7. Da laws God’s Govament get is da bes

Govaments make laws dat suppose to be good fo da peopo an proteck um. Da peopo unda God’s Govament gotta follow laws too. Read um 1 Fo Da Corint Peopo 6:9, 10, an Fo Da Hebrew Peopo 10:22. Den talk story about dese questions:

• How you tink da world goin be like wen erybody ack da way God tell?a

• Jehovah expeck peopo unda his Govament fo lissen him. You tink dass fair? How come?

• How we know peopo who no lissen God’s laws now, can change?—Go look Fo Da Hebrew Peopo 10:22.

Plenny peopo feel shame fo talk about sex. But, wen da Bible talk about sex, az straight up wit choke respeck. Wat it tell az good fo us. Dat make sense cuz Jehovah wen make us, an he da One know wat bes fo us. He tell us in da Bible how fo make him happy an wat goin make us live good foeva.

1. Wat Jehovah tink about sex?

Sex is one gif from Jehovah. He wen make um fo one husban an wife enjoy um togedda. Dis gif fo couples let um not ony have bebes, but is one way dey can show dea love. Dass how come da Bible tell: “Yoa wife . . . she da one make good tings happen fo you, an you feel good wen you stay wit her.” (Smart Guys 5:18, 19) Jehovah expeck Christians dat stay married fo stick tight togedda so dey neva goin fool aroun.​—Read um Fo Da Hebrew Peopo 13:4.

2. Wat is da wrong kine sex God no like?

Da guys dat make wrong kine sex, da Bible tell “no way dey goin get God fo dea king.” (1 Fo Da Corint Peopo 6:9, 10) Da guys who wen write da Bible wen use da Greek word por·neiʹa fo talk about wrong kine sex. Dat word cova tings like (1) sexa between peopo dat no stay married, (2) guys wit guys an girls wit girls, an (3) sex wit animals. We goin make Jehovah happy an tings goin be good fo us wen we “no go fool aroun.”​—1 Fo Da Tessalonika Peopo 4:3.

DIG MOA DEEP

3. Run away from wrong kine sex

Joseph, one guy dat was tight wit Jehovah, had fo fight fo stay clean inside. Read um Da Start 39:1-12, an den talk story about dese questions:

• Wat wen make Joseph like run away?​—Go look verse 9.

• You tink Joseph wen do da right ting? How come?

VIDEO: Run Away From Wrong Kine Stuff (5:06)

Jehovah like all us stay far away from wrong kine stuff. Read um 1 Fo Da Corint Peopo 6:18, an den talk story about dese questions:

• Wat can happen fo make um easy fo do wrong kine sex stuff?

• How you can run away from wrong kine stuff?

4. You can fight wrong kine presha

VIDEO: Fight Presha By Reading Da Bible (3:02)

• Wen da braddah in da video wen figga dat da way he tink an da way he ack goin cause him fo cheat on his odda half, wat he wen do?

Even solid Christians get hard time fo no tink bad kine stuff. How you can stop yoaself from tinking plenny about bad kine stuff? Read um Fo Da Philippi Peopo 4:8, an den talk story about dese questions:

• Wat kine stuff we should tink about?

• How can reading da Bible an doing plenny fo Jehovah kokua us fo fight agains presha fo do bad kine stuff?

5. Wat Jehovah tell us fo do is good fo us

VIDEO: Da Guy No Mo One Brain (9:31)

• How dis young guy wen put himself in one place wea get presha fo do bad?​—Go look Smart Guys 7:8, 9.

• Smart Guys 7:23, 26 tell dat pilau sex can make tings come out real bad. Wat kine pilikia we can dodge if we stay clean inside?

• How can staying clean inside help us fo live good foeva?

Some peopo tink dat wat da Bible tell about mahu kine sex, not loving. But Jehovah, da God of love an aloha, like erybody live good foeva. But fo do dat, we gotta live da way he like. Read um 1 Fo Da Corint Peopo 6:9-11, an den talk story about dis question:

• Fo like do mahu kine stuff, dass da ony ting wrong to God?

Fo make God happy, all us guys need fo change. Worth it o wat? Read um Songs Fo God 19:8, 11, an den talk story about dese questions:

• You tink wat Jehovah tell us fo do is good an make sense? How come?

WAT WE WEN TALK ABOUT

Sex is one gif from Jehovah fo one husban an wife enjoy.

Wat You Wen Learn

• Wat kine sex is wrong?iz

• Wat goin kokua us fo stay away from wrong kine sex?

• How az good fo us if we lissen wat Jehovah like us do?

LEARN SOME MOA

Try look how come it matta to God if da couple stay married o not.

“What Does the Bible Say About Living Together Without Marriage?” (Web article)

Even tho da Bible tell dat mahu kine sex is wrong, no mean dat we hate da guys who do um.

“Is Homosexuality Wrong?” (Web article)

Learn how God’s rules about all kine sex stuff proteck us.

