Lot wen live wit his Unko Abraham in Canaan. Afta a while, Abraham an Lot had plenny animals, an dey neva have nuff land fo all of dem. Abraham wen tell Lot, ‘We no can all live togedda in one place. Pick wat side you like live, an I goin go da odda side.’ Abraham neva tink bout himself, aah?

Lot wen see one beautiful paht of da land nea one town called Sodom. Get plenny watta an green grass ova dea. So he wen choose dat place an move his ohana dea.

Da peopo of Sodom an da big town Gomorrah wuz real pilau. Dey wuz so bad dat Jehovah wen choose fo wipe out dose towns. But God wanted fo save Lot an his ohana, so he wen sen two angels fo warn dem, ‘Get up! Get outa hea! Jehovah goin wipe out eryting.’

Lot neva dig out right away. He kept putting um off. So da angels wen grab Lot, his wife, an his two girls an rush dem outa da town, an tell, ‘Run away wea you no goin mahke, an no look behind you. Cuz if you look back, you goin mahke!’

Wen dey had get to da town called Zoar, Jehovah wen make um rain fiyah an sulfur on top Sodom an Gomorrah. Dose two towns wen get full on wipe out. Wen Lot’s wife neva lissen Jehovah an wen look behind her, she wen come jalike one salt rock statue! But Lot an his girls wuz safe cuz dey wen lissen to Jehovah. Dey musta been real sad dat Lot’s wife neva lissen. But dey wuz happy dey wen lissen to wat Jehovah tell.

Abraham wen teach his boy Isaac fo love Jehovah an fo trus eryting dat Jehovah say he goin do. But wen Isaac wuz about 25 year ol, Jehovah wen ask Abraham fo do someting dat wuz real hard fo do. Wat wuz dat?

God wen tell Abraham: ‘Take yoa ony boy to one mountain Moriah side, an give him az one sacrifice.’ Abraham neva know how come Jehovah had ask him fo do dat. But he still wen lissen to Jehovah.

Early da nex morning, Abraham wen take Isaac an two worka guys an start fo go Moriah side. Afta dey had walk fo three days, dey could see da mountains far away. Abraham wen tell his worka guys fo wait, an him an Isaac wen go da place fo make da sacrifice. Isaac wen carry da fiyah wood, an Abraham wen take one knife. Isaac wen ask his faddah: ‘Wea da animal fo da sacrifice?’ Abraham wen tell: ‘My boy, Jehovah goin give us dat.’

Wen dey finally wen get to da mountain, dey wen build one altar. Den Abraham wen tie Isaac’s hands an feets an put him on da altar.

Abraham wen pick up da knife. Right den an dea, Jehovah’s angel messenja guy wen yell from da sky: ‘Abraham! No hurt da boy! Now I kno you trus God cuz you neva hold back an you wuz ready fo sacrifice yoa boy.’ Den Abraham wen spock one boy sheep wit da horns stuck in da bushes. Ony fas he wen hemo da ropes from Isaac, an wen sacrifice da boy sheep.

From den on, Jehovah wen call Abraham his fren. You kno how come? Cuz Abraham wen do wateva Jehovah wanted him fo do, even tho he neva kno why Jehovah wen ask him fo do um.

Jehovah wen tell his promise to Abraham again: ‘I goin give you plenny good tings, an I goin make um so dat plenny kids come from you.’ Dis wen mean dat cuz of Abraham’s ohana, Jehovah goin do good tings fo all da peopo who lissen him.