2. Who Satan an da demons, da bad kine spirits?

Some angels neva stay tight wit Jehovah. Da firs angel who wen go agains God, “dey call um da Devil an Satan, who bulai all da peopo inside da world.” (Jesus Show 12:9) Satan wanted fo be in charge ova oddas, so he wen get Adam an Eve an layta even odda angels fo lissen him an go agains Jehovah. Da angels who wen go agains God, dey call um demons. Jehovah wen throw dem out of da sky, down on top da earth, an dey goin get wipe out foeva.—Read um Jesus Show 12:9, 12.

3. How Satan an da demons try bulai us?

Satan an da demons bulai plenny peopo wit spirit kine stuff. Dass wen somebody try talk story wit spirits an az pilau fo do dat. Some peopo try ask guys who know plenny about da stars, fortune-tella guys, da guys who try talk to da mahke peopo, an guys who put kahuna on top peopo fo help dem. Oddas try use spirit kine stuff fo try hemo da sickness dey get. Some peopo believe dey can talk story wit da mahke peopo. But Jehovah tell us fo watch out: “No go look fo da wahines dat talk to da mahke peopo, an no go find da guys dat know how fo find out wat da mahke peopo spirits know.” (Da Prieses 19:31) He tell us dat fo proteck us from Satan an da demons. Dey da ones who go agains God an dey like try hurt us.

6. Be da winna agains Satan an his demons

Satan da one in charge of da demons. But da chief leada of da angels is Michael, one odda name fo Jesus. He lead da angels who trus God. How much powa Michael get? Read um Jesus Show 12:7-9, an den talk story about dese questions:

• Who get moa powa? Michael an his angels o Satan an da demons?

• You tink da guys who follow Jesus gotta be sked of Satan an his demons o wat?

You can be da winna ova Satan an his demons. Read um From James 4:7, an den talk story about dis question:

• How you can proteck yoaself from Satan an da demons?

2. Since 1914, wat stay happening in da world an how peopo been acking?

Jesus guys wen ask him: “Tell us wen dese tings goin come an da way tings stay right now, wen goin pau.” (Matthew 24:3) Jesus wen tell um plenny stuff dat was goin happen bumbye wen he was goin rule az da King of God’s Govament. Goin get stuff like war, no moa nuff food, an earthquakes. (Read um Matthew 24:7.) Da Bible also wen tell befoa time dat how peopo was goin ack “befo da world goin come pau” was goin make um so dat “erybody goin presha out.” (2 Fo Timoty 3:1-5) We wen see all dis even moa since 1914.

3. How come stuffs come moa worse since God’s Govament wen start fo rule?

Ony litto while afta Jesus wen come da King of God’s Govament, he wen war in heaven agains Satan an da demons. Satan wen lose. Da Bible tell dat “him an his angel messenga guys get throw down on top da earth.” (Jesus Show 12:9, 10, 12) Satan stay real huhu cuz he know he goin get wipe out. So he da one who make erybody all ova da earth come soa an suffa. Dass how come eryting stay all jam up. God’s Govament goin fix all dis.