In Nineveh town, da Assyria peopo wuz real pilau. Jehovah wen tell his prophet Jonah fo go Nineveh an warn da peopo fo stop doin pilau kine tings. But Jonah wen dig out an go da odda way. He wen jump on one boat dat wuz goin Tarshish side.

Wen dey wuz out in da ocean, one mean kine storm had come an all da saila guys wuz sked. Dey wen pule to dea gods an ask: ‘Wass goin on?’ Finally, Jonah tell dem: ‘Az my fault. I wen run away from wat Jehovah wen tell me fo do. You guys gotta throw me into da ocean an den da storm goin stop.’ Da sailas neva like throw Jonah out of da boat, but he wen keep telling dem fo do um. Wen dey did throw Jonah out into da ocean, da storm had stop.

Jonah tink he wuz goin mahke. Az he wuz sinking deepa into da ocean, he wen pray to Jehovah. Den Jehovah had sen one humangus fish fo swallow Jonah, but dat neva kill him. From inside da fish, Jonah pray: ‘I promise fo lissen you erytime.’ Fo three days, Jehovah wen keep Jonah safe inside da fish belly an den da fish spit him out onto da beach.

Cuz Jehovah had save Jonah, an fogive him, Jonah still had fo go Nineveh? Yeah, Jehovah again tell Jonah fo go ova dea. But dis time, Jonah wen lissen an go Nineveh. He tell da pilau peopo: ‘Ony get 40 moa days, den God goin wipe out Nineveh town.’ Den someting unreal happen—da Nineveh peopo wen lissen wat God tell an change dea ways. Da king fo Nineveh tell da peopo: ‘Pray to God, an stop doing pilau tings. Den maybe he not goin wipe us out.’ Wen Jehovah had see dat da peopo come sorry, he neva wipe out Nineveh.

Jonah come all huhu cuz da town no wuz wipe out. Brah, how’z dis guy?! Jehovah wuz patient an wen fogive Jonah, but Jonah neva show pity to da peopo of Nineveh. So he wen go sit outside da town in da shade of one plant an wuz all habut. Den da plant wen die, an Jonah got all mad. So Jehovah tell him: ‘I wen show da Nineveh peopo pity, an let dem live. But you kea moa about dis plant den dem.’ Wat da poin of dis? Da Nineveh peopo wuz way moa importan den one plant.

Da Assyria kingdom wen take ova da ten-tribe kingdom of Israel. So now Sennakerib, da king of Assyria, wanted fo take ova da two-tribe kingdom of Judah too. He had start fo take ova da towns of Judah one by one. Jerusalem wuz da main town he wen like. But one ting Sennakerib neva kno iz dat Jehovah wuz proteckting Jerusalem.

Hezekiah, da Judah king, wen pay Sennakerib choke money fo leave Jerusalem alone. Even tho Sennakerib wen take da money, he still wen sen his army fo attack Jerusalem. Da peopo wuz supa sked cuz da Assyria army wuz getting moa close. Den Hezekiah tell: ‘No be sked. Da Assyria guys strong, but Jehovah stay wit us an he way moa strong den dem.’

Sennakerib sen his messanja guy, da Rabshakeh, fo go Jerusalem an make fun of da peopo. Da Rabshakeh guy stand outside da town an yell: ‘Wat! You tink Jehovah goin help you guys?! No let Hezekiah trick you. No moa any god dat can proteck you from us guys!’

Hezekiah donno wat fo do so he pray to Jehovah. Jehovah ansa: ‘No be sked by wat da Rabshakeh tell cuz Sennakerib not goin take ova Jerusalem.’ Den Hezekiah get some lettas from Sennakerib. Da lettas tell: ‘You betta give up, cuz Jehovah no goin save you.’ Hezekiah pray: ‘Please, Jehovah, save us so dat erybody goin kno dat you da one an ony true God.’ Jehovah tell Hezekiah: ‘Da Assyria king not goin put even one foot in Jerusalem. I goin proteck my town.’

Sennakerib wen tink fo shua Jerusalem wuz goin be his. His army camp wuz right outside da town. But one night, Jehovah sen one of his angels. An you kno wat dat one angel wen do? He wen kill 185,000 Assyria army guys! King Sennakerib wuz all sick cuz he wen lose his stronges guys. He no could do notting, so he go home one losa. Jus like Jehovah promise, he wen proteck Hezekiah an Jerusalem. Wat you tink? You would trus Jehovah if you wuz dea in Jerusalem?