-
How Come Get Bad Kine Stuff An Peopo Suffa?You Can Live Good Foeva!—Learn Da Bible By Talking Story
-
-
LESSON 26
How Come Get Bad Kine Stuff An Peopo Suffa?
“How come?” Dass one normal ting fo wonda wen bad stuff happen. We so happy dat da Bible get good kine ansas to dat question!
1. How Satan wen bring bad kine stuff into da world?
Da pilau buggah Satan, he wen go agains God. Satan wanted fo be in charge ova erybody so he wen get da firs humans, Adam an Eve, fo take his side an go agains God. He wen do dis by telling one bulai to Eve. (Da Start 3:1-5) He wen go make her tink dat Jehovah was doing someting bad an holding out on her. He wen make like peopo would be way moa happy if dey neva lissen God. Satan wen tell Eve she no would mahke. Dat was da firs bulai eva. Dass how come da Bible tell Satan, “he da firs guy eva wen bulai.”—John 8:44.
2. Wat Adam an Eve wen do?
Jehovah wen give Adam an Eve eryting. Jehovah wen tell dem dey could grind from any tree inside Eden. Ony one was kapu. (Da Start 2:15-17) But dey wen go eat um anyway. Eve, “she take some a da fruits an eat um.” Den, Adam, “he eat um wit her.” (Da Start 3:6) Da two of dem neva lissen God. Cuz dey was perfeck was ony easy fo dem fo do da right ting. But wen dey wen choose fo go agains God, dey wen sin an show dat dey neva like God be in charge of dem. Cuz dey wen choose fo do dat, dey wen suffa plenny.—Da Start 3:16-19.
3. How dat affeck us, wat Adam an Eve wen do?
Wen Adam an Eve wen do da bad kine stuff an sin, dey no was perfeck afta dat an dey wen pass dat onto dea kids an so erybody afta dem no was perfeck eidda. Talking about Adam, da Bible tell: “He da one wen start fo do bad kine stuff. Az why God neva let um live foeva.” An from him, sin an death wen spread to erybody. So, “same ting happen jalike wit dat man, erybody gotta mahke.”—Fo Da Rome Peopo 5:12.
Get plenny reasons how come we suffa. Sometimes we no make da bes choices an dass how come we suffa. Sometimes we suffa cuz odda peopo make one bad choice. Sometimes we suffa cuz we stay in da wrong place at da wrong time.—Read um Da Teacha 9:12.
DIG MOA DEEP
Try look how come wen peopo suffa an bad tings happen, is not God’s fault, an look how he feel wen we suffa.
4. Da one making us suffa
Plenny peopo tink dat God, he in charge of da whole world. Dat true o wat? Play um da VIDEO.
Read um From James 1:13 an 1 From John 5:19, an den talk story about dis question:
So you tink az God’s fault dat peopo suffa an get bad stuff happening?
5. Try tink about wat da world stay like cuz Satan stay in charge
Read um Da Start 3:1-6, an den talk story about dese questions:
Wat bulai Satan wen tell?—Go look verses 4 and 5.
How Satan wen make like Jehovah wen hold back someting good from erybody?
From wat Satan wen tell, fo peopo be happy, dey gotta have Jehovah in charge of dem o wat?
Read um Micah 7:3, an den talk story about dis question:
Wat wen happen cuz Jehovah not in charge of da world?
Adam an Eve was perfeck an wen live in one cherreh Paradise earth. But dey wen lissen Satan an wen go agains Jehovah
Afta dey wen go agains God, da world suffa, get all kine bad stuff erywea, an death
Jehovah goin hemo all bad kine stuff, an notting going suffa o mahke. One moa time, humans going be perfeck an live in Paradise
6. Jehovah kea plenny wen we suffa
God kea wen we suffa, o wat? Try look wat King David an da aposal Peter wen write. Read um Songs Fo God 31:7 an 1 From Peter 5:7, an den talk story about dis question:
How make you feel fo know dat Jehovah, he see wen we suffa an he kea plenny about um?
7. God goin hemo all da tings dat make us suffa
Read um Isaiah 65:17 an Jesus Show 21:3, 4, an den talk story about dis question:
How come make us feel good fo know dat all da bad stuff dat peopo wen go thru, Jehovah goin make um like neva even happen?
You wen know?
Wen Satan wen tell da firs bulai, he wen bad mout Jehovah. He wen make peopo tink bad tings about Jehovah, dat He not fair an he no moa love fo peopo. Pretty soon Jehovah goin hemo all da tings dat make humans suffa an clear his rep. Dis mean he goin prove da way he rule is da bes. Jehovah’s name coming good again is da mos importan ting eva.—Matthew 6:9, 10.
WAT SOME PEOPO TELL: “Was God’s plan fo us suffa.”
Wat you goin say?
WAT WE WEN TALK ABOUT
All da bad stuff in da world today is cuz of Satan da Devil an Adam an Eve. Jehovah kea plenny wen we suffa an pretty soon he goin fix all dat.
Wat You Wen Learn
Wat bulai Satan wen tell Eve?
How Adam an Eve goin agains Jehovah affeck all us?
How we know fo shua dat Jehovah kea plenny wen we suffa?
