Pretty soon, Jehovah goin use his Govament fo wipe out all oua pilikia. Brah, dass so good dat erybody gotta know about um, aah? Jesus wanted his guys fo tell dis good kine tings to erybody! (Matthew 28:19, 20) How Witnesses Fo Jehovah wen do wat Jesus wen tell?

1. How Matthew 24:14 stay happening right now?

Jesus wen tell befoa time: “All ova da world goin get peopo dat goin tell all da Good Kine Stuff bout how fo get God fo dea king.” (Matthew 24:14) Witnesses Fo Jehovah ony happy fo do dis importan work. We stay telling da good kine tings all ova world in ova 1,000 languages! Dis mangus job take plenny work an erybody gotta work togedda. No way can do um witout Jehovah’s help.

2. How us guys try hard fo go preach to oddas?

We try tell peopo da good kine tings wea eva dey stay. Jalike da firs Christians, we go talk story wit da peopo “inside all da houses.” (Jesus Guys 5:42) By doing um lidis, us can talk to millions of peopo ery year. An cuz peopo no stay home all da time, we go wea da peopo stay fo preach ova dea. Us always look fo da chance fo tell oddas about Jehovah an da tings he like do.

3. Who get da kuleana fo preach da good kine tings?

All fo real kine Christians get da kuleana fo share da good kine tings wit oddas. Dis kuleana is no joke. We preach az much az can cuz dat can save peopo’s lifes. (Read um 1 Fo Timoty 4:16.) We do dis work fo free cuz da Bible tell: “God give you guys plenny, an he no expeck notting back. So den, you guys give plenny too, an you guys no expeck notting back.” (Matthew 10:7, 8) Even if not erybody lissen wat we tell, we still yet preach cuz we lissen Jehovah an dat make him happy.

DIG MOA DEEP

4. Us work hard fo preach to all da peopo

VIDEO: Preaching “All Ova Da World” (7:33)

• Wat is mean about how Witnesses Fo Jehovah try hard fo preach?

Read um Matthew 22:39 an Fo Da Rome Peopo 10:13-15, an den talk story about dese questions:

• Wen we go preach, how dat show love an aloha fo odda peopo?

• How Jehovah feel about da guys who go preach da good kine tings?—Go look verse 15.

5. Us guys an God, we work togedda

Plenny times, can see dat Jehovah da one dat stay in charge of oua work. One time in New Zealand, dis braddah named Paul wen go preach house-to-house one aftanoon an meet one lady. Dat morning, da lady wen pray to God an wen use his name, Jehovah, an she wen ask fo somebody fo come help her know him moa betta. Paul tell: “Ony three hours layta, I wen go to her house.”

Read um 1 Fo Da Corint Peopo 3:9, an den talk story about dis question:

• How tings jalike wat wen happen in New Zealand show dat Jehovah da one in charge of da preaching work we do?

Read um Jesus Guys 1:8, an den talk story about dis question:

• How come us need Jehovah’s help fo do da preaching work we do?

You wen know?

Ery week we get oua middo of da week meeting. Ova dea, az wea we learn how fo preach moa betta. If you wen go one of dese meetings, wat you wen tink about how we learn fo preach?

6. We lissen wen God tell us fo preach

Way back in da firs century, had guys dat wen try stop Jesus guys from telling good kine tings to odda peopo. Da firs Christians wen “use da law fo get an proteck da right fo preach da good kine tings.” (Fo Da Philippi Peopo 1:7) Witnesses Fo Jehovah do da same ting today.a

VIDEO: Using Da Law Fo Proteck Da Right Fo Preach (2:28)

Read um Jesus Guys 5:27-29, 31-42, an den talk story about dis question:

• How come us not goin stop preaching?—Go look verses 29, 38, and 39.

WAT WE WEN TALK ABOUT

Jesus wen tell his guys fo go preach da good kine tings all ova da world. Jehovah stay help his peopo fo do dis work.

Wat You Wen Learn

• How da good kine tings getting preached all ova da world?

• Wen us go preach, how dat show love an aloha fo odda peopo?

• You tink preaching to oddas can make you happy o wat? How come?

LEARN SOME MOA

Try look how Witnesses Fo Jehovah preach to peopo in da big kine cities.

Special Metropolitan Public Witnessing in Paris (5:11)

How Witnesses Fo Jehovah help peopo who had fo dig out from dea country?

Satisfying Spiritual Thirst Among Refugees (5:59)

One lady tell how good fun life can be wen you preach full time.

Glad I Chose This Career (6:29)

Learn about da tings da courts wen decide dat wen make um moa easy fo preach da good kine tings.

