-
Wat Da Bible Say About Sex?You Can Live Good Foeva!—Learn Da Bible By Talking Story
-
-
LESSON 41
Wat Da Bible Tell About Sex?
Plenny peopo feel shame fo talk about sex. But, wen da Bible talk about sex, az straight up wit choke respeck. Wat it tell az good fo us. Dat make sense cuz Jehovah wen make us, an he da One know wat bes fo us. He tell us in da Bible how fo make him happy an wat goin make us live good foeva.
1. Wat Jehovah tink about sex?
Sex is one gif from Jehovah. He wen make um fo one husban an wife enjoy um togedda. Dis gif fo couples let um not ony have bebes, but is one way dey can show dea love. Dass how come da Bible tell: “Yoa wife . . . she da one make good tings happen fo you, an you feel good wen you stay wit her.” (Smart Guys 5:18, 19) Jehovah expeck Christians dat stay married fo stick tight togedda so dey neva goin fool aroun.—Read um Fo Da Hebrew Peopo 13:4.
2. Wat is da wrong kine sex God no like?
Da guys dat make wrong kine sex, da Bible tell “no way dey goin get God fo dea king.” (1 Fo Da Corint Peopo 6:9, 10) Da guys who wen write da Bible wen use da Greek word por·neiʹa fo talk about wrong kine sex. Dat word cova tings like (1) sexa between peopo dat no stay married, (2) guys wit guys an girls wit girls, an (3) sex wit animals. We goin make Jehovah happy an tings goin be good fo us wen we “no go fool aroun.”—1 Fo Da Tessalonika Peopo 4:3.
DIG MOA DEEP
Try tink about how you can stay away from wrong kine sex, an how goin be good fo you if you do dat.
3. Run away from wrong kine sex
Joseph, one guy dat was tight wit Jehovah, had fo fight fo stay clean inside. Read um Da Start 39:1-12, an den talk story about dese questions:
Wat wen make Joseph like run away?—Go look verse 9.
You tink Joseph wen do da right ting? How come?
How da younga guys can copy Joseph an run away from wrong kine sex? Play um da VIDEO.
Jehovah like all us stay far away from wrong kine stuff. Read um 1 Fo Da Corint Peopo 6:18, an den talk story about dese questions:
Wat can happen fo make um easy fo do wrong kine sex stuff?
How you can run away from wrong kine stuff?
4. You can fight wrong kine presha
Wat can make um hard fo fight agains presha fo do wrong kine sex stuff? Play um da VIDEO, an den talk story about da question afta.
Wen da braddah in da video wen figga dat da way he tink an da way he ack goin cause him fo cheat on his odda half, wat he wen do?
Even solid Christians get hard time fo no tink bad kine stuff. How you can stop yoaself from tinking plenny about bad kine stuff? Read um Fo Da Philippi Peopo 4:8, an den talk story about dese questions:
Wat kine stuff we should tink about?
How can reading da Bible an doing plenny fo Jehovah kokua us fo fight agains presha fo do bad kine stuff?
5. Wat Jehovah tell us fo do is good fo us
Jehovah know wat da bestes ting fo us. He tell us how fo stay clean in da inside an how come dass good fo us. Read um Smart Guys 7:7-26 o play um da VIDEO, an den talk story about da question afta.
How dis young guy wen put himself in one place wea get presha fo do bad?—Go look Smart Guys 7:8, 9.
Smart Guys 7:23, 26 tell dat pilau sex can make tings come out real bad. Wat kine pilikia we can dodge if we stay clean inside?
How can staying clean inside help us fo live good foeva?
Some peopo tink dat wat da Bible tell about mahu kine sex, not loving. But Jehovah, da God of love an aloha, like erybody live good foeva. But fo do dat, we gotta live da way he like. Read um 1 Fo Da Corint Peopo 6:9-11, an den talk story about dis question:
Fo like do mahu kine stuff, dass da ony ting wrong to God?
Fo make God happy, all us guys need fo change. Worth it o wat? Read um Songs Fo God 19:8, 11, an den talk story about dese questions:
You tink wat Jehovah tell us fo do is good an make sense? How come?
Jehovah wen kokua plenny fo live good da way he like. He can kokua you too
WAT SOME PEOPO TELL: “Az long az two peopo love each odda, sex is ok.”
Wat you goin tell um?
WAT WE WEN TALK ABOUT
Sex is one gif from Jehovah fo one husban an wife enjoy.
Wat You Wen Learn
Wat kine sex is wrong?iz
Wat goin kokua us fo stay away from wrong kine sex?
How az good fo us if we lissen wat Jehovah like us do?
LEARN SOME MOA
Try look how come it matta to God if da couple stay married o not.
“What Does the Bible Say About Living Together Without Marriage?” (Web article)
Even tho da Bible tell dat mahu kine sex is wrong, no mean dat we hate da guys who do um.
Learn how God’s rules about all kine sex stuff proteck us.
In dis real life story “They Treated Me With Dignity,” see wat wen make one mahu guy change his life fo make God happy.
a Some tings dat Jehovah no like can be regula kine sex, using da mout o okole fo sex, o even playing wit each odda’s private parts.
-
-
Wat Da Bible Tell About Being Single An Getting Married?You Can Live Good Foeva!—Learn Da Bible By Talking Story
-
-
LESSON 42
Wat Da Bible Tell About Being Single An Getting Married?