LEARN SOME MOA
Find out wat sin mean in da Bible.
Read some moa about da lie Satan wen tell about Jehovah inside da garden of Eden.
“Why Does God Allow Suffering?” (The Watchtower, January 1, 2014)
Look how da ansas to dese hard questions can make you feel good.
“Why Did the Holocaust Happen? Why Didn’t God Stop It?” (Web article)
Try check out wat one guy wen learn wen peopo aroun him had suffa.
-
-
Cuz Jesus Had Mahke, How Dat Save Us?You Can Live Good Foeva!—Learn Da Bible By Talking Story
-
-
Cuz da firs humans, Adam an Eve, neva lissen God, dass how come we sin, suffa, an mahke.a But dat no mean we no moa hope. Jehovah wen give his Boy, Jesus Christ, fo make da way out fo us. Da Bible teach dat wen Jesus wen mahke, he wen give one ransom. One ransom is wen you pay fo cut loose somebody. Da price Jesus wen pay fo cut us loose was his perfeck human life. (Read um Matthew 20:28.) Jesus had da right fo live foeva on da earth but he wen give dat up so dat we can get back wat Adam an Eve wen lose. Jesus wen show how much love him an Jehovah get fo us. Dis lesson goin help you be moa tankful fo wat Jesus wen do wen he had mahke fo us.
1. Cuz Jesus wen mahke, how dat can be good fo us today?
Cuz all us sin, we do plenny stuff Jehovah no like. But if we fo real kine sorry fo da bad stuff we do an ask Jehovah thru Jesus fo let us go, an try oua bes fo no do dat stuff anymoa, we can be real good frenz wit Jehovah an stay tight wit him. (1 From John 2:1) Da Bible tell: “Christ wen mahke ony one time cuz erybody stay do bad kine stuff. He erytime do da right ting, but den he wen mahke fo all da peopo dat stay do bad kine tings. He wen mahke fo you guys come nea God.”—1 From Peter 3:18.
2. Cuz Jesus wen mahke, how dat goin be good fo us layta on?
Jehovah wen “sen . . . his one an ony Boy,” so dat erybody dat trus Jesus “no goin get cut off from God foeva! Dey goin get da real kine life dat goin stay to da max foeva!” (John 3:16) Cuz of wat Jesus wen do, Jehovah goin hemo all da bad stuff dat wen happen cuz Adam neva lissen. So dat mean dat erybody who show trus in Jesus’ sacrifice goin get da chance fo live good foeva in one paradise earth!—Isaiah 65:21-23.
DIG MOA DEEP
Undastan moa betta how come Jesus wen mahke an tink how dat goin be good fo you.
3. Cuz Jesus wen die, dat cut us loose from sin an death
Play um da VIDEO, an den talk story about da question afta.
Wat chance Adam had lose out on cuz he neva lissen God?
Read um Fo Da Rome Peopo 5:12, an den talk story about dis question:
Cuz Adam wen do bad kine stuff, how dat affeck you?
Read um John 3:16, an den talk story about dis question:
How come Jehovah wen sen his Boy to da earth?
Adam was one perfeck guy who neva lissen God, an cuz of dat peopo sin an mahke
Jesus was one perfeck guy who wen lissen God, an cuz of dat, peopo get chance fo be perfeck an live foeva
4. Jesus’ death good fo erybody
Play um da VIDEO, an den talk story about da question afta.
How can da death of one guy be good fo erybody?
Read um 1 Fo Timoty 2:6, an den talk story about dis question:
Adam was one perfeck guy who wen make peopo sin an mahke. Jesus was one perfeck guy too. How he wen “pay da price fo free erybody up”?
5. Da ransom, one gif from Jehovah fo you
Da guys who close to Jehovah look da ransom az one gif to dem. Read um Fo Da Galatia Peopo 2:20, an den talk story about dis question:
How Paul wen show dat he wen see da ransom az one gif fo him?
Wen Adam wen do bad kine stuff an sin, him an all da guys dat wen come from him, had fo mahke. But Jehovah wen sen his Boy fo mahke so dat you can get da chance fo live good foeva.
Try tink how Jehovah had feel wen his Boy wen suffa. Read um John 19:1-7, 16-18, an den talk story about dis question:
How you feel about wat Jehovah an Jesus wen do fo you?
WAT SOME PEOPO TELL: “One guy mahke so erybody can live? How dat can?”
Wat you goin say if dey tell you dat?
WAT WE WEN TALK ABOUT
Cuz Jesus wen mahke, Jehovah can let us go from all da bad kine stuff we do an give us chance fo live good foeva.
Wat You Wen Learn
How come Jesus had mahke?
How Jesus’ perfeck life wen pay da price fo free erybody up from sin an death?
Cuz Jesus had mahke, how dat good fo you?
LEARN SOME MOA
Learn how come Jesus’ perfeck life stay called one ransom.
“How Is Jesus’ Sacrifice ‘a Ransom for Many’?” (Web article)
Find out wat we gotta do fo get saved.
Mayjah kine sins, Jehovah can let um go?
Try look how Jesus’ sacrifice wen help one guy fo change da kine person he was.
a Sin is not ony doing bad kine stuff but also mean da bad way we stay cuz we come from Adam an Eve.
-