“Kingdom Preachers Take Their Case to Court” (God’s Kingdom Rules!, chapta 13)

Jesus wen teach dat Christians gotta get baptize. (Read um Matthew 28:19, 20.) But wat dat mean, fo get baptize? An wat somebody gotta do fo get dea?

1. Wat dat mean, fo get baptize?

Da word “baptize” come from one Greek word dat mean “fo dip” unda da watta. Wen Jesus had get baptize, his whole body wen go in da Jordan Riva, an den he wen come “up outa da watta.” (Mark 1:9, 10) Same same jalike Jesus, fo real kine Christians get baptize wen dea whole body go undaneat da watta.

2. Wat somebody show wen he get baptize?

Wen somebody get baptize, dey show dat dey wen give dea life to Jehovah God. How somebody give dea life to Jehovah? Befoa he get baptize, dat person pray to Jehovah by himself an tell Him dat he like serve him foeva. He promise he goin worship ony Jehovah an fo do wat God like goin be da mos importan ting in his life. He choose fo “make up [his] mind dat [he] no goin be da boss fo [him] no moa . . . [an] stay tight wit” wat Jesus teach an do. (Matthew 16:24) Giving his life to Jehovah an getting baptize make um so dat he can stay tight wit Him an wit oddas who worship him too.

3. Wat somebody gotta do befoa he can get baptize?

Befoa you get baptize, az importan fo learn about Jehovah an fo make yoa trus in him solid. (Read um Fo Da Hebrew Peopo 11:6.) Da moa you get fo know an trus Jehovah, da moa love an aloha you goin get fo him. Den fo shua, you goin like preach about him an live da way he like. (2 Fo Timoty 4:2; 1 From John 5:3) Wen somebody like make Jehovah feel good an live da way He like fo dem live, he goin like give his life to God an get baptize.—Fo Da Colosse Peopo 1:9, 10.a

DIG MOA DEEP

4. We learn from wen Jesus get baptize

Read um Matthew 3:13-17 fo learn some moa about wen Jesus wen get baptize. Den talk story about dese questions:

• Jesus was one bebe wen he get baptize o wat?

• How he wen get baptize? Dey wen jus sprinkle him wit watta o wat?

Jesus wen start fo do da spesho work God wen give him fo do on top da earth wen he had get baptize. Read um Luke 3:21-23 an John 6:38, an den talk story about dis question:

• Afta Jesus wen get baptize, wat kine work was numba one in his life?

5. You can get baptize

Maybe you tink, fo give yoa life to Jehovah an fo get baptize az hard, aah? Still yet, you can get to wea you stay shua dat you like make da choice fo do dat importan ting. Fo see some peopo who wen do dat, play um da VIDEO.

VIDEO: Making Yoa Frenship Wit Jehovah Moa Strong (1:11)

Read um John 17:3 an From James 1:5, an den talk story about dis question:

• Wat can help somebody make ready fo get baptize?

1. We give oua life to Jehovah wen we tell him dat we like serve him foeva

2. Wen we get baptize, we show da peopo dat we wen give oua life to Jehovah

6. Wen we get baptize, we come part of Jehovah’s ohana

Wen we get baptize, we come part of one tight ohana who stay all ova da world. Even if we no come from da same place an we wen grow up diffren from each odda, all us believe da same ting an live da way da Bible tell us fo live. Read um Songs Fo God 25:14 an 1 From Peter 2:17, an den talk story about dis question:

• Wen somebody get baptize, how dat change da way dey stay tight wit Jehovah an wit oddas who worship Him?

WAT WE WEN TALK ABOUT

Jesus wen teach dat Christians gotta get baptize. Befoa somebody get baptize, dey gotta make dea trus in Jehovah solid, live da way He like dem fo live, an give dea life to Him.

Wat You Wen Learn

• Wat dat mean, fo get baptize, an how come az importan?

• Fo give yoa life to Jehovah an fo get baptize, wat dat gotta do wit each odda?

• Wat somebody gotta do befoa dey can give dea life to Jehovah an get baptize?

LEARN SOME MOA

Learn wat mean fo get baptize.

“What Is Baptism?” (Web article)

Try look how somebody can make ready fo get baptize.

“Love and Appreciation for Jehovah Lead to Baptism” (The Watchtower, March 2020)

Read um how one guy wen choose fo get baptize, not ony cuz how he feel.

“They Wanted Me to Prove the Truth to Myself” (The Watchtower, February 1, 2013)

Try look how come az good fo get baptize an how you can make ready fo do dat.

“Should I Get Baptized?” (Questions Young People Ask​—Answers That Work, Volume 2, chapta 37)