Some cultures tink dat da ony way fo be happy is you gotta get married. But, not erybody who stay married, stay happy. Jus cuz you single, dat no mean you not happy. Da Bible tell dat being single an being married both stay gifs.
1. How come is good fo be single?
Da Bible tell: “Good ting fo . . . marry . . . but mo betta . . . no get married.” (Read um 1 Fo Da Corint Peopo 7:32, 33, 38.) How is “mo betta” fo be single? Single Christians no moa one odda half fo take kea of. So dey get moa free time. Fo exampo, some can do moa fo Jehovah like go anodda place fo preach. Mos importan, dey get moa time fo come close to Jehovah.
2. How come is good fo be married?
Jalike being single, being married get good tings about um. Da Bible tell: “Two mo betta den one.” (Da Teacha 4:9) Dass even moa true fo da guys who wen try do wat da Bible tell inside dea marriage. Couples who make dea marriage legal make one promise fo love, respeck, an take kea each odda. An cuz of dat, mos times dey feel moa solid den da couples who ony live togedda. An dat goin make dea keiki feel moa safe.
3. How Jehovah look at marriage?
Wen Jehovah wen make da firs marriage, he wen tell: “Da guys go way from dea faddah-muddah guys, an come tight wit dea wife.” (Da Start 2:24) Jehovah like one husban an wife fo love an stick to each odda dea whole life. Da ony time Jehovah tell az ok fo divorce is if one of dem fool aroun. If dat happen, Jehovah give da one dat neva fool aroun da right fo choose if dey like get divorce.a (Matthew 19:9) Jehovah no let Christians have moa den one odda half at da same time.—1 Fo Timoty 3:2.
DIG MOA DEEP
Learn how fo be happy—an make Jehovah happy—wedda you single o married.
4. No wase da gif of being single
Jesus wen look at being single az one gif. (Matthew 19:11, 12) Read um Matthew 4:23, an den talk story about dis question:
Cuz Jesus was single, how he wen make use of dat gif fo serve his Faddah an help odda peopo?
Single guys can use dea time good jalike Jesus. Play um da VIDEO, an den talk story about da question afta.
How single guys can use dea time an be happy?
You wen know?
Da Bible no give one age you gotta be fo get married. But, it tell you should be “ol enough,” pas da time wen sex-kine feelings can make one young person no see tings clear.—1 Fo Da Corint Peopo 7:36.
5. Be akamai wen you choose yoa odda half
Picking who you goin marry is one of da mos importan choices you eva goin make. Read um Matthew 19:4-6, 9, an den talk story about dis question:
How come no good fo get married too fas?
Da Bible can help you know wat kine person fo marry. Da numba one ting, look fo somebody who love Jehovah.b Read um 1 Fo Da Corint Peopo 7:39 an 2 Fo Da Corint Peopo 6:14. Den talk story about dese questions:
How come we should ony marry anodda Christian?
How you tink Jehovah would feel if you marry somebody who no love Him?
If you put two diffren animals togedda fo work, dey both goin suffa. Same ting, one Christian who marry somebody who no trus God goin get plenny pilikia
6. See marriage like how Jehovah see um
Long time ago, guys in Israel wen divorce dea wifes fo any kine selfish reasons. Read um Malakai 2:13, 14, 16, an den talk story about dis question:
How come Jehovah hate one wrong kine divorce?
Wen you fool aroun an divorce, you hurt da odda half who neva do notting wrong an da kids
Play um da VIDEO, an den talk story about da question afta.
If you married to somebody who no trus God, wat you can do fo make yoa marriage good?
7. Lissen to Jehovah wen come to marriage
Maybe you gotta work hard fo do wat Jehovah tell wen come to marriage.c But if you do, Jehovah goin bless um. Play um da VIDEO.
Read um Fo Da Hebrew Peopo 13:4, an den talk story about dese questions:
You tink wat Jehovah tell about marriage make sense o wat? How come?
Jehovah expeck Christians fo make dea marriage an divorce legal. Read um Fo Titus 3:1, an den talk story about dis question:
If you stay married, you wen make shua yoa marriage stay legal to da govament?
WAT SOME PEOPO TELL: “Wat fo, get married? No can jus live togedda?”
Wat you goin tell um?
WAT WE WEN TALK ABOUT
Being single an getting married is both gifs from Jehovah. Both can make you happy if you do um da way Jehovah tell.
Wat You Wen Learn
How one single person can use dea gif in one good way?
How come da Bible tell fo ony marry one odda Christian?
Wen da Bible tell is ok fo divorce?
LEARN SOME MOA
Wat dat mean fo marry “ony if da odda guy stay tight wit Da One In Charge”?
Watch dis video dat goin help you make good choices about dating an marriage.
Try see how come one braddah had feel wat he wen get from Jehovah was way moa betta den wat he wen give up.
Wat some tings one person gotta know befoa tinking about divorce o splitting up?
“Honor ‘What God Has Yoked Together’” (The Watchtower, December 2018)
b Some cultures, da parents pick who dea kids goin marry. If stay lidat wea you live, good parents, wen trying fo find somebody fo dea kid marry, goin tink firs about how much da person love Jehovah, not about how much money dey get, wea dey went school o wea dea from.
c If you living wit somebody an you not married to dem, is up to you wedda you leave da person o marry um.
-