“Is Oral Sex Really Sex?” (Web article)

In dis real life story “They Treated Me With Dignity,” see wat wen make one mahu guy change his life fo make God happy.

“The Bible Changes Lifes” (The Watchtower, April 1, 2011)

All ova da world, peopo no tink da same way wen come to alcohol. Some guys drink ony wen dey togedda wit dea frenz. Get some guys who no even drink. An odda guys suck um up so much dey get piloot. So wat da Bible tell about alcohol?

1. Is wrong fo drink alcohol o wat?

Da Bible no tell is wrong fo drink alcohol. Wen da Bible talk about da good tings God wen give us, it talk about “da wine dat make um feel good inside.” (Songs Fo God 104:14, 15) Had some solid braddahs an sistahs da Bible wen talk about who wen drink alcohol.​—1 Fo Timoty 5:23.

2. Wat good kine words from da Bible can help you if you goin drink?

Jehovah tell az no good fo suck um up too much an get piloot. (Fo Da Galatia Peopo 5:21) Da Bible tell: “No come jalike some a da guys dat suck um up too much erytime.” (Smart Guys 23:20) So if we goin drink​—wit odda peopo o by ouaself—​az no good fo drink so much us no can tink straight, tell o do any kine, o jam up oua body. So if us no can hando wen we drink, maybe we no should drink anymoa.

3. How us can show respeck fo how oddas tink about alcohol?

Each person gotta choose if dey goin drink alcohol o not. Az no good fo judge somebody who choose fo drink even litto bit, an az no good fo presha somebody fo drink if dey no like. (Fo Da Rome Peopo 14:10) An if us drinking goin make trouble fo oddas, maybe we no goin drink. (Read um Fo Da Rome Peopo 14:21.) “Mo betta us no try fo do ony da stuff dat us guys like do. Mo betta us do da stuff dat help da odda peopo too.”​—Read um 1 Fo Da Corint Peopo 10:23, 24.

DIG MOA DEEP

4. Wat, you goin drink?

Wat Jesus wen tink about drinking alcohol? Fo learn da ansa, try look da firs miracle dat he wen do. Read um John 2:1-11, an den talk story about dese questions:

• Wat we learn from dis miracle about how Jesus tink about alcohol an da guys dat drink um?

• Cuz Jesus neva tell drinking alcohol was bad, how one Christian gotta tink about somebody who drink?

But, jus cuz one Christian can drink alcohol, dat no mean dass smart fo dem do um erytime. Read um Da Smart Guys 22:3, an try tink how dese tings goin help you figga if you goin drink o not:

• You goin drive o run one machine.

• You stay hapai.

• One docta tell you no good fo you drink alcohol.

• You get hard time fo hold back how much you drink.

• Az agains da law fo you drink alcohol.

• You stay wit somebody who no drink cuz befoa time dey had one drinking problem.

You goin get alcohol at yoa wedding o anodda party o wat? Fo see wat can help you figga out wat fo do, play um da VIDEO.

VIDEO: I Goin Serve Alcohol O Wat? (2:41)

Read um Fo Da Rome Peopo 13:13 an 1 Fo Da Corint Peopo 10:31, 32. Afta reading each scripcha, talk story about dis question:

• How dis can help you pick da ting dat goin make Jehovah happy?

5. Figga how much you goin drink

If you goin drink alcohol, try rememba: even if Jehovah no tell drinking alcohol is bad, he tell is bad fo suck um up too much. How come? Read um Hosea 4:11, 18, an den talk story about dis question:

• Wat can happen wen somebody suck um up too much?

Wat can help us fo no suck um up too much? We gotta be humbo an know how much we can hando. Read um Smart Guys 11:2, an den talk story about dis question:

• If you goin drink, how come az good fo know wen you goin stop?

6. Wat can help somebody stop sucking um up too much?

VIDEO: ‘I Stay Sick Of Living One Jam Up Life’ (6:32)

• Inside da video, how Dmitry wen ack wen he wen drink?

• He was able fo stop drinking right away o wat?

• Wat wen help him no need alcohol anymoa?

Read um 1 Fo Da Corint Peopo 6:10, 11a, an den talk story about dese questions:

• Coming all piloot, how come dass serious?

• How we know somebody who abuse alcohol can change?

Read um Matthew 5:30, an den talk story about dis question:

• Wen Jesus used da word picha fo cut um off yoa hand, dass jalike giving up someting fo make Jehovah happy. If you sucking um up too much an get hard time stop, wat can help you?a

Read um 1 Fo Da Corint Peopo 15:33, an den talk story about dis question:

• Wat can happen if you hang out wit guys dat suck um up too much?

WAT WE WEN TALK ABOUT

Jehovah wen give us alcohol so notting wrong wit um. But he tell is bad fo suck um up too much an get piloot.

Wat You Wen Learn

• Wat da Bible tell about alcohol?

• Wat bad kine stuff can happen if we suck um up too much?

• How us can show respeck fo da way oddas tink about alcohol?

LEARN SOME MOA

How teenagers can be akamai wen come to alcohol?

