-
You Can Be Jehovah’s FrenYou Can Live Good Foeva!—Learn Da Bible By Talking Story
-
-
5. Wat Jehovah ask his frenz fo do
Get tings we gotta do fo be somebody’s fren.
Wat some tings dat you like yoa frenz do fo you?
Read um 1 From John 5:3, an den talk story about dis question:
Wat Jehovah like his frenz fo do?
Fo lissen wat Jehovah tell, maybe us gotta change da tings we do, o da way we ack. Read um Isaiah 48:17, 18, an den talk story about dis question:
How come Jehovah ask his frenz fo lissen wat he tell?
One good fren would tell you tings dat can keep you safe an is good fo you. Jehovah do da same fo his frenz
-
-
How Us Can Show Oua Love Fo Jehovah?You Can Live Good Foeva!—Learn Da Bible By Talking Story
-
-
LESSON 34
How Us Can Show Oua Love Fo Jehovah?
You love God moa now den wen you firs had start fo learn da Bible? You like keep making yoa frenship wit him moa strong? If yeah, try rememba, da moa Jehovah see yoa love fo him come moa strong, da moa he goin love an kea fo you. How you can show you love him?
1. How we show Jehovah we love him?
Wen we do wat Jehovah like, dass how we show oua love fo him. (Read um 1 From John 5:3.) He no force nobody fo do wat he tell. But, he give all us da chance fo choose if we like lissen to him o not. How come? Jehovah like us “go fo broke . . . [an] lissen.” (Fo Da Rome Peopo 6:17) Dat mean he like you fo lissen him, not cuz you gotta, but cuz you love him. Parts 3 an 4 of dis book stay made fo help you fo show yoa love fo Jehovah by doing da tings dat make him happy an fo no do da tings dat make him soa.
2. How come az hard sometimes fo show oua love fo Jehovah?
“Get plenny bad tings happen to da peopo dat stay do da right ting.” (Songs Fo God 34:19) All us get hard time wit da stuffs dat stay wrong wit us. We might have hard time getting enuff money fo live, o tings no stay fair, o odda tings dat jam us up. Wen we goin thru hard times, sometimes is not easy fo do wat Jehovah ask us fo do. Dass cuz maybe is moa easy fo no lissen to Jehovah. Wen you trus Jehovah an you do wat he tell you fo do, you show dat get notting you love moa den him. Den you show dat you goin stick tight to him. Same same, he goin stick tight wit you. He neva goin bag from you.—Read um Songs Fo God 4:3.
DIG MOA DEEP
Try learn how come it make Jehovah happy wen you lissen to him an wat can help you fo do dis.
3. Satan poin finga at you
Inside da Bible book of Job, Satan wen poin finga at Job an all da odda guys who like serve Jehovah. Read um Job 1:1, 6–2:10, an den talk story about dese questions:
From wat Satan wen tell, how come Job wen lissen to Jehovah?—Go look Job 1:9-11.
Wat Satan wen tell about all humans, even you?—Go look Job 2:4.
Read um Job 23:11, 12, an den talk story about dis question:
How Job wen show he love Jehovah fo real?
Job wen show his love fo Jehovah wen he stick tight to him
We show oua love fo Jehovah wen we stick tight to him
4. Make Jehovah feel real good inside
Read um Smart Guys 27:11, an den talk story about dese questions:
How Jehovah feel wen you stay akamai an do wat he tell? How come?
5. You can stay tight wit Jehovah
Cuz we love Jehovah, we goin like tell oddas about him. Sticking tight wit him help us fo do dat, even wen az not easy fo do um. Play um da VIDEO, an den talk story about da questions afta.
You tink az hard fo tell odda peopo about Jehovah o wat?
Inside da video, wat wen help Grayson get ova being sked?
Az moa easy fo stay tight wit Jehovah wen we love wat he love an hate wat he hate. Read um Fo Da Rome Peopo 12:9, an den talk story about dese questions:
From wat you wen learn, wat kine tings Jehovah love? Wat kine stuff he hate?
How you can learn fo love wat stay good an hate wat stay bad?
6. Tings come good fo us wen we do wat Jehovah tell
Fo do wat Jehovah tell, dass no ka ‘oi. Read um Isaiah 48:17, 18, an den talk story about dese questions afta:
Jehovah always know wat stay bes fo us. Can trus dat o wat? How come?
So far you wen learn from da Bible an about da God dass fo real, Jehovah. How dat wen make tings come good fo you?
WAT SOME PEOPO TELL: “No really matta to God wat I do.”
Wat scripcha you can use fo show dat da tings we do can make Jehovah happy o sad?
WAT WE WEN TALK ABOUT
You can show yoa love fo Jehovah by doing wat he tell an sticking tight wit him, even wen az hard.
Wat You Wen Learn
Wat you wen learn from Job?
How you goin show yoa love fo Jehovah?
Wat goin help you fo stick tight wit Jehovah?
LEARN SOME MOA
Find out how you can stay tight wit Jehovah an da local hui.
Try learn some moa about how Satan poin finga at humans.
“Job Keeps His Integrity” (The Bible—What Is Its Message? section 6)
Try look how even da keiki can show dey love Jehovah.
How one young guy dat get presha from odda younga guys can stick tight to God?
