʼuw jaleʼ ti exbayámal antsanáʼ.
An etíope in kwaʼalak yan in éy ani lej ow ti belámadh. Axéʼ xi inik «pelak i púlik eyal ti kwéntalom tumín kʼal an uxum tsʼalej Candace ti Etiopía» (Hech. 8:27). Ti biyál, a Etiopía in bajuwalak ma ban bichowchik axi xowéʼ u exláb ti Sudán ani jun i pejach kʼal a Egipto. Walám an etíope yab expidh in eyendhaʼ jun i carreta abal ka ulits ma ti Jerusalén ani walám in neʼdhálak yan i kitaláb. Ti biyál u eyendhábak pílchik i carretas abal jun i atikláb ka beláts ani ka kʼalej al pil i bichow. Ejtíl, waʼatsak i carretas axi kʼwajatak alwaʼ paxkʼidh tin putát ani in kwaʼalak tseʼ i llantas. Jun i libro in ulal axéʼ: «Al nixéʼ an carruajes a éjtowalak ka neʼdhaʼ más i kitaláb, yab ti lej tsekedhálak ani a éjtowalak ki kʼalej más owél» (Acts—An Exegetical Commentary).
An etíope kʼwajatak ti ajum tam ti a Felipe utey. An Biblia in ulal abal «adhláts a Felipe ani utey ban carreta. In atsʼaʼ jantʼiniʼ tin ajiyal in dhuchadh úwil a Isaías nixéʼ xi inik» (Hech. 8:30). Ti biyál, an carretas axi u eyendhábak abal ti belelél yab u adhilak lej dhubat. Kom neʼetsak kʼayúm, jaxtám an etíope in éjtowalak ti ajum ani a Felipe in ejtow ka adhláts abal kin bajuw.
An etíope in uchaʼ a Felipe abal ka kʼadhiy ani ka ketlej kʼal jajáʼ (Hech. 8:31). Ban carretas axi u eyendhábak ti biyál abal ti adhil, an béldhom kwaʼalak ka kʼalej tin akan, pero al axéʼ xi carreta juʼtáj ti neʼetsak an etíope, u exelak kʼeʼat i atikláb abal ka kʼalej ketél.
Kʼal patal jawaʼ i exobnámal ban capítulo 8 ti Hechos ani kʼal jawaʼ elnének, i exbayámal abal an carreta juʼtáj ti neʼetsak an etíope yab pelak jun i carreta abal ti pejex, nibal jun i carreta abal ti adhil. Jaxtám xowéʼ abal okʼox, ban dibujos neʼets ka punuwat jun i carreta más púlik.