Da king of Syria, Ben-hadad, wen attack Israel nonstop. But erytime da prophet Elisha give da king of Israel one heads up, so dat da king wuz able fo stay safe. Dass why Ben-hadad figga iz betta fo kidnap Elisha firs. He wen find out dat Elisha wuz in da city of Dotan, so he sen da Syria army guys fo go catch him.

Night time, da Syria guys wen go Dotan. Da nex morning, Elisha’s worka guy go outside an spock one huge army all aroun da town. He wuz supa sked an yell: ‘Elisha, wat we goin do?’ Elisha tell: ‘No sked, we get way moa guys den dem.’ Right den an dea, Jehovah make um so Elisha’s worka guy could see His army of fiyah kine horses an chariots, all up in da mountains an aroun da city.

Wen da Syria army try catch Elisha, he pray to Jehovah fo help. Den Jehovah wen confuse dem, an dey neva kno wea dey wuz. Elisha tell da Syria army guys: ‘You stay da wrong place. Try come, I go take you to da guy you looking fo.’ So dey follow Elisha, an he bring dem inside Samaria town, wea da Israel king live.

Ony wen dey stay Samaria awready, da Syria guys figga out wea dey wuz. Dey no could do notting now. Den da Israel king ask Elisha: ‘I should kill dem or wat?’ Wat Elisha goin do? You tink he goin get back at dese guys who wen try hurt him? No, he neva. Elisha tell: ‘No kill dem. Give dem food an watta, an let dem go.’ So da king spread one big luau fo dem, an den let dem go home.

Jezebel had one daughta named Ataliah. She wuz supa pilau jus like her maddah. Ataliah wuz married to da king of Judah. Afta her husband wen mahke, her son wen come king. But he wen mahke too. So den, Ataliah wen make herself da Judah rula. She wen kill anybody dat wuz in line fo come rula, even if wuz her own grandsons. Erybody wuz sked of her.

Main Pries Jehoiada an his wife, Jehosheba, had kno dat Ataliah wuz doin pilau stuff. Dey put dea life on da line fo hide bebe Joash, one of Ataliah’s grandsons. Dey wen raise him at Da Tempo.

Wen da boy wuz seven years old, Jehoiada had get togedda all da army leadas an da Levi guys an tell dem: ‘Watch da doors to Da Tempo an no let nobody nea da King.’ Den Jehoiada wen make Joash da king of Judah an put one crown on top his head. Da Judah peopo yell: ‘We like da king live foeva!’

Queen Ataliah hea peopo cheering, so she run to Da Tempo. Wen she see da new king, she yell: “You backstabbas!” Da army leadas grab da pilau queen, take her away from Da Tempo an kill her. But wat about da bad effeck she wen have on all da peopo?

Jehoiada wen help da peopo fo make one strong promise to Jehovah fo ony worship Him. Jehoiada had da peopo break down da Baal tempo an smash all da idols to pieces. He put in charge da prieses an da Levi guys fo work at Da Tempo, so dat da peopo can worship ova dea again. He put some guards at Da Tempo gate, so no one pilau in Jehovah’s eyes could come in. Den Jehoiada an da army leadas take Joash to da palace, an put him on da king’s chair. Da Judah peopo wuz so happy cuz now dey could worship Jehovah. Dey wuz free from pilau Ataliah an Baal worship. You can see, yeah, how Jehoiada wen help plenny peopo cuz he no wuz sked?