-
-
Fo Make Good Kine ChoicesYou Can Live Good Foeva!—Learn Da Bible By Talking Story
-
-
LESSON 35
How Fo Make Good Kine Choices
All us get choices fo make, aah? Plenny of dese choices can change who us an how tight we stay wit Jehovah. Maybe we gotta pick wea fo live, how fo make money, o if we goin get married. Wen we make good kine choices, we can live good an make Jehovah happy.
1. How da Bible can help you make good kine choices?
Befoa you make one choice, pray fo Jehovah help you an look good inside da Bible fo see wat he tink. (Read um Smart Guys 2:3-6.) Sometimes, easy fo see wat Jehovah like us do. Wen dat happen, da bes ting is fo lissen an do um.
Wat if is not easy fo see wat Jehovah stay tell you fo do? Jehovah still goin “show you guys da way fo go.” (Isaiah 48:17) How can? Maybe goin get one basic trut inside da Bible dat show how God tink an feel dat can help you. Plenny times, we learn how God feel about someting wen we read um in da Bible. Wen we figga how Jehovah feel, we can choose da tings dat make him happy.
2. Wat you gotta do befoa you choose fo do someting?
Da Bible tell: “Da akamai peopo, dey tink firs bout wat dey goin do.” (Smart Guys 14:15) Dis mean dat befoa we choose fo do someting, we gotta tink about wat kine choices get. Fo each one, try ask yoaself: ‘Wat trut inside da Bible goin help wit dis? Which one goin help me have peace? Wat I pick goin bodda oddas o wat? An da mos importan one, goin make Jehovah happy o wat?’—Da Rules Secon Time 32:29.
Jehovah get da right fo tell us wat stay good an bad. Wen we get fo know his rules an da trut real good, an like follow um, dass how we get fo know wat is ok an not ok. (Fo Da Rome Peopo 2:14, 15) Knowing dat goin help us choose wat stay good.
DIG MOA DEEP
Learn how da truts inside da Bible an fo know wass good an bad can help us fo choose good kine tings.
3. Let da Bible show you wat fo do
How da truts inside da Bible can help us fo choose wat fo do? Play um da VIDEO, an den talk story about da questions afta.
Wat spesho kine gif Jehovah wen give us?
How come Jehovah wen let us choose wat fo do?
Wat he wen give fo help us fo choose da bestes ting fo do?
Fo check out one Bible trut, read um Fo Da Efesus Peopo 5:15, 16. Den talk story about how you can “get chance fo do good kine stuff” fo . . .
read da Bible all da time.
be one betta husban, wife, faddah, maddah, son o daughtah.
go meetings wit da local hui.
4. Learn wass good an wass bad so you can choose wass good
Wen da Bible stay supa clear about someting, is easy fo choose wass good. But wat if no moa? Play um da VIDEO, an den talk story about da question afta.
Inside da video, wat da sistah wen do fo know wass good an wass bad moa betta so she can choose wat goin make Jehovah happy?
How come az no good fo ask oddas fo choose fo us? Read um Fo Da Hebrew Peopo 5:14, an den talk story about dese questions:
Even if moa easy fo ask oddas fo choose fo us, wat we gotta figga out on oua own?
Wat get fo help you know wass good an wass bad moa betta so you can choose wass good?
Jalike one map, knowing wass good an wass bad can help us know wea fo go in oua life
5. Respeck wat oddas tink stay good an bad
Not erybody goin choose fo do da same ting. How us can show respeck fo wat oddas tink is ok o not ok? Try look two exampos:
Exampo 1: One sistah who like wear plenny makeup move to one local hui wea doing dat bodda da sistahs ova dea.
Read um Fo Da Rome Peopo 15:1 an 1 Fo Da Corint Peopo 10:23, 24, an den talk story about dese questions:
How dese scripchas can help dis sistah choose wat fo do? Wat you goin do if you stay wit somebody who tink az not ok fo do wat you tink is ok?
Exampo 2: One braddah know dat da Bible tell az ok fo drink alcohol, but he choose not fo drink um. He stay at one get togedda wea braddahs stay drinking.
Read um Da Teacha 7:16 an Fo Da Rome Peopo 14:1, 10, an den talk story about dese questions:
How dese scripchas can help dis braddah choose wat fo do? Wat you would do if you see somebody doing someting dat you no would do?
How fo choose wass good
1. Ask Jehovah fo help you choose wat fo do.—From James 1:5.
2. Go check out da Bible an odda tings dat talk about um fo find truts dat can help you. Go talk story wit odda Christians who undastan wat you stay goin thru.
3. Tink good how wat you choose, can change wat you an oddas tink is ok an not ok.
WAT SOME PEOPO TELL: “Who kea wat odda peopo tink? Do wat you like.”
How come we gotta kea how God an odda peopo feel?
WAT WE WEN TALK ABOUT
We choose fo do good tings wen we figga how Jehovah feel about someting an tink if goin help oddas o goin jam dem up.
Wat You Wen Learn
How you can choose fo do wat make Jehovah happy?
How you can get fo know wass good an bad moa betta?
How you can show respeck fo wat oddas tink az ok an not ok?
LEARN SOME MOA
How you can choose fo do tings dat make you moa tight wit God?
“Make Decisions That Honor God” (The Watchtower, April 15, 2011)
Undastan moa betta how Jehovah help you fo know wat fo do.
Learn wat wen help one braddah wen he had hard time fo choose wat fo do.
Learn about how fo make Jehovah happy even wen he no tell exackly wat suppose to do.
“Do You Always Need a Bible Command?” (The Watchtower, December 1, 2003)
-