All ova da world, peopo no tink da same way wen come to alcohol. Some guys drink ony wen dey togedda wit dea frenz. Get some guys who no even drink. An odda guys suck um up so much dey get piloot. So wat da Bible tell about alcohol?

1. Is wrong fo drink alcohol o wat?

Da Bible no tell is wrong fo drink alcohol. Wen da Bible talk about da good tings God wen give us, it talk about “da wine dat make um feel good inside.” (Songs Fo God 104:14, 15) Had some solid braddahs an sistahs da Bible wen talk about who wen drink alcohol.​—1 Fo Timoty 5:23.

2. Wat good kine words from da Bible can help you if you goin drink?

Jehovah tell az no good fo suck um up too much an get piloot. (Fo Da Galatia Peopo 5:21) Da Bible tell: “No come jalike some a da guys dat suck um up too much erytime.” (Smart Guys 23:20) So if we goin drink​—wit odda peopo o by ouaself—​az no good fo drink so much us no can tink straight, tell o do any kine, o jam up oua body. So if us no can hando wen we drink, maybe we no should drink anymoa.

3. How us can show respeck fo how oddas tink about alcohol?

Each person gotta choose if dey goin drink alcohol o not. Az no good fo judge somebody who choose fo drink even litto bit, an az no good fo presha somebody fo drink if dey no like. (Fo Da Rome Peopo 14:10) An if us drinking goin make trouble fo oddas, maybe we no goin drink. (Read um Fo Da Rome Peopo 14:21.) “Mo betta us no try fo do ony da stuff dat us guys like do. Mo betta us do da stuff dat help da odda peopo too.”​—Read um 1 Fo Da Corint Peopo 10:23, 24.

DIG MOA DEEP

4. Wat, you goin drink?

Wat Jesus wen tink about drinking alcohol? Fo learn da ansa, try look da firs miracle dat he wen do. Read um John 2:1-11, an den talk story about dese questions:

• Wat we learn from dis miracle about how Jesus tink about alcohol an da guys dat drink um?

• Cuz Jesus neva tell drinking alcohol was bad, how one Christian gotta tink about somebody who drink?

But, jus cuz one Christian can drink alcohol, dat no mean dass smart fo dem do um erytime. Read um Da Smart Guys 22:3, an try tink how dese tings goin help you figga if you goin drink o not:

• You goin drive o run one machine.

• You stay hapai.

• One docta tell you no good fo you drink alcohol.

• You get hard time fo hold back how much you drink.

• Az agains da law fo you drink alcohol.

• You stay wit somebody who no drink cuz befoa time dey had one drinking problem.

You goin get alcohol at yoa wedding o anodda party o wat? Fo see wat can help you figga out wat fo do, play um da VIDEO.

VIDEO: I Goin Serve Alcohol O Wat? (2:41)

Read um Fo Da Rome Peopo 13:13 an 1 Fo Da Corint Peopo 10:31, 32. Afta reading each scripcha, talk story about dis question:

• How dis can help you pick da ting dat goin make Jehovah happy?

5. Figga how much you goin drink

If you goin drink alcohol, try rememba: even if Jehovah no tell drinking alcohol is bad, he tell is bad fo suck um up too much. How come? Read um Hosea 4:11, 18, an den talk story about dis question:

• Wat can happen wen somebody suck um up too much?

Wat can help us fo no suck um up too much? We gotta be humbo an know how much we can hando. Read um Smart Guys 11:2, an den talk story about dis question:

• If you goin drink, how come az good fo know wen you goin stop?

6. Wat can help somebody stop sucking um up too much?

VIDEO: ‘I Stay Sick Of Living One Jam Up Life’ (6:32)

• Inside da video, how Dmitry wen ack wen he wen drink?

• He was able fo stop drinking right away o wat?

• Wat wen help him no need alcohol anymoa?

Read um 1 Fo Da Corint Peopo 6:10, 11a, an den talk story about dese questions:

• Coming all piloot, how come dass serious?

• How we know somebody who abuse alcohol can change?

Read um Matthew 5:30, an den talk story about dis question:

• Wen Jesus used da word picha fo cut um off yoa hand, dass jalike giving up someting fo make Jehovah happy. If you sucking um up too much an get hard time stop, wat can help you?a

Read um 1 Fo Da Corint Peopo 15:33, an den talk story about dis question:

• Wat can happen if you hang out wit guys dat suck um up too much?

WAT WE WEN TALK ABOUT

Jehovah wen give us alcohol so notting wrong wit um. But he tell is bad fo suck um up too much an get piloot.

Wat You Wen Learn

• Wat da Bible tell about alcohol?

• Wat bad kine stuff can happen if we suck um up too much?

• How us can show respeck fo da way oddas tink about alcohol?

LEARN SOME MOA

How teenagers can be akamai wen come to alcohol?