Tink Befoa You Drink (2:31)

Go look wat you can do fo get ova one drinking problem.

“Keeping Alcohol in Its Place” (The Watchtower, January 1, 2010)

Az ok fo one Christian fo toast?

“Questions From Readers” (The Watchtower, February 15, 2007)

Inside da story “I Was a Bottomless Barrel,” try look how one guy wen stop sucking um up too much.

“The Bible Changes Lifes” (The Watchtower, May 1, 2012)

Even if you love Jehovah plenny, an you try hard fo no do anyting dat would make him sad, you goin make mistakes sometimes. But some sins is moa worse den oddas. (1 Fo Da Corint Peopo 6:9, 10) If you do someting really bad, rememba dat Jehovah neva stop loving you; he like let you go an help you.

1. Wat we gotta do so Jehovah goin let us go?

Da guys who love Jehovah stay supa sad wen dey figga dey wen do someting really bad. But dey can res inside fo know wat Jehovah wen promise his peopo: “No matta all da bad kine stuff you wen do look jalike one big red spot now, but dey goin come white jalike da snow.” (Isaiah 1:18) If we feel fo real kine sorry, den Jehovah goin let us go fo real kine. How we show we fo real kine sorry? Cuz we feel supa bad about wat we wen do, we stop doing wat stay bad, an ask Jehovah fo please let us go. Den we work hard fo change da way we wen tink, an wat we was doing dat wen make us start fo sin. We try live in one clean way, da way Jehovah like.​—Read um Isaiah 55:6, 7.

2. How Jehovah use da eldas fo help us wen we sin?

If we do someting really bad, Jehovah tell us fo “call da eldas of da local hui.” (Read um From James 5:14, 15.) Dese eldas love Jehovah an dey love da guys who serve him. Dey wen learn how fo help us so we can come tight wit Jehovah again.​—Fo Da Galatia Peopo 6:1.

How da eldas help us if we do someting really bad? Two o three eldas goin use da scripchas from da Bible fo show us how come wat we wen do was wrong. Dey goin give us tings we can do an good kine words fo help us no sin again. If somebody who do someting really bad no stay sorry fo wat he stay doing, da eldas goin hemo him from da local hui so oddas no copy him.

DIG MOA DEEP

3. Telling wat we wen do help us fo get betta

Any time we do someting wrong, dat hurt Jehovah. Dass how come we gotta fess up to him. Read um Songs Fo God 32:1-5, an den talk story about dis question:

• How come is good fo us tell Jehovah oua sins an not try fo hide um?

VIDEO: “Jehovah Sho His Aloha Wen He Teach and Correct” (3:01)

• Inside da video, how da eldas wen help Canon come back to Jehovah?

We gotta tell da trut an no hold back wen we talk to da eldas, cuz dey stay dea fo help us. Read um From James 5:16, an den talk story about dis question:

• How come is moa easy fo da eldas help us wen we no hold back fo tell da trut?

4. Jehovah give chance to da guys who sin

If get somebody who wen do someting really bad an no like do wat Jehovah tell, he goin get hemo from da hui an we no goin cruz wit him. Read um 1 Fo Da Corint Peopo 5:6, 11, an den talk story about dis question:

• Jalike yeast make da bread dough come big, if we hang out wit somebody who wen do someting bad an no like change, how dat goin affeck da local hui?

• How da way Jehovah treat guys who sin show dat he stay fair, give chance, an get love an aloha?

5. Jehovah let us go wen we stay fo real kine sorry an change

Jesus wen use one word picha dat help us fo ­undastan how Jehovah feel wen somebody feel fo real kine sorry, an change. Read um Luke 15:1-7, an den talk story about dis question:

• Wat dis teach you about Jehovah?

Read um Ezekiel 33:11, an den talk story about dis question:

• Wat is importan fo us do fo show dat we sorry fo real kine?

WAT WE WEN TALK ABOUT

If we do someting really bad, but stay fo real kine sorry an really like no do um anymoa, Jehovah goin let us go.

Wat You Wen Learn

• How come az good fo us tell Jehovah oua sins?

• Wat we gotta do so dat Jehovah goin let us go fo oua sins?

• If we do someting really bad, how come we gotta get help from da eldas?

LEARN SOME MOA

Try look how Jehovah wen give one guy chance, da way Isaiah 1:18 tell.

Never Doubt Jehovah’s Mercy (5:02)

How da eldas try help da guys who wen sin mayjah?

“How Eldas Can Be Kind An Show Love To Guys Who Sin” (Da Place Fo Watch From, August 2024)

Try look how can show love an give chance to da guys who sin an no like come sorry.

“Help Fo Da Guys Dat Stay Hemo From Da Hui” (Da Place Fo Watch From, August 2024)

In da story “I Needed to Return to Jehovah,” try learn how come one man who wen drift away from da trut wen feel dat Jehovah wen reel him back in.

“The Bible Changes Lifes” (The Watchtower, April 1, 2012)