Tink Befoa You Drink (2:31)

Go look wat you can do fo get ova one drinking problem.

“Keeping Alcohol in Its Place” (The Watchtower, January 1, 2010)

Az ok fo one Christian fo toast?

“Questions From Readers” (The Watchtower, February 15, 2007)

Inside da story “I Was a Bottomless Barrel,” try look how one guy wen stop sucking um up too much.

“The Bible Changes Lifes” (The Watchtower, May 1, 2012)

We all like fo choose wat kine clothes we goin wea an how we goin look. Get simple kine truts in da Bible, an if we follow dat we can choose fo wea wat we like, an still yet make Jehovah stay good inside. We go talk story about some of um.

1. Wat goin help us fo choose wat we goin wear an how we goin look?

Da Bible tell us fo “ack da right way . . . dress good, an show respeck fo who [us] wen [we] put on clotheses,” an always look clean so oddas see oua “respeck fo God.” (1 Fo Timoty 2:9, 10) Try tink about: (1) We gotta dress good. Jalike you wen see at meetings wit da local hui, Jehovah’s peopo wear plenny diffren kine clotheses, but wat we wear an how we make oua hair, show respeck fo da God dat we worship. (2) Wen we pick clotheses dat show respeck fo who us, we no goin dress in one way dat make oddas tink da wrong way, o make jalike we tantaran. (3) We show we ack da right way an no jus follow wat stay popular wen come to wat we wear an how we look. (4) How we look always gotta show dat we get respeck fo God, so oddas can see dat we worship da God dass fo real.​—1 Fo Da Corint Peopo 10:31.

2. How come we gotta tink about oua braddahs an sistahs wen we choose wat fo wear?

Az true, we can choose wat we like fo wear, but we gotta tink about if wat we look like goin be one problem fo oddas. We no like make anybody come huhu wit us, but we like try “make [dem] come mo strong fo handle all dat. Den dey goin stay good inside too.”​—Read um Fo Da Rome Peopo 15:1, 2.

3. How da way we look can make peopo like learn moa about Jehovah?

We always try fo dress good erytime, but even moa wen we go meetings wit da local hui an go field service. We like peopo pay attention to da importan message we bringing dem, an not da way we look. So den, da way we look can make oddas learn moa about God an make da stuff we teach “look real good.”​—Fo Titus 2:10.

DIG MOA DEEP

4. Wen we dress good, we show respeck fo Jehovah

Wass da mos importan reason us kea about how we look? Read um Songs Fo God 47:2, an den talk story about dese questions:

• Cuz we rep Jehovah, how dat goin help us choose wat fo wear?

• We really gotta kea about how we look wen we go meetings an field service o wat? How come?

5. Wat can help us fo choose wat fo wear an how fo look?

Play um da VIDEO.

VIDEO: “Do Eryting Fo Show How Awesome God Stay” (10:18)

Wedda oua clothes cost plenny o only litto bit, dey gotta be clean an match wea we stay an wat we stay doing. Read um 1 Fo Da Corint Peopo 10:24 an 1 Fo Timoty 2:9, 10. Den, talk story about how come we no like wear clothes dat  . . .

• stay messy o too relax fo wea you stay.

• stay too tight, show too much stuffs, o make oddas tink wrong kine thoughts.

Even tho Christians no need follow da rules dat God give Moses fo give to da Israel peopo, dey can learn plenny from um about how Jehovah tink. Read um Da Rules Secon Time 22:5, an den talk story about dis question:

• How come we gotta stay away from clotheses an da kine styles dat make one guy look like one wahine, o one wahine look like one guy?

Read um 1 Fo Da Corint Peopo 10:32, 33 an 1 From John 2:15, 16, an den talk story about dese questions:

• How come we gotta kea if da way we look go make peopo wear we live o in da local hui come huhu?

• Wea you live, wat kine clothes peopo wea an how dey look like?

• You tink some of dose kine styles az ok fo one Christian wear o wat? How come?

WAT WE WEN TALK ABOUT

We show respeck fo Jehovah an fo oddas wen we make good kine choices about wat fo wear an how fo look.

Wat You Wen Learn

• How come wat we wear an how we look stay importan to Jehovah?

• Wat can help us fo choose wat we goin wear an how we goin look?

• How da way we look can make oddas like learn moa about Jehovah?

LEARN SOME MOA

See wat oddas might tink about you wen dey see yoa clothes.

“How Do I Look?” (Web article)

Learn how come is akamai fo tink good about wat can happen befoa you get one tattoo.

“What Does the Bible Say About Tattoos?” (Web article)

Try look some odda tings dat can help us choose wat fo do.

“Does Your Style of Dress Glorify God?” (The Watchtower, September 2016)

How one lady who wanted fo make God happy had learn how fo be ok wit how oddas wen choose fo dress?

“Dress and Grooming Was My Stumbling Block” (Awake!, December 22